ငိုၼ်းၸႂ်ႉၸၢႆႇ ၵၢၼ်ၵႅ​တ်ႇၵင်ႈ ၵျႃႇပၢၼ်ႇ ၶိုၼ်ႈမႃး ႁၢဝ်ႈႁႅင်း ယွၼ်ႉလွင်ႈလွၵ်ႇငိူတ်ႇၶႄႇ

ဝၼ်းသဝ်၊ ဢေႃးၵၢတ်ႉ 31၊ 2024 

The Japan Maritime Self-Defense Force destroyer JS Suzutsuki (DD 117)

လွင်ႈဢၼ်ၶႄႇ လွၵ်ႇငိူတ်ႈ ၵုၼ်ၸဵင်ႇႁွင်ႇဝၼ်းတူၵ်း မိူင်းၵျႃႇပၢၼ်ႇ ၼမ်မႃးတိၵ်းတိၵ်းလႄႈ ၼင်ႇႁိုဝ် ၵၢၼ်ၵႅတ်ႇၵင်ႈ တေတိူဝ်းၼမ်မႃးၼႆသေ မိူဝ်ႈဢေႃးၵၢတ်ႉ 30 ဝၼ်းၼၼ်ႉ ထၢၼ်ၽွင်းလူင် ၵၢၼ်ၵႅတ်ႇၵင်ႈ တုၵ်းယွၼ်း ႁႂ်ႈၸႅၵ်ႇပၼ်ငိုၼ်းၵျႃႇပၢၼ်ႇ 8.5 ထရီႇလီႇယၼ်ႇ ဢၼ်မိူၼ်ၵၼ်တင်း 59 ပီႇလီႇယၼ်ႇတေႃႇလႃႇ ဢမႄႇရိၵၼ်ႇ ၼႂ်းပီၼႃႈ တႃႇၸႂ်ႉၸၢႆႇ ၵၢၼ်ၵႅတ်ႇၵင်ႈ ၼႂ်းပီၼႃႈၼၼ်ႉ ၼႆယဝ်ႉ။

ယွၼ်ႉႁူဝ်ၼပ်ႉၵူၼ်း ၼႂ်းမိူင်းၵျပၢၼ်ႇ ဢမ်ႇပေႃးၼမ်မႃးလႄႈ ထၢၼ်ၽွင်းလူင် ၵၢၼ်ၵႅတ်ႇၵင်ႈ ဝႆႉၼၵ်းၼိူဝ် လွင်ႈၸႂ်ႉတိုဝ်း ပၢႆးၸၢင်ႈ ဢွၵ်းပွမ် AI တီႈ ၶိူင်ႈၸၢၵ်ႈ ဢၼ်ဢမ်ႇပႃးၵူၼ်း လႄႈ ၶိူင်ႈၵွင်ႈၵၢင်ႇ တႃႇတႅၼ်းတၢင် တီႈႁူဝ်ၼပ်ႉၵူၼ်းၼၼ်ႉ ၼႆယဝ်ႉ။

ၵွပ်ႈပိူဝ်ႈၸိူင်ႉၼႆလႄႈ ဝၢႆးလင် ဢ​မႄႇရိၵ လႄႈ ၶႄႇယဝ်ႉ ပဵၼ်မိူင်းဢၼ်ၸႂ်ႉၸၢႆႇငိုၼ်းၼမ်လိူဝ်ပိူၼ်ႈ တီႈသၢမ်ယဝ်ႉ။ လွင်ႈတုၵ်းယွၼ်း ငိုၼ်းၸႂ်ႉၸၢႆႇ ၽၢႆႇသိုၵ်းၼႆႉ လႆႈမၵ်းမၼ်ႈ တီႈပၢင်ၵုမ် ထၢၼ်ၽွင်းလူင် ၽၢႆႇၵႅ​တ်ႇၵင်ႈ မိူဝ်ႈဝၼ်းသုၵ်းၼၼ်ႉသေ တေလႆႈတၢင်ႇထိုင် ထၢၼ်ၽွင်းလူင် ၽၢႆႇငိုၼ်းတွင်း တႃႇတေဢုပ်ႇဢူဝ်းၵၼ် ၵွၼ်ႇၼႃႈ လိူၼ်တီႇသႅမ်ႇပႃႇၼၼ်ႉ ၼႆယဝ်ႉ။

ၼႂ်းပီပူၼ်ႉမႃးၸိူဝ်းၼႆႉ ယွၼ်ႉပိူဝ်ႈ လွင်ႈလွၵ်ႇငိူတ်ႈ ၽၢႆႇသိုၵ်းၶႄႇ ၼမ်မႃးသေဢမ်ႇၵႃး လွင်ႈၶဵင်ႈၶႅင် ၼႂ်းပၢင်ႇလၢႆႇ ၼႂ်းပိုၼ်ႉတီႈၼၼ်ႉ လႆႈတိူဝ်းၼမ်မႃးလႄႈ ၵျႃႇပၢၼ်ႇ ၸင်ႇလႆႈႁဵတ်း တႃႇယုၵ်ႉသုင်ၵၢၼ်ၵႅတ်ႇၵင်ႈ ဝႆးဝႆး ၼႂ်းပိုၼ်ႉတီႈ ၸဵင်ႇၸၢၼ်းဝၼ်းတူၵ်းမၼ်းၼၼ်ႉယဝ်။ မိူင်းၶႄႇၼႆႉ ၵႆႉလႆႈပဵၼ်ပၢင်တိုၵ်းၵၼ်တင်း တပ်ႉပႂ်ႉလႅၼ်လိၼ် မိူင်းၾီလိပ်ႈပိၼ်း ယွၼ်ႉပၼ်ႁႃၼႃႈလိၼ် ၼႂ်းပၢင်ႇလၢႆႇၶႄႇၸၢၼ်းၼၼ်ႉယဝ်ႉ။

လိူဝ်ၼၼ်ႉ ၶႄႇၵေႃႈ သူင်ႇႁိူဝ်းပႂ်ႉၽင်ႇပၢင်ႇလၢႆႇ ၶဝ်ႈၼႂ်းၼမ်ႉ ၸွမ်းၵုၼ်ဢၼ်မီးလွင်ႈထဵင်ထွင်ၵၼ် ဢၼ်ၵျႃႇပၢၼ်ႇၶဝ် ၵုမ်းၵမ်ဝႆႉ ၼႂ်းပၢင်ႇလၢႆႇၶႄႇပွတ်းဢွၵ်ႇ ဢၼ်ၶႄႇဝႃႈ ပဵၼ်ၶွင်ၶဝ်ၼၼ်ႉ ၼႆယဝ်ႉ။

ငိူၼ်ႈငဝ်ႈၶၢဝ်ႇ

• Associated Press. "Japan's defense ministry seeks record budget as it faces growing threat from China" — VOA News, August 30, 2024
• Takahashi Kosuke. "Japan’s Defense Ministry Requests Largest Ever Budget for Fiscal Year 2025" — The Diplomat, August 30, 2024
• Jesse Johnson. "Japan seeks another record-breaking defense budget for fiscal 2025" — Japan Times, August 30, 2024