တပ်ႉၼမ်ႉမိူင်းမၢၼ်ႈ ယိုဝ်းႁိူဝ်းတမ်ႇငႃႈထႆး တၢႆၼိုင်ႈၵေႃႉ ထုၵ်ႇၺွပ်း 31 ၵေႃႉ

ဝၼ်းသဝ်၊ ၼူဝ်ႇဝႅမ်ႇပႃႇ 30၊ 2024 

ႁိူဝ်းတပ်ႉၼမ်ႉမၢၼ်ႈ (ၶႅပ်းႁၢင်ႈၵဝ်ႇ)

မိူဝ်ႈဝၼ်းသဝ် ၸဝ်ႉၸဝ်ႉၼၼ်ႉ ႁိူဝ်းသိုၵ်းမၢၼ်ႈ လမ်း႞ ဢဝ်ၵွင်ႈယိုဝ်းသႂ်ႇ ႁိူဝ်းႁႃပႃထႆး 3 လမ်း ဢၼ်တူင်ႉၼိုင်ယူႇၼႂ်းၼမ်ႉထႆးသေ ၵူၼ်းၸွမ်းႁိူဝ်း လႆႈတၢႆၵႂႃႇ 1 ၵေႃႉသေ တိၺွပ်းလႆႈထႅင်ႈ 31 ၵေႃႉ ၼႆယဝ်ႉ။

ၶၢဝ်ႇငၢဝ်းဢွၵ်ႇမႃးဝႃႈ ႁိူဝ်းၸိူဝ်းၼၼ်ႉ တိုၵ်ႉႁႃပႃယူႇ တီႈၽၢႆႇတူၵ်း ၵုၼ်ၽယၢမ် မွၵ်ႈ 20 ၵီႇလူဝ်ႇမီႇတႃႇၼၼ်ႉ ႁိူဝ်းမၢၼ်ႈ မႃးၸူးၶဝ်လႄႈ ၵူၼ်းႁႃပႃထႆးၶဝ် လႆႈတႅပ်းၼႅင်ႈၶဝ်၊ လႆႈၶိုၼ်ႈဝႆးဢိၼ်ႇၵျိၼ်ႇၶဝ်သေ ၶတ်းၸႂ်ပၢႆႈ ၼႆယဝ်ႉ။

ၶေႃႈမုၼ်း ဢၼ်လႆႈမႃးတီႈ ၽူႈမီးပုၼ်ႈၽွၼ်း ၼႂ်းပိုၼ်ႉတီႈ သွမ်ႇသပ်ႉ ၸိတ်ႉတထမ်ႇ၊ မိူဝ်ႈတႄႇမၼ်းၼၼ်ႉ ၼႄဝႃႈ ႁိူဝ်းႁႃပႃထႆး သွင်လမ်း “ရၼွင်း 333” လႄႈ “ၶျႃႇရူဝ်ႇၶျၢႆႇ 8” ၼၼ်ႉ လႆႈထုၵ်ႇဢဝ်ၵႂႃႇ ၼႂ်းၼမ်ႉ မိူင်းမၢၼ်ႈသေ ၵူၼ်းႁဵတ်းၵၢၼ် ႁိူဝ်း “မႁႃႇလပ်ႉထၼႃႇဝတ်ႉ 4” ၼၼ်ႉ လႆႈမၢတ်ႇၸဵပ်း သွင်လမ်း ယွၼ်ႉလုၵ်ႉတီႈႁိူဝ်းတပ်ႉၼမ်ႉမိူင်းမၢၼ်ႈ ဢဝ်ၵွင်ႈယိုဝ်း လႄႈ ထႅင်ႈၵေႃႉ႞ လုၵ်ႉတီႈ ၾႆးၾႃႉသျွတ်ႉ ၼႆယဝ်ႉ။

ႁိူဝ်းလဵပ်ႈယၢမ်းထႆး T.274 ဢၼ်ပၵ်းဝႆႉႁိမ်းၵုၼ်ၽယၢမ်ၼၼ်ႉ ႁွတ်ႈၽႅဝ်တီႈဢွင်ႈပဵၼ်လိူင်ႈ တႃႇၸွႆႈထႅမ်သေ လိုၼ်းသုတ်း လႆႈဢဝ်ၵူၼ်းမၢတ်ႇၸဵပ်း ၵႂႃႇတီႈဝဵင်းရၼွင်းသေ ႁွတ်ႈထိုင်တႃႈႁိူဝ်း ယၢမ်းၵၢင်ၼႂ် မွၵ်ႈ 3.30 မူင်း ၼႆယဝ်ႉ။

သုၼ်ၵုမ်းၵမ် ၽၢႆႇတတ်းသိၼ် ၽၢႆႇၼိူဝ်ၼမ်ႉ မိူင်းထႆး လႄႈ ႁွင်ႈၵၢၼ်ပလိၵ်ႈ ၸႄႈတွၼ်ႈ ရၼွင်း လႆႈႁူမ်ႈမိုဝ်းၵၼ်တင်း ႁူင်းယႃ ရၼွင်း လႄႈ ၸုမ်းၵမ်ႉၸွႆႈငိုၼ်းတွင်း ရၼွင်းသေ ၸွႆႈထႅမ်ပၼ် ၵူၼ်းမၢတ်ႇၸဵပ်း ၼႆယဝ်ႉ။

ၶၢဝ်ႇငၢဝ်း ဢွၵ်ႇမႃးဝႃႈ ၵူၼ်းၼႂ်းႁိူဝ်း “ရၼွင်း 333” ၶဝ် ဝႅၼ်တူၵ်းႁိူဝ်း တႃႇတေလွတ်ႈၽေးၵွင်ႈ၊ ၵေႃႉၼိုင်ႈ ၸူမ်ၼမ်ႉတၢႆသေ တိုၵ်ႉဢဝ်ၵႂႃႇတီႈဝဵင်းရၼွင်း တႃႇတေၼႄႉၼမ်းတူဝ် ဝႃႈၼႆယဝ်ႉ။

တေႃႇထိုင်ယၢမ်းလဵဝ် ၵူၼ်းၸွမ်းႁိူဝ်း 31 ၵေႃႉ ပႃးၸၢဝ်းထႆး 4 ၵေႃႉ လႄႈ ၸၢဝ်းမၢၼ်ႈ 27 ၵေႃႉၼၼ်ႉ လႆႈထုၵ်ႇ ၸဝ်ႈၼႃႈတီႈမၢၼ်ႈ တီႉၵမ်ဝႆႉသေ လၢမ်းၶၢတ်ႈဝႃႈ တေဢဝ်ၵႂႃႇဝႆႉတီႈ ၵုၼ်ယၼ်ႇၶျူၵ်ႉ ၼႆယဝ်ႉ။

သုၼ်ၵပ်းသၢၼ်ၵၢၼ်ႁႃပႃ လႅၼ်လိၼ်ပၢင်ႇလၢႆႇ ထႆး-မၢၼ်ႈ ႁူမ်ႈမိုဝ်းၵၼ်တင်း ၶွမ်ႇမတီႇပိုၼ်ႉတီႈလႅၼ်လိၼ်ထႆး-မၢၼ်ႈသေ သၢၼ်ၶတ်းပဵၼ်တၢင်းၵၢၼ် လွင်ႈႁိူဝ်းလဵပ်ႈယၢမ်းမိူင်းမၢၼ်ႈ ၶဝ်ႈမႃးၼႂ်းၼမ်ႉပၢင်ႇလၢႆႇထႆး လႄႈ လႆႈၸၼ်ႁိူဝ်းထႆးၵႂႃႇ ၼင်ႇၼႆ ၼႆယဝ်ႉ။ တႃႇတေပွႆႇပၼ် ၵူၼ်းႁႃပႃ ၸိူဝ်းထုၵ်ႇၵုမ်းၶင်ဝႆႉၼၼ်ႉ တိုၵ်ႉၶတ်းၸႂ်ယူႇ ဝႃႈၼႆ။

ငိူၼ်ႈငဝ်ႈၶၢဝ်ႇ

• Reuters. "Myanmar navy fires at Thai fishing boats, detains 31 fishermen, Thailand says" — Reuters, November 30, 2024
• The Nation. "Myanmar vessel attacks Thai fishing boats: one killed, 31 captured" — The Nation (Thailand), November 30, 2024
• Reuters and Post Reporters. "31 crew from Thai boats ‘taken into Myanmar’" — Bangkok Post, November 30, 2024
• The Straits Times. "31 crew members of Thai fishing boats held in Myanmar; 1 drowns" — The Straits Times, November 30, 2024