တရူၼ်း ယူႇၶရဵၼ်း 140 ပၢႆ ပိုတ်းယိုဝ်းတီႈရတ်ႈသျႃး ၼၢင်းယိင်းၵေႃႉၼိုင်ႈ လႆႈတၢႆၵႂႃႇ

ဝၼ်းဢင်းၵၢၼ်း၊ သႅပ်ႇ​ထႅမ်ႇပႃႇ 10၊ 2024 

UAV တိုၵ်းတေႃး တီႈ ဝဵင်းမွတ်ႇသၵူဝ်ႇ မိူဝ်ႈပီ 2023

ၸဝ်ႈၼႃႈတီႈၶဝ် မွၵ်ႇလၢတ်ႈ မိူဝ်ႈဝၼ်းဢင်းၵၢၼ်းၼၼ်ႉဝႃႈ ႁိူဝ်းမိၼ် ယူႇၶရဵင်း 140 လိူဝ်လိူဝ် ယိုဝ်းသႂ်ႇ ၼႃႈလိၼ် ရသျႃး လၢႆလၢႆတီႈ ၼႂ်းၶိုၼ်းလဵဝ် ပႃးၸဵမ် ဝဵင်းမွတ်ႇသၵူဝ်ႇ လႄႈ ႁိမ်းႁွမ်းမၼ်းသေ ႁဵတ်းႁႂ်ႈ ၵူၼ်းတၢႆ ဢမ်ႇယွမ်း 1 ၵေႃႉ မၢတ်ႇၸဵပ်း 8 ၵေႃႉ ၼႆသေ ၼႆႉ ပဵၼ်လွင်ႈဢၼ် ႁိူဝ်းမိၼ် Drone ယူႇၶရဵၼ်း ဢၼ်ယိုဝ်းသႂ်ႇ လိၼ်မိူင်းရသျႃး ဢၼ်ယႂ်ႇသုတ်း ၼႂ်းၶၢဝ်းတၢင်းပၢင်တိုၵ်း 2 ပီၶိုင်ႈ ၼၼ်ႉ ၼႆယဝ်ႉ။

ၼၢင်းယိင်းၵေႃႉ႞ လႆႈတၢႆၵႂႃႇ တီႈဝဵင်း Ramenskoye ဢၼ်မီးၽၢႆႇၼွၵ်ႈဝဵင်းမွတ်ႇသၵူဝ်ႇၼၼ်ႉသေ ႁိူဝ်းမိၼ် Drone ၼၼ်ႉ ၽႃႇၺႃး ႁူင်းႁေႃ ၵူၼ်းယူႇသဝ်း သွင်ၸၼ်ႉသေ ၾႆးမႆႈၵႂႃႇ ၼႆ ၽူႈၵွၼ်းၸႄႈတွၼ်ႈ မွတ်ႇသၵူဝ်ႇ Andrei Vorobyov လၢတ်ႈၼႄၼင်ႇၼႆ။ ယွၼ်ႉပိူဝ်ႈ ၶူဝ်းၶွင် ဢၼ်ဢမ်ႇမီးၵူၼ်းၶီႇၼၼ်ႉ တူၵ်းမႃးလႄႈ လႆႈၶၢႆႉဢွၵ်ႇ ႁူင်းႁေႃ ၵူၼ်းယူႇသဝ်း 5 လင် ၼႆ ဝူဝ်ႇရူဝ်ႇပီႇယႃႇ လၢတ်ႈၼႄၼင်ႇၼႆ။

လွင်ႈၼႆႉ ႁဵတ်းႁႂ်ႈ ၸဝ်ႈၼႃႈတီႈၶဝ် လႆႈဢိုတ်းႁပ်း တႃႈႁိူဝ်းမိၼ် သၢမ်တီႈ ဢၼ်မီးၽၢႆႇၼွၵ်ႈ ဝဵင်းမွတ်ႇသၵူဝ်ႇ ဢၼ်ပဵၼ် Vnukovo, Domodedovo လႄႈ Zhukovsky ၼၼ်ႉသေ လႆႈတဵၵ်းႁႂ်ႈ ႁိူဝ်းမိၼ် 48 လမ်း လႅၵ်ႈလၢႆႈၵႂႃႇ တီႈတႃႈႁိူဝ်းမိၼ် တၢင်ႇတီႈ ၼႆယဝ်ႉ။ တႃႈႁိူဝ်းမိၼ် ဢွၼ်တၢင်းသုတ်း သွင်တီႈၼၼ်ႉ မိူဝ်ႈၽုၵ်ႈ ပိုတ်ႇၶိုၼ်းသေတႃႉ ယွၼ်ႉဝႃႈ ၸဝ်ႈၼႃႈတီႈ ၽၢႆႇပၵ်းပိူင်မၢႆမီႈၶဝ် ၵႄႈၶႆ လူၺ်ႈ ၶူဝ်းၶွင် ဢၼ်လူႉလႅဝ်ၵႂႃႇ တီႈၼၼ်ႈလႄႈ ၸူႇၵူဝ်ႇသၵီႇ တိုၵ်ႉဢိုတ်းဝႆႉယူႇ ၼႆ ၽူႈတၢင်လၢတ်ႈ တႃႈႁိူဝ်းမိၼ် လၢတ်ႈတီႈ သိုဝ်ႇၶၢဝ်ႇ Interfax ၼင်ႇၼႆ။

ၼႂ်းလိူၼ်ၼႆႉ ပဵၼ်ပွၵ်ႈၵမ်းသွင် ဢၼ်ယူႇၶရဵၼ်း ယိုဝ်းသႂ်ႇ ရတ်ႈသျႃး လူၺ်ႈ ႁိူဝ်းမိၼ်တရူၼ်း ဢမ်ႇပႃးၵူၼ်း ၼႆယဝ်ႉ။ မိူဝ်ႈသႅပ်ႇထႅမ်ႇပႃႇ 1 ဝၼ်းၼၼ်ႉ သိုၵ်းရတ်ႈသျႃး လၢတ်ႈဝႃႈ ၶဝ်ႁႄႉႁၢမ်ႈလႆႈ ႁိူဝ်းမိၼ်တရူၼ်း ယူႇၶရဵၼ်း 158 လမ်း ဢၼ်မီးၼိူဝ် ၼႃႈလိၼ် ရတ်ႈသျႃး သိပ်းဢွင်ႈတီႈလိူဝ်လိူဝ်ၼၼ်ႉသေ ဢၼ်သိုဝ်ႇၶၢဝ်ႇ ရတ်ႈသျႃးၶဝ် လၢတ်ႈဝႃႈ ပဵၼ်လွင်ႈဢၼ် ႁိူဝ်းမိၼ်တရူၼ်း ယူႇၶရဵၼ်း ယိုဝ်းသႂ်ႇ ယႂ်ႇသုတ်း ၸဵမ်မိူဝ်ႈ ပၢင်တိုၵ်း တႄႇပဵၼ်မႃးၼၼ်ႉၼႆယဝ်ႉ။ ၶွမ်ႇမတီႇ ၵူတ်ႇထတ်း မိူင်းရတ်ႈသျႃး ပိုၼ်ၽၢဝ်ႇ လွင်ႈၵူတ်ႇထတ်း လိူင်ႈဢၼ်ၶဝ် လၢတ်ႈဝႃႈ ပဵၼ်လွင်ႈၵေႃႇၵၢၼ်ႁၢႆႉ ၼႆယဝ်ႉ။

ၽၢႆႇထႅင်ႈတၢင်းၼိုင်ႈ ရတ်ႈသျႃး ဢဝ်မၢၵ်ႇၼူၾႆး မၢၵ်ႇလူင် ဢၼ်ၼမ်းတၢင်း လႄႈ ႁိူဝ်းမိၼ် ဢၼ်ဢမ်ႇပႃးၵူၼ်းၶတ်းၼၼ်ႉ ယိုဝ်းသႂ်ႇ မိူင်းယူႇၶရဵၼ်းသေ ၵူၼ်းမိူင်း လႆႈတၢႆၵႂႃႇ 10,000 ၵေႃႉလိူဝ် ၼႆယဝ်ႉ။

မိူင်းယူႇၶရဵၼ်းၼႆႉ လႆႈၸႂ်ႉငိုၼ်းၼမ် တႃႇႁဵတ်းဢွၵ်ႇ ႁိူဝ်းမိၼ် Drone ၼႂ်းမိူင်းသေ ၶႂၢၵ်ႈပၼ် တၢင်းၵႆ ႁိူဝ်းမိၼ် Drone ၊ မၼ်းၸႂ်ႉတိုဝ်း ႁိူဝ်းမိၼ် Drone blitzes တႃႇတေ ႁဵတ်းႁႂ်ႈ ၶိူင်ႈသိုၵ်း ရတ်ႈသျႃး တူၵ်းလိုၼ်းသေ ႁဵတ်းႁႂ်ႈ တူင်ႇဝူင်းၵူၼ်း ရတ်ႈသျႃး ၵူၼ်ႇပင်း လႄႈ ႁဵတ်းႁႂ်ႈ ၶရႅမ်ႇလိၼ်ႇ တူၵ်းသုမ်း ၼႆယဝ်ႉ။

ၽူႈမီးပုၼ်ႈၽွၼ်း မိူင်းယူႇၶရဵၼ်းၶဝ် ၼႄးဝႃႈ ၶိူင်ႈၵွင်ႈၵၢင်ႇ ဢၼ်ၽူႈႁူမ်ႈၼႃႈၵၢၼ် မိူင်းဝၼ်းတူၵ်းၶဝ် ပၼ်ၵႂၢမ်းမၼ်ႈဝႆႉၼၼ်ႉ ဢမ်ႇတဵမ်ထူၼ်ႈၸွမ်း ဢၼ်သိုၵ်းယူႇၶရဵၼ်းၶဝ် လူဝ်ႇၼၼ်ႉသေ ၵႆႉႁွတ်ႈမႃး ဝၢႆးသေ ပၼ်ၵႂၢမ်းမၼ်ႈဝႆႉ ႁိုင်ၼၢၼ်းၼၼ်ႉယဝ်ႉ။ ၸွမ်ပွင်ၸိုင်ႈ ဝေႃႇလေႃႇတီးမႃးရ် ၸႄးလႅၼ်းသၵီး တိုၵ်းသူၼ်း ၶွမ်ႇပၼီႇ ၽၢႆႇၵႅတ်ႇၶႄ ႁႂ်ႈႁဵတ်းဢွၵ်ႇ ၶူဝ်းၶွင် ၼမ်လိူဝ်မႃး ၼႆယဝ်ႉ။

တီႈၼႃႈသိုၵ်း ဢၼ်ၵႆ 1,000 ၵီႇလူဝ်ႇမီႇတႃႇ (600 လၵ်း) ၼၼ်ႉ သိုၵ်းယူႇၶရဵၼ်းၶဝ် တိုၵ်းတေႃး တပ်ႉသိုၵ်းရတ်ႈသျႃး ဢၼ်ယႂ်ႇလိူဝ် လႄႈ မီးၶိူင်ႈၵွင်ႈၵၢင်ႇ လီလိူဝ်ၼၼ်ႉယဝ်ႉ။ သွင်ၽၢႆႇၼႆႉ ပိူင်လူင်မၼ်း ၶႄႉၶဵင်ႇၵၼ် တီႈၼႃႈလိၼ် Donetsk မိူင်းယူႇၶရဵၼ်း ပွတ်းဢွၵ်ႇသေ တိုၵ်းၵၼ် ၵွပ်ႈပိူဝ်ႈ ဝဵင်းလႄႈ ဝၢၼ်ႈ ဢၼ်လႆႈထုၵ်ႇ ပွႆႇမၢၵ်ႇသႂ်ႇၼၼ်ႉသေ မိူဝ်ႈလိူၼ်ပူၼ်ႉမႃးၼၼ်ႉ မိူင်းယူႇၶရဵၼ်း ႁတ်းႁၢၼ်သေ ၶဝ်ႈတိုၵ်း ၼႃႈလိၼ် လႅၼ်လိၼ် Kursk မိူင်းရတ်ႈသျႃးၼၼ်ႉယဝ်ႉ။

တီႈဝဵင်းမွတ်ႇသၵူဝ်ႇ မိူဝ်ႈၶမ်ႈဝႃးၼၼ်ႉ ၶိူင်ႈမိၼ် ဢၼ်ဢမ်ႇမီးၵူၼ်းၶတ်းၼၼ်ႉ တူၵ်းသႂ်ႇၼိူဝ် ႁိူၼ်းသုၼ်ႇတူဝ် ဢၼ်မီးတီႈ ၼွၵ်ႈဝဵင်းၼၼ်ႉသေတႃႉ ဢမ်ႇမီးၽႂ် လႆႈမၢတ်ႇၸဵပ်းသင် ၼႆ ၽူႈၵွၼ်းဝဵင်း Sergei Sobyanin လၢတ်ႈၼႄၼင်ႇၼႆ။ မၼ်းၼပ်ႉသွၼ်ႇ ႁိူဝ်းမိၼ် ဢၼ်ဢမ်ႇမီးၵူၼ်းၶတ်း ဢၼ်ၵႂႃႇၸူး ဝဵင်းမွတ်ႇသၵူဝ်ႇၼၼ်ႉ လႆႈထုၵ်ႇ ၸုမ်းၵႅတ်ႇၵင်ႈၵၢင်ႁၢဝ်ၶဝ် ယိုဝ်းတူၵ်း မိူဝ်ႈၶဝ် ၸမ်တေထိုင် ဝဵင်းၼၼ်ႉ သိပ်းလမ်းလိူဝ်လိူဝ်ယဝ်ႉ။

ပေႃးဢဝ်တင်းမူတ်းဝႃႈၸိုင် ႁွင်ႈၵၢၼ်ၽၢႆႇၵႅတ်ႇၵင်ႈ မိူင်းရတ်ႈသျႃး လၢတ်ႈဝႃႈ ၶဝ် “ႁႄႉႁၢမ်ႈ လႄႈ ယႃႉလူႉ” ႁိူဝ်းမိၼ်တရူၼ်း ယူႇၶရဵၼ်း 144 လမ်း ဢၼ်မီးၼိူဝ် ၼႃႈလိၼ် ရတ်ႈသျႃး 9 တီႈ ပႃးၸဵမ် ဢၼ်မီးတီႈ လႅၼ်လိၼ် မိူင်းယူႇၶရဵၼ်း လႄႈ ဢၼ်မီးၼႂ်းမိူင်းရတ်ႈသျႃး လိုၵ်ႉလိုၵ်ႉလမ်ႇလမ်ႇၼၼ်ႉ ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၽူႈမီးပုၼ်ႈၽွၼ်း မိူင်းယူႇၶရဵၼ်းၶဝ်တႄႉ လႆႈထဵင်ၶိုၼ်း တႃႇပၼ် ၵႂၢမ်းမၢႆထိုင် ၼိူဝ် လွင်ႈၼႆႉယူႇ။

ၼႂ်းပၢင်တိုၵ်းတႄႇမႃးၼႆႉ ဝဵင်းမွတ်ႇသၵူဝ်ႇ လႄႈ ပိုၼ်ႉတီႈႁိမ်းႁွမ်းမၼ်း ၵႆႉလႆႈထုၵ်ႇ တိုၵ်းယိုဝ်း။

မိူဝ်ႈလိူၼ်မေႇ 2023 ၼၼ်ႉ ၽူႈမီးပုၼ်ႈၽွၼ်း ရတ်ႈသျႃးၶဝ် လၢတ်ႈဝႃႈ ယူႇၶရဵၼ်း ၶတ်းၸႂ်ဢဝ် ႁိူဝ်းမိၼ် ဢမ်ႇပႃးၵူၼ်းသေ တိုၵ်းတေႃး ၶရႅမ်ႇလိၼ်ႇသေ ႁဵတ်းႁႂ်ႈ လင်ၶႃးႁေႃ ဢၼ်ပႃး တီႈယူႇ ၽူႈမီးပုၼ်ႈၽွၼ်း ပူႇတိၼ်ႇ ဢၼ်ၼိုင်ႈၼၼ်ႉ လူႉလႅဝ်ၵႂႃႇ ဢိတ်းဢွတ်းၼႆယဝ်ႉ။

မိူဝ်ႈလိူၼ်ဢေႃးၵၢတ်ႉ ပီ 2023 ၼၼ်ႉ ႁိူဝ်းမိၼ် ဢမ်ႇပႃးၵူၼ်း မႃးယိုဝ်း ၸႄႈဝဵင်းၵၢၼ်ပၢႆးမၢၵ်ႈမီး ဢၼ်မီးၸိုဝ်ႈသဵင် တီႈဝဵင်းမွတ်ႇသၵူဝ်ႇၼၼ်ႉ ႁဵတ်းႁႂ်ႈ ၽၵ်းတူႁူးလႅင်း ဢၼ်မီးတီႈ တိူၵ်ႈသုင်ၼၼ်ႉ တႅၵ်ႇၵွႆသေ မၢၼ်ႇ တူၵ်းလူင်းၵႂႃႇ ၼိူဝ်သဵၼ်ႈတၢင်း ႁဵတ်းႁႂ်ႈ ၵူၼ်းမိူင်း မွတ်ႇသၵူဝ်ႇ ဢမ်ႇၼိမ်သဝ်း။ လွင်ႈတိုၵ်းတေႃးၵၼ်ၼႆႉ ႁဵတ်းႁႂ်ႈ လွင်ႈၵႅတ်ႇၶႄလူမ်း ၼႂ်းဝဵင်းလႄႈ ၼႂ်းပိုၼ်ႉတီႈ မီးလွင်ႈၶွင်ႉၶမ်မႃး။

ၽွင်းၼၼ်ႉ တပ်ႉၵၢင်ႁၢဝ် ယူႇၶရဵၼ်းၶဝ် လၢတ်ႈဝႃႈ ၶိုၼ်းလဵဝ် ရတ်ႈသျႃး ပွႆႇႁိူဝ်းမိၼ် Shahed Drone 46 လမ်း လႄႈ မၢၵ်ႇၼူၾႆး 2 လမ်း တီႈယူႇၶရဵၼ်း ၼႆယဝ်ႉ။ တပ်ႉၵၢင်ႁၢဝ်ၶဝ်တႄႉ လၢတ်ႈဝႃႈ လႆႈယိုဝ်းတူၵ်းလူင်း ႁိူဝ်းမိၼ် Drone 36 လမ်း ဝႃႈၼႆယဝ်ႉ။

ငိူၼ်ႈငဝ်ႈၶၢဝ်ႇ

• The Associated Press. "A woman is killed near Moscow as over 140 Ukrainian drones target Russia, officials say" — AP News, September 10, 2024
• Emily Crane. "Over 140 Ukrainian drones target multiple Russian regions, including Moscow, authorities say" — New York Post, September 10, 2024
• Associated Press. "Over 140 Ukrainian drones target Russia, killing at least 1 person and injuring 8, officials say" — PBS NewsHour, September 10, 2024