မုၼ်ၸဝ်ႈၽူပ်ႉ ယွၼ်းသူး တီႈပွႆးဢီႇသတႃႇ တွၼ်ႈတႃႇ မိူင်းၸိူဝ်းထူပ်းလွင်ႈသုၵ်ႉယုင်ႈ

ဝၼ်းၸၼ်၊ ဢေႇပရႄႇ 1၊ 2024 

မုၼ်ၸဝ်ႈၽူပ်ႉ ၾရၼ်ႇသိသ်ႉ

တီႈပၢင်ပွႆးယွၼ်းသူး ပွႆးဢီႇသတႃႇ ဝၼ်းဢႃးတိတ်ႉ ဢၼ်ၸတ်းႁဵတ်းတီႈ ပၢင်ႇသဵင်ႉပီႇတႃႇ ၼၼ်ႉ မုၼ်ၸဝ်ႈၽူပ်ႉ Francis လႆႈမွၵ်ႇလၢတ်ႈယွၼ်းသူး ႁႂ်ႈလွင်ႈသုၵ်ႉယုင်ႈလူၵ်ႈၵမ်ႇၽႃႇ ယဝ်ႉတူဝ်ႈသေ ႁႂ်ႈမီးလွင်ႈငမ်းယဵၼ်မႃး ဝႃႈၼႆယဝ်ႉ။

မၼ်းလႆႈ တိုၵ်းသူၼ်းၵႂႃႇ တႃႇႁႂ်ႈၵိုတ်းတိုၵ်းတီး ၵႃႇၸႃႇ တႃႇႁႂ်ႈလႅၵ်ႈလၢႆႈၵူၼ်းတူၵ်းၶွၵ်ႈသေဢမ်ႇၵႃး ၸိူဝ်းပဵၼ် ရတ်ႈသျႃး၊ ယူႇၶရဵၼ်း၊ သီးရီးယႃး၊ လႄႇပႃႇၼွၼ်ႇ၊ ႁေးတီႇ၊ ဢႃႇၾရိၵ လႄႈ လွင်ႈရူဝ်ႇႁိၼ်ႇၵျႃႇ သေဢမ်ႇၵႃး မိူင်းမျၢၼ်ႇမႃႇ ဢၼ်လႆႈလုလႅဝ်ယူႇ ယွၼ်ႉပိူဝ်ႈ လွင်ႈသုၵ်ႉယုင်ႈၼႂ်းမိူင်း ၼၼ်ႉၵေႃႈ ႁႂ်ႈပေႃးလႆႈလီၶိုၼ်းၵႂႃႇ ၸိူဝ်းၼႆႉယဝ်ႉ။

ပွႆးယွၼ်းသူးဢီႇသတႃႇ ဢၼ်ႁဵတ်းမိူဝ်ႈ ႁူဝ်ၶမ်ႈ ဝၼ်းသဝ်ၼၼ်ႉ မုၼ်ၸဝ်ႈၽူပ်ႉ လႆႈၶိုၼ်ႈႁွတ်ႈ ယွၼ်းသူးႁိုင် သွင်ၸူဝ်ႈမူင်းၶိုင်ႈသေ တီႈ ပၢင်ပွႆးဢီႇသတႃႇ ဝၼ်းဢႃးတိတ်ႉၼၼ်ႉၵေႃႈ လႆႈႁၼ် မုၼ်ၸဝ်ႈၽူပ်ႉ ပၢႆးယူႇလီၶႅမ်ႉလႅပ်ႈဝႆႉယူႇ။ မုၼ်ၸဝ်ႈၽူပ်ႉၼႆႉ မိူဝ်ႈမၼ်းတိုၵ်ႉဢွၼ်ႇ ယွၼ်ႉလႆႈဢဝ် ပွတ်ႇမၼ်းဢွၵ်ႇဝႆႉၵမ်ႈၽွင်ႈလႄႈ ပေႃးဝႃႈထိုင်ၶၢဝ်းၵတ်းမႃး မၼ်းလႆႈပၼ်ႁႃ ဢၼ်ၵဵဝ်ႇၵပ်း လွတ်ႇလူမ်းထူၺ်ႈၸႂ်ၼၼ်ႉယဝ်ႉ။

ႁၢင်ႈႁေႃဝႃႇတီႇၵၼ်ႇဝႃႈ ၵူၼ်းဢၼ်ၶိုၼ်ႈႁွတ်ႈမႃးတီႈ ပၢင်ပွႆးယွၼ်းသူး ဝၼ်းဢႃးတိတ်ႉၼၼ်ႉ တေမီးမွၵ်ႈ 3 မိုၼ်ၼႆႉ ၼႆယဝ်ႉ။ ဝၼ်းပွႆးဢီႇသတႃႇ ဢၼ်ပဵၼ်ပွႆးသႃႇသၼႃႇ တွၼ်ႈတႃႇ ၸၢဝ်းၶရိတ်ႉယၢၼ်ႇၼႆႉ မၼ်းပဵၼ် ဝၼ်းမၢႆတွင်း ဝႃႈ ဝၢႆးသေ ၸဝ်ႈၶရိတ်ႉ ထုၵ်ႇတၢင်ႇတီႈၼိူဝ်လၵ်းသေ ၶႃႈတၢႆယဝ်ႉ ပဵၼ်တူဝ်ၶိုၼ်းမႃးၼႆသေ ဢွၼ်ၵၼ် ယုမ်ႇယမ်ႁဵတ်းပွႆးမၢႆတွင်းၼင်ႇၼႆယဝ်ႉ။

ငိူၼ်ႈငဝ်ႈတိုၼ်း

• Agence France-Presse. "Pope Francis Presides Over Easter Sunday Mass" — VOA News, March 31, 2024
• VOA News. "အီစတာဝတ်ပြုပွဲမှာ မြန်မာနဲ့ပဋိပက္ခကြုံနိုင်ငံတွေအတွက် ပုပ်ရဟန်းမင်း ဆုတောင်း" — VOA News, April 1, 2024
• Deborah Castellano Lubov. "Pope Francis presides at Mass on Easter Sunday" — Vatican News, April 1, 2024