Wikinews

ယူႇၶရဵၼ်း ပိုၼ်ၽၢဝ်ႇဝႃႈ ႁိူဝ်းမိၼ်တိုၵ်း F-16 လမ်း႞ တူၵ်းၵႂႃႇ

ဝၼ်းသုၵ်း၊ ဢေႃးၵၢတ်ႉ 30၊ 2024

လိၵ်ႈႁွမ်တွမ် ၸိူဝ်းၵဵဝ်ႇၵပ်း

<dynamicpagelist> category=ပိုၼ်ဢွၵ်ႇယဝ်ႉ category=ယူႇၶရဵၼ်း notcategory=disputed notcategory=no publish namespace=Main addfirstcategorydate=true count=5 </dynamicpagelist>

ဢွင်ႈတီႈ ယူႇၶရဵၼ်း
ႁူမ်ႈသၢင်ႈ!
ယူႇၶရဵၼ်း
ယူႇၶရဵၼ်း
ႁိူဝ်းမိၼ်တိုၵ်း F-16

တပ်ႉၵၢင်ႁၢဝ် ယူႇၶရဵၼ်း လၢတ်ႈဝႃႈ ႁိူဝ်းမိၼ်တိုၵ်း F-16 ဢၼ်ၶဝ်လႆႈႁပ်ႉမႃးတီႈ ၸုမ်းဢူၺ်းလီ မိူင်းဝၼ်းတူၵ်းၶဝ် တႃႇတေၵႅတ်ႇၵင်ႈ ရတ်ႈသျႃးၼၼ်ႉ လမ်း႞ လႆႈတူၵ်းၵႂႃႇၼႆယဝ်ႉ။

ႁိူဝ်းမိၼ်တိုၵ်းၵျႅတ်ႉ ဢၼ်ၼႆႉ လႆႈတူၵ်းၵႂႃႇ မိူဝ်ႈဝၼ်းၸၼ် ဝၼ်းဢၼ်ၽၢႆႇရတ်ႈသျႃးၶဝ် ဢဝ်မၢၵ်ႇၼူၾႆး၊ တရူၼ်းၸိူဝ်းၼႆႉ တိုၵ်းတေႃးမႃးႁၢဝ်ႈႁၢဝ်ႈႁႅင်းႁႅင်းၼၼ်ႉသေ လႆႈလၢတ်ႈဝႆႉတီႈ ၼႃႈလိၵ်ႈၾဵတ်ႉပုၵ်ႉၶ် တပ်ႉသိုၵ်းယူႇၶရဵၼ်းသေ လွင်ႈဢၼ်ဝႃႈ လႆႈသုမ်း ႁိူဝ်းမိၼ်တိုၵ်း F-16 လမ်း႞ တီႈယူႇၶရဵၼ်းဢၼ်ဝႃႈၼၼ်ႉ ၼႆႉပဵၼ် ၶေႃႈပိုၼ်ၽၢဝ်ႇ ပွၵ်ႈဢွၼ်တၢင်းသုတ်းယဝ်ႉ။ ႁိူဝ်းမိၼ်တိုၵ်းၵျႅတ်ႉၸိူဝ်းၼႆႉ ၽႅဝ်ႁွတ်ႈထိုင်ယူႇၶရဵၼ်းမႃး မိူဝ်ႈလိူၼ်ၸူႇလၢႆႇသဵင်ႈၼၼ်ႉယဝ်ႉ။ ထၢၼ်ၽွင်းလူင်ၵၢၼ်ၵႅတ်ႇၵင်ႈ ယူႇၶရဵၼ်းလၢတ်ႈဝႃႈ လွင်ႈဢၼ်ႁိူဝ်းမိၼ်တိုၵ်း လႆႈလုတူၵ်းၼၼ်ႉ တိုၵ်ႉၵူတ်ႇထတ်းယူႇ ဝႃႈၼႆယဝ်ႉ။

မိူဝ်ႈၸဝ်ႉဝၼ်းၽတ်းၼၼ်ႉ ၽၢႆႇသိုၵ်းယူႇၶရဵၼ်းၶဝ် ပိုၼ်ၽၢဝ်ႇဝႃႈ တပ်ႉသိုၵ်းရတ်ႈသျႃးၶဝ် ပွႆႇႁိူဝ်းမိၼ် Drone 74 လမ်း လႄႈ မၢၵ်ႇၼူၾႆး 3 လုၵ်ႈသေ တပ်ႉၵၢင်ႁၢဝ် ယူႇၶရဵၼ်းသမ်ႉ ယိုဝ်းတူၵ်း 60 လမ်း ၼႆယဝ်ႉ။ ႁိူဝ်းမိၼ် Drone ၸိူဝ်းၼႆႉ ႁွင်ႉဝႃႈ Chakasi ၊ တီႇၼီႇပရူဝ်ႇ ပႅတ်ႉထရူဝ်ႇ၊ ၻူဝ်ႇၼႅတ်ႉသၵ်ႊ ယဝ်ႉၵေႃႈ မၼ်းလၢတ်ႈဝႃႈ လႆႈယႃႉပႅတ်ႈ တီႈၸႄႈတွၼ်ႈၶႃႇသၢၼ်ႇ လႄႈ သူႇမီႇ ၼႆယဝ်ႉ။ ဝဵင်းလူင်ယူႇၶရဵၼ်း ၵိပ်ႉၾ်ၵေႃႈ ၼႂ်းၶၢဝ်းတၢင်း 4 ဝၼ်းၼႆႉ လႆႈထူပ်းၺႃး ႁိူဝ်းမိၼ် Drone 3 ပွၵ်ႈ ၼႆ ၽူႈမီးပုၼ်ႈၽွၼ်း ယူႇၶရဵၼ်းၶဝ် လၢတ်ႈၼႄၼင်ႇၼႆ။

မိူင်းယူႇၶရဵၼ်း တုၵ်းယွၼ်း ႁႂ်ႈတပ်ႉသိုၵ်းယူႇၶရဵၼ်း ၸႂ်ႉတိုဝ်း ၶိူင်ႈၵွင်ႈၵၢင်ႇ ဢၼ်မိူင်းဝၼ်းတူၵ်းၶဝ် ပၼ်ဝႆႉၼၼ်ႉသေ ၶဝ်ႈတိုၵ်း ဢွင်ႈတီႈသိုၵ်း ဢၼ်မီးၼႂ်းၼႃႈလိၼ် ရတ်ႈသျႃးၼၼ်ႉ ၼႆယဝ်ႉ။ ၽွင်းလူင် ၵၢၼ်ၼွၵ်ႈမိူင်း မိူင်းယူႇၶရဵၼ်း Dmytro Kuleba လၢတ်ႈတီႈ ၽူႈသိုဝ်ႇၶၢဝ်ႇၶဝ် ဢွၼ်တၢင်း ပၢင်ၵုမ် ၽွင်းလူင် ၵၢၼ်ၼွၵ်ႈမိူင်း ၸုမ်းၽွမ်ႉႁူမ်ႈယူးရူပ်ႉ တီႈဝဵင်း Brussels မိူဝ်ႈဝၼ်းၽတ်းၼၼ်ႉ ၼႆယဝ်ႉ။ ယင်းလၢတ်ႈထႅင်ႈဝႃႈ ယိူင်းဢၢၼ်းပိူင်လူင်မၼ်းတႄႉ ပိူဝ်ႈတႃႇၶဝ်ႈတိုၵ်းတပ်ႉပၢင်သဝ်း ဢၼ်ရတ်ႈသျႃးၶဝ် ပွႆႇၶိူင်ႈမိၼ် ယိုဝ်းမၢၵ်ႇယူႇၶရဵၼ်းၼၼ်ႉ ၼႆယဝ်ႉ။ သိုပ်ႇလၢတ်ႈထႅင်ႈဝႃႈ သင်ဝႃႈ ၸုမ်းဢူၺ်းလီ မိူင်းဝၼ်းတူၵ်းၶဝ် ပၼ်မၢၵ်ႇၼူၾႆး တဵမ်ထူၼ်ႈသေ ပၼ်ၶႂၢင်ႉၶဝ် ၶဝ်ႈတိုၵ်းၼႆၸိုင် ငဝ်းလၢႆးၼႂ်းပၢင်တိုၵ်းၼႆႉ တေလီမႃးယူႇ ၼႆယဝ်ႉ။

မိူဝ်ႈဝၼ်းသုၵ်းၼၼ်ႉ ထၢၼ်ၽွင်းလူင် ၽၢႆႇၵႅတ်ႇၵင်ႈ မိူင်းရတ်ႈသျႃး ပိုၼ်ၽၢဝ်ႇဝႃႈ ယိုဝ်းလႆႈ ႁိူဝ်းမိၼ် Drone ဢၼ်ယူႇၶရဵၼ်း ပွႆႇၵႂႃႇ 6 လမ်း ၼႆယဝ်ႉ။


ငိူၼ်ႈငဝ်ႈၶၢဝ်ႇ

မႄးထတ်း
ဢဝ်ၶိုၼ်းမႃးတီႈ "https://shn.wikinews.org/w/index.php?title=ယူႇၶရဵၼ်း_ပိုၼ်ၽၢဝ်ႇဝႃႈ_ႁိူဝ်းမိၼ်တိုၵ်း_F-16_လမ်း႞_တူၵ်းၵႂႃႇ&oldid=2432"