ယွၼ်ႉၼမ်ႉထူမ်ႈၼႂ်းမိူင်းထႆးသေ ၵူၼ်းတၢႆ မီးမႃး 22 ၵေႃႉ
ဝၼ်းၸၼ်၊ ဢေႃးၵၢတ်ႉ 26၊ 2024
.svg)
မိူဝ်ႈၼႆႉ ဝၼ်းတီႈ 26/08/2019 ၸဝ်ႈၼႃႈတီႈၽၢႆႇၽေးၵိုင်ႉၵၢင်ႉ ပိုၼ်ၽၢဝ်ႇဝႃႈ ယွၼ်ႉၾူၼ်တူၵ်းႁၢဝ်ႈႁႅင်း ၼႂ်းမိူင်းထႆးသေ ၼႂ်းၶၢဝ်းတၢင်းလၢႆဝၼ်းၼႆႉ ၵူၼ်းတၢႆ ဢမ်ႇယွမ်း 22 ၵေႃႉ။ ယဝ်ႉၵေႃႈ ပၼ်ၾၢင်ႉဝႃႈ ၼႂ်းဝူင်ႈၼႆႉ တေ ၸၢင်ႈပဵၼ်လႆႈ လွင်ႈၼမ်ႉထူမ်ႈထႅင်ႈ ၼႆယဝ်ႉ။
ၼႂ်းၶၢဝ်းတၢင်း 10 ဝၼ်းၼႆႉ ယွၼ်ႉၾူၼ်တူၵ်းႁႅင်းလႄႈ ၵူၼ်းမၢတ်ႇၸဵပ်း ဢမ်ႇယွမ်း 19 ၵေႃႉသေ ၼႂ်း 13 ၸႄႈဝဵင်း လင်ႁိူၼ်းၵူၼ်း 30,000 လိူဝ် လႆႈထူပ်းၽေးၼမ်ႉထူမ်ႈ ယူႇတီႈႁွင်ႈၵၢၼ်ၾၢႆႇႁႄႉၵင်ႈၽေးၵိုင်ႉၵၢင်ႉ ပိုၼ်ၽၢဝ်ႇဝႆႉၼင်ႇၼႆ။
မိူဝ်ႈဝူင်ႈပူၼ်ႉမႃးၼၼ်ႉ လိၼ်ၵူၼ်ႇပင်း တီႈပွၵ်ႉၵူၼ်းယူႇသဝ်း တီႈၵုၼ်ၽူႊၵဵတ်ႇ ဢၼ်ပဵၼ်တီႈလိုဝ်ႈသဝ်း ဢၼ်ၵူၼ်းထႆး သူင်ၸႂ်ၼၼ်ႉ ၵူၼ်းတၢႆ 13 ၵေႃႉ ပႃးၸဵမ်ၵူၼ်းမိူင်းမၢၼ်ႈ 9 ၵေႃႉ ၼႆယဝ်ႉ။
တေႃႇထိုင်ဝၼ်းသုၵ်းၼႆႉ ၼႂ်းမိူင်းထႆး ပွတ်းႁွင်ႇလႄႈ ၸဵင်ႇႁွင်ႇဝၼ်းဢွၵ်ႇ တႃႇ 31 ၸႄႈဝဵင်း လႆႈထူပ်းၽေးၼမ်ႉထူမ်ႈ။ ႁွင်ႈၵၢၼ်ၾၢႆႇႁႄႉၵင်ႈၽေးၵိုင်ႉၵၢင်ႉၵေႃႈ ပၼ်ၾၢင်ႉထိုင် ၽူႈမီးပုၼ်ႈၽွၼ်း ၼႂ်းပိုၼ်ႉတီႈဝႃႈ ႁႂ်ႈပႂ်ႉတူၺ်းငဝ်းလၢႆးၾိင်ႈၾႃႉရႃႇသီႇလႅၵ်ႈလၢႆႈ လီလီသေ ႁႂ်ႈမီးလွင်ႈၾၢင်ႉသတိ ဝႃႈၼႆ။
ၸဝ်ႈၼႃႈတီႈၼႂ်းပိုၼ်ႉတီႈ လႆႈပၼ်ၾၢင်ႉဝႆႉဝႃႈ ၸိူဝ်းယူႇၸွမ်းၶႅပ်ႇဝဵင်းၵုင်းထဵပ်ႈလႄႈ ၸွမ်းၽင်ႇၼမ်ႉၸိူဝ်းၼၼ်ႉၵေႃႈ ႁႂ်ႈၶၢႆႉၵႂႃႇယူႇတီႈလွႆသုင် ဝႃႈၼႆ။ ႁွင်ႈၵၢၼ်ၾၢႆႇၾိင်ႈၾႃႉရႃႇသီႇ ပၼ်ၾၢင်ႉၵူၼ်းမိူင်းဝႃႈ ႁႂ်ႈပႂ်ႉတူၺ်း ၶေႃႈပၼ်ၾၢင်ႉၾိင်ႈၾႃႉရႃႇသီႇ ယူႇတႃႇသေႇ။
ငိူၼ်ႈငဝ်ႈၶၢဝ်ႇ
မႄးထတ်း- Reuters. "Thailand warns against severe floods that killed 22" — Reuters, August 26, 2024
- AFP - Agence France Presse. "Thailand Flash Floods After Heavy Rains Kill 22" — Barrons, August 26, 2024
