ရတ်ႈသျႃး ႁၢင်ႈႁႅၼ်းတႃႇတေတွပ်ႇတႅၼ်း လွင်ႈယူႇၶရဵၼ်း တိုၵ်းတေႃး
ဝၼ်းသဝ်၊ ဢေႃးၵၢတ်ႉ 10၊ 2024
တွၼ်ႈတႃႇႁႄႉႁၢမ်ႈ လွင်ႈဢၼ် ၽၢႆႇယူႇၶရဵၼ်း ၶဝ်ႈတိုၵ်းၼႂ်း ရတ်ႈသျႃးၼၼ်ႉ လူင်ပွင်ၸိုင်ႈ ရတ်ႈသျႃး လၢတ်ႈဝႃႈ မိူဝ်ႈၼႆႉ လႆႈတူင်ႉၼိုင် ၽဵဝ်ႈမူၺ်ႉ ၸုမ်းၵေႃႇၵၢၼ်ႁၢႆႉ တီႈလႅၼ်လိၼ် 3 တီႈ ဝႃႈၼႆယဝ်ႉ။
ၽူႈပႂ်ႉတူၺ်း လွတ်ႈလႅဝ်း မိူင်းယူႇၶရဵၼ်းၶဝ် လၢတ်ႈဝႃႈ မိူဝ်ႈဝၼ်းဢႃးတိတ်ႉၼၼ်ႉ တပ်ႉသိုၵ်းယူႇၶရဵၼ်း ဢမ်ႇတင်ႈၸႂ်သေ ၶၢမ်ႈလႅၼ်လိၼ် ၶဝ်ႈၵႂႃႇၼႂ်း ၼႃႈလိၼ် Kursk မိူင်းရတ်ႈသျႃး ပွတ်းတူၵ်းသေ ၶိုၼ်ႈၵႂႃႇ လၢႆလၢႆၵီႇလူဝ်ႇမီႇတႃႇ ၼႆယဝ်ႉ။ ၼင်ႇႁိုဝ် တပ်ႉသိုၵ်းယူႇၶရဵၼ်း တေဢမ်ႇၶိုၼ်ႈမႃးၼၼ်ႉ ၽၢႆႇရတ်ႈသျႃးၶဝ် လႆႈ လႆႈၽိူမ်ႉထႅမ် ၵႃးတႅင်ႉ၊ ႁႅင်းသိုၵ်း ပႃးၸဵမ် ၶိူင်ႈပွႆႇမၢၵ်ႇၼူၾႆး လႄႈ တပ်ႉၵၢင်ႁၢဝ် ၼႆယဝ်ႉ။
ၶွမ်ႇမတီႇ ၽဵဝ်ႈမူၺ်ႉ ၵၢၼ်ၵေႃႇၵၢၼ်ႁၢႆႉ မိူင်းရတ်ႈသျႃး လၢတ်ႈမိူဝ်ႈဝၼ်းသုၵ်းၼၼ်ႉဝႃႈ ၼင်ႇႁိုဝ် တေၵႅတ်ႇၶႄ လွင်ႈႁူမ်ႇလူမ်ႈ ၵူၼ်းမိူင်းရတ်ႈသျႃး လႄႈ တေႁူမ်ႇငမ်း လွင်ႈလွၵ်ႇငိူတ်ႈ ၸုမ်းၽူႈၶဵၼ်ၶဝ်ၼၼ်ႉ လႆႈပိုတ်ႇၽုၺ်ႇ ၵၢၼ်ၽဵဝ်ႈမူၺ်ႉ ၸုမ်းၵေႃႇၵၢၼ်ႁၢႆႉ တီႈၸႄႈမိူင်း Belgorod, Bryansk, Kursk ဝႆႉဝႃႈၼႆယဝ်ႉ။
ၸွမ်းၼင်ႇပၵ်းပိူင်မိူင်းရတ်ႈသျႃးၼၼ်ႉ ၽၢႆႇသိုၵ်းလႄႈ ၽၢႆႇႁူမ်ႇလူမ်ႈၶဝ် ၸႂ်ႉတိုဝ်းလႆႈ ဢႃႇၼႃႇၶိုၵ်ႉၶၵ်ႉ ၽွင်းမိူဝ်ႈ ႁဵတ်းၵၢၼ်ၽဵဝ်ႈမူၺ်ႉ ၸုမ်းၵေႃႇၵၢၼ်ႁၢႆႉၼၼ်ႉယူႇ။
ၼႂ်းၶၢဝ်းယၢမ်းႁဵတ်းၵၢၼ်ၼၼ်ႉ ႁၢမ်ႈတၢပ်ႈလွင်ႈတူင်ႉၼိုင်၊ ၸၢင်ႈသိမ်းဢဝ်လူတ်ႉၵႃး၊ ၸၢင်ႈပႂ်ႉတူၺ်းၾူၼ်း၊ ႁႄႉႁၢမ်ႈ ဢၼ်ၵႂႃႇၼႂ်းပိုၼ်ႉတီႈ၊ တင်ႈလၢၼ်ႇၵူတ်ႇထတ်းသေ တိူဝ်းပၼ်လွင်ႈႁူမ်ႇလူမ်ႈ တီႈဢၼ်လမ်ႇလွင်ႈၼၼ်ႉ ပဵၼ်လွင်ႈၵႆႉပဵၼ် ဝႃႈၼႆယဝ်ႉ။
ငိူၼ်ႈငဝ်ႈၶၢဝ်ႇ
မႄးထတ်း- Jaroslav Lukiv. "Russia in 'counter-terror' mode over Ukraine attack" — BBC News, August 10, 2024
- Paula Andrés. "Russia rushes reinforcements to border regions raided by Ukraine" — Politico Europe, August 10, 2024
- AFP. "Russia Evacuates Tens of Thousands Amid Ukraine Incursion" — The Moscow Times, August 10, 2024
- Tass. "Russia launches counterterrorism measures in Kursk Region" — TASS, August 10, 2024
- Agence France-Presse. "Russia Launches "Counter-Terror Operation" To Stop Advancing Ukraine Troops" — NDTV, August 10, 2024
