ရူဝ်ႇႁိၼ်ႇၵျႃႇ ၸိူဝ်းဢမ်ႇမီးလၵ်းထၢၼ်သင် မွၵ်ႈ 60 ၵေႃႉ လႆႈထုၵ်ႇၺွပ်း တီႈ မိူင်းထႆး

ဝၼ်းၽတ်း၊ တီႇသႅမ်ႇပႃႇ 21၊ 2023 

ပလိၵ်ႈၵူတ်ႇတူၺ်း ရူတ်ႉ တီႈသဵၼ်ႈတၢင်း ၵဵင်းႁၢႆး (ၶႅပ်းႁၢင်ႈၵဝ်ႇ)

ၸုမ်းပလိၵ်ႈသဵၼ်ႈတၢင်းလူင် လႆႈပိုၼ်ၽၢဝ်ႇဝႃႈ ပလိၵ်ႈထႆးၶဝ် လႆႈတိၺွပ်း ရူဝ်ႇႁိၼ်ႇၵျႃႇ မွၵ်ႈ 60 ၵေႃႉ ၸိူဝ်းဢၼ်ပႃးမႃး တီႈၼိူဝ်လူတ်ႉဢွၼ်ႇ ႁေႃမႃးၽႂ်ၽႂ်း တီႈၼိူဝ် သဵၼ်ႈတၢင်းလူင်ဢေးသျႃး တီႈၼႂ်း ၸႄႈဝဵင်းၽၼူမ်းဝၼ်း ၸႄႈတွၼ်ႈ ၽထလုင်း တီႈ မိူင်းထႆးပွတ်းၸၢၼ်းၼၼ်ႉၼႆယဝ်ႉ။ လၢတ်ႈဝႃႈ ၶဝ်ၸိူဝ်းၼၼ်ႉ ပဵၼ်ၵူၼ်းၸိူဝ်းဢၼ်လုၵ်ႉတီႈ ပၢင်သဝ်းၵူၼ်းပၢႆႈၽေး ဢၼ်မီးတီႈ လႅၼ်လိၼ် မျၢၼ်ႇမႃႇ-ပင်းၵလႃးတဵတ်ႇ ၼၼ်ႉသေ ႁွတ်ႈၽႅဝ်မႃးထိုင်တီႈ မိူင်းထႆး ဝႃႈၼႆယဝ်ႉ။

မိူဝ်ႈ တီႇသႅမ်ႇပႃႇ 19 ဝၼ်း ယၢမ်း ၵၢင်ၶမ်ႈ 11 မူင်းၼၼ်ႉ မီးလူတ်ႉဢွၼ်ႇသၢမ်လမ်း ႁေႃမႃးၽႂ်းၽႂ်း တီႈၼိူဝ် သဵၼ်ႈတၢင်းလူင်ဢေးသျႃး တီႈၼႂ်းၸႄႈဝဵင်းၽၼူမ်းဝၢၼ်၊ ၸႄႈတွၼ်ႈ ၽထလုင်း ၼၼ်ႉလႄႈ ၸဝ်ႈၼႃႈတီႈ ၽၢႆႇႁူမ်ႇလူမ်ႈၶဝ် လႆႈထၢင်ႇထိူမ်သေ ၸွမ်းလမ်းတိၺွပ်းႁေၵေႃႈ လႆႈတိၺွပ်းၺႃးလႆႈ လုၵ်ႈဢွၼ်ႇ ဢိၵ်ႇတင်း ၼၢင်းယိင်း ရူဝ်ႇႁိၼ်ႇၵျႃႇ 58 ၵေႃႉလႄႈ ၼၢႆးၼႃႈၵူၼ်း 3 ၵေႃႉ ယဝ်ႉ။

ၽၢႆႇပလိၵ်ႈ သဵၼ်ႈတၢင်းလူင် လႆႈပိုၼ်ၽၢဝ်ႇဝႆႉဝႃႈတႄႉ တိၺွပ်း ၵူၼ်းမူႇသလိမ်ႇ ၸိူဝ်းဢမ်ႇမီးလၵ်းထၢၼ်သင် ၸိူဝ်းဢၼ်ၸွမ်းမႃႈၼိူဝ်ရူတ်ႉဢွၼ်ႇ ၵူၼ်းၸၢႆး 25 ၵေႃႉ၊ ၵူၼ်းယိင်း 26 ၵေႃႉ လႄႈ လုၵ်ႈဢွၼ်ႇ ၸဵတ်းၵေႃႉ ႁူမ်ႈ 58 ၵေႃႉ ဝႃႈၼႆယဝ်ႉ။ လိူဝ်သေၼၼ်ႉဢမ်ႇၵႃး ၵူၼ်းႁေႃႈရူတ်ႉ 3 ၵေႃႉ လႄႈ ၼၢႆးၼႃႈၵႃႉၵူၼ်း 3 ၵေႃႉၵေႃႈ ထုၵ်ႇတိၺွပ်းပႃးသေ တိုၵ်ႉသိုပ်ႇၵူတ်ႇထၢမ်ၶဝ်ဝႆႉယူႇ ဝႃႈၼႆယဝ်ႉ။

ရူဝ်ႇႁိၼ်ႇၵျႃႇ ၸိူဝ်းႁွတ်ႈၽႅဝ်ဝႆႉယူႇတီႈ ပၢင်သဝ်းၵူၼ်းပၢႆႈၽေး ဢၼ်မီးယူႇတီႈ လႅၼ်လိၼ် မျၢၼ်ႇမႃႇ-ပင်းၵလႃးတဵတ်ႇ ၼၼ်ႉ ယွၼ်ႉပိူဝ်ႈ လွင်ႈၵိၼ်လွင်ႈယႅမ်ႉ လႄႈ ၵၢၼ်ငၢၼ်း ယၢပ်ႇယဵၼ်းၶၢၼ်ၸႂ်လႄႈ ၸင်ႇလႆႈၸုၼ်ႉသေပၢႆႈဢွၵ်ႇၸူး မိူင်းယူႇႁိမ်းၵိၼ်ၸမ် ၸိူဝ်းပဵၼ် မိူင်းထႆး၊ မလေးသျႃး၊ ဢိၼ်ႇတူဝ်ႇၼီးသျႃး ၸိူဝ်းၼႆႉယဝ်ႉၼႆ ၼၢႆႇဢႃႇလီႇ ဢၼ်ပဵၼ်တီႈ ၸုမ်း BRAT(BURMESE ROHINGA ASSOCIATION IN THAILAND) ဢၼ်ၸွႆႈထႅမ် လွင်ႈရူဝ်ႇႁိၼ်ႇၵျႃႇ တီႈမိူင်းထႆး လႆႈမွၵ်ႇလၢတ်ႈဝႃႈၼၼ်ယဝ်ႉ။

"လႆႈထူပ်းတၢင်းယၢပ်ႇၽိုတ်ႇၸိူင်ႉႁိုဝ် ဢၼ်ဝႃႈၼၼ်ႉတႄႉ ပေႃးဢမ်ႇၶႂ်ႈၸၢင်ႈလၢတ်ႈယဝ်ႉ။ ၵူၼ်းတီႈ ၽၢႆႇရၶႅင်ႇ တင်းသဵင်ႈၼႆႉ လႆႈထူပ်းတၢင်းယၢပ်ႇၽိုတ်ႇ လွင်ႈၵိၼ်လွင်ႈယႅမ်ႉယူႇ။ သင်ၵေႃႈ ၵႃႈၶၼ်ယႂ်ႇ။ ပၢင်တိုၵ်းၵေႃႈပဵၼ်ဝႆႉယူႇ။ တႃႇၵႂႃႇၸူး ဝၢၼ်ႈၼၼ်ႉဝၢၼ်ႈၼႆႉၵေႃႈ ၵႂႃႇဢမ်ႇလႆႈ။ ၵၢတ်ႇၵေႃႈ ဢမ်ႇၸၢင်ႈၵႂႃႇ။ ပႃၵေႃႈ ဢမ်ႇၸၢင်ႈၵႂႃႇၺွပ်း။ တႃႇၵႂႃႇႁဵတ်းၵၢၼ်ၼႂ်းဝဵင်းၵေႃႈ ဢမ်ႇၵႂႃႇလႆႈ။ ပေႃးပဵၼ်ၼၼ် ၵူၼ်းတေႁဵတ်းႁိုဝ်ယူႇယဝ်ႉ။"

ၽၢႆႇၸုမ်းပလိၵ်ႈၶဝ် ပိုၼ်ၽၢဝ်ႇဝႃႈ ၸွမ်းလူၺ်ႈ လွင်ႈၶဝ်ယိုၼ်လၢတ်ႈဝႃႈ ၶဝ်ၸိူဝ်းၼၼ်ႉ လုၵ်ႉတီႈ လႅၼ်လိၼ် မျၢၼ်ႇမႃႇ-ပင်းၵလႃးတဵတ်ႇ သေ ၶဝ်ႈမႃးယဝ်ႉ တေဢၢၼ်းၵႂႃႇထိုင် လႅၼ်လိၼ် ထႆး-မလေး ဝႃႈၼႆယဝ်ႉ။

ငၢႆးၼၼ်ႉၼင်ႇၵဝ်ႇ မိူဝ်ႈ တီႇသႅမ်ႇပႃႇ 19 ဝၼ်းၼၼ်ႉၵေႃႈ တီႈၼႂ်ႈ ၸႄႈတွၼ်ႈႁၢတ်ႇယႂ်ႇၼၼ်ႉ တိၺွပ်းလႆႈ ရူဝ်ႇႁိၼ်ႇၵျႃႇ 15 ၵေႃႉယဝ်ႉ။ ၵူၼ်းၸိူဝ်းၵႃႉၵူၼ်း ဢၼ်မႃးၸွမ်းသဵၼ်ႈတၢင်း ဢမ်ႇပဵၼ်တၢင်းၵၢၼ်သေ ၶဝ်ႈမႃးၼႂ်းမိူင်းထႆးၼႆႉ ၵူႈဝၼ်းၵူႈဝၼ်းၼႆႉ မီး ဢၢၼ်ႇႁူဝ်သိပ်း တေႃႇ ႁူဝ်ပၢၵ်ႇမၼ်းသေ မၢင်းၸိူဝ်းၵေႃႈ မႃးၸွမ်းႁိူဝ်း၊ မႃးၸိူဝ်းၵေႃႈ မႃးၸွမ်းရူတ်ႉသေ မၢင်ၸိူဝ်းၵေႃႈ ပႆတိၼ်မႃး လႄႈ ၼႂ်းလိူၼ် တီႇသႅမ်ႇပႃႇၼႆႉၵေႃႈ တင်းၸိူဝ်းတိၺွပ်းၺႃး ဢမ်ႇတိၺွပ်းၺႃးၼႆႉ ပေႃးႁူမ်ႈၵၼ် တေမီး ႁူဝ်ႁဵင်မၼ်း ဝႃႈၼႆယဝ်ႉ။

"ၼႂ်းလိူၼ်ၼႆႉၵေႃႈ တီႈဢေႇသုတ်းမၼ်း မႃးယူႇ မွၵ်ႈ သီႇႁႃႈႁဵင်ယဝ်ႉ။ မႃးတီႈဢိၼ်ႇတူဝ်ႇၼီးသျႃး၊ တီႈမလေးသျႃး တီႈထႆး ၸိူဝ်းၼႆႉယူႇ။ ၸိူဝ်းထုၵ်ႇတိၺွပ်းၺႃးၼႆႉ ပဵၼ်တီႈ မိူင်းထႆးၵမ်ႉၼမ်ယဝ်ႉ။ ၸိူဝ်းမႃးၸွမ်း ႁိူဝ်းတႄႉ ၵႂႃႇၸူး ဢိၼ်ႇတူဝ်ႇၼီးသျႃး၊ ၵႂႃႇၸူး မလေးသျႃးယဝ်ႉ။ ၸိူဝ်းမႃႈၸွမ်းႁိူဝ်းတႄႉ လူင်ပွင်ၸိုင်ႈထႆးၶဝ် ဢမ်ႇပေႃးတိၺွပ်းယဝ်ႉ။"

မိူဝ်ႈၼႂ်းလိူၼ်ဢွၵ်ႇထူဝ်ႇပႃႇၼၼ်ႉ ၸုမ်းပလိၵ်ႈၶဝ် လႆႈတိၺွပ်း ရူတ်ႉသွင်လမ်း တီႈ ၸႄႈတွၼ်ႈၽထလုင်း ၸိုင်ႈထႆးပွတ်းၸၢၼ်းၼၼ်ႉသေ လႆႈတိၺွပ်း ရူဝ်ႇႁိၼ်ႇၵျႃႇ 21 ၵေႃႉ ၸိူဝ်းဢမ်ႇမီးလၵ်းထၢၼ်သင် ၸိူဝ်းဢၼ်တေၵႂႃႇ မလေးသျႃးၼၼ်ႉယဝ်ႉ။

မိူဝ်ႈ လိူၼ်ဢေႇပရႄႇ 4 ဝၼ်းၼၼ်ႉၵေႃႈ ၸုမ်းပလိၵ်ႈ သဵၼ်ႈတၢင်းလူင် လႆႈတိၺွပ်း ရူဝ်ႇႁိၼ်ႇၵျႃႇ 89 ၵေႃႉ ဢၼ်မႃးၸွမ်းၵႃးသၢမ်လမ်း တဵမ်ပိၵ်း တီႈ ၸႄႈတွၼ်ႈၸွမ်ၽူၼ်း တီႈ ၸိုင်ႈထႆးပွတ်းၸၢၼ်းၼၼ်ႉယဝ်ႉ။ မိူဝ်ႈလိူၼ်မၢတ်ႉၶျ် 16 ဝၼ်းၼၼ်ႉၵေႃႈ ရူဝ်ႇႁိၼ်ႇၵျႃႇ 40 ပၢႆ ၸိူဝ်းလုၵ်ႉတီႈ ၸႄႈမိူင်းရၶႅင်ႇ မိူင်းမျၢၼ်ႇမႃႇ မႃးၼၼ်ႉ ထုၵ်ႇဝႆႉပႅတ်ႉ တီႈၼႂ်း သူၼ်ရႃႇပႃႇဢၼ်ၼိုင်ႈ တီႈ ၼၶွၼ်းသီထမ်မရၢတ်ႉ တီႈ ၸိုင်ႈထႆး ပွတ်းၸၢၼ်းၼၼ်ႉလႄႈ ၸုမ်းၽၢႆႇႁူမ်ႇလူမ်ႈ ပိုၼ်ႉတီႈၶဝ် လႆႈတိၺွပ်းၶဝ်ဝႆႉယဝ်ႉ။

ငိူၼ်ႈငဝ်ႈတိုၼ်း

• Nattapong Westwood. "Phatthalung highway police intercept 58 illegal immigrants from Bangladesh" — The Thaiger, December 21, 2023

• VOA News. "ထိုင်းနိုင်ငံတွင်း အထောက်အထားမဲ့ရိုဟင်ဂျာ ၆၀ နီးပါး ဖမ်းဆီးခံရ" — VOA News, December 21, 2023