ဢိတ်ႇသရေး တိူဝ်းတိုၵ်းတေႃး သီးရီးယႃးပွတ်းႁွင်ႇ

ဝၼ်းသဝ်၊ မၢတ်ႉၶျ် 30၊ 2024 

လႅၼ်လိၼ် ဢိတ်ႇသရေး လႄႈ လႄႇပႃႇၼွၼ်ႇ

တႄႇဢဝ် ႁႃးမၢတ်ႉသ်ၶဝ် ၶဝ်ႈတိုၵ်း ဢိတ်ႇသရေး မိူဝ်ႈဢွၵ်ႇထူဝ်ႇပႃႇ 7 ဝၼ်းၼၼ်ႉယဝ်ႉသေ ဢိတ်ႇသရေးၼႆႉ လႆႈတိုၵ်းတေႃး တီႈၵႃႇၸႃႇ၊ ဢိၵ်ႇတင်း Hezbollah ဢၼ်မီးတီႈ သီးရီးယႃးပွတ်းႁွင်ႇ လႄႈ တပ်ႉလုၵ်ႉၽိုၼ်ႉဢီႇရၢၼ်း IRGC ၸိူဝ်းၼႆႉယူႇသေ မိူဝ်ႈဝၼ်းသုၵ်းၼၼ်ႉတႄႉ လႆႈဢဝ် ႁိူဝ်းမိၼ်သေ တိူဝ်းတိုၵ်းတီႈ လႄႇပႃႇၼွၼ်ႇ ၼၼ်ႉယဝ်ႉ။

ဢီႇရၢၼ်း လႄႈ ၸုမ်းၸိူဝ်းလႆႈၸႂ်ၶဝ်ၼႆႉ ၶဝ်ဢဝ်တီႈယူႇဝႆႉတီႈ တီႈ ဢလႅတ်ႇပူဝ်ႇ လႄႈ ဝဵင်းလူင်တမတ်ႉသၵတ်ႉ ဢိၵ်ႇတင်း တီႈပတ်ႉပိုၼ်ႉမိူင်းသီးရီးယႃးယဝ်ႉ။ ဢိတ်ႇသရေးၶဝ် တိုၵ်း တႃႈႁိူဝ်းမိၼ်ၵူႈမိူင်းမိူင်း ဢၼ်မီးတီႈ ဝဵင်း 2 ဝဵင်းၼႆႉမႃးယူႇတိၵ်းတိၵ်းသေ တႄႇဢဝ် ဢွၵ်ႇထူဝ်ႇပႃႇ 7 ဝၼ်းမႃး ယွၼ်ႉပိူဝ်ႈ ဢိတ်ႇသရေးၶဝ် ႁၢင်ႈသိုၵ်းႁၢဝ်ႈႁႅင်းမႃးလႄႈ ဢီႇရၢၼ်းၶဝ် ၶိုၼ်းႁွင်ႉဢဝ် ၽူႈမီးၸၼ်ႉ ထၢၼ်ႈသုင် မၼ်း ၸိူဝ်းမီးယူႇတီႈ သီးရီးယႃးၼၼ်ႉယဝ်ႉ။

ယွၼ်ႉ ဢိတ်ႇသရေး ဢဝ် ႁိူဝ်းမိၼ်တိုၵ်း မိူဝ်ႈၶၢဝ်းယၢမ်းၵၢင်ၼႂ် 2 မူင်းၼၼ်ႉလႄႈ လႆႈတိူဝ်ႉၶိူၵ်ႈ တီႈဢလႅတ်ႇပူဝ်ႇ လၢႆလၢႆတီႈသေ ၽူႈမီးပုၼ်ႈၽွင်း ၽၢႆႇတပ်ႉသိုၵ်းလႄႈ ၵူၼ်းမိူင်းတင်းၼမ် လႆႈတၢႆၵႂႃႇၼႆ ထၢၼ်ၽွင်းလူင် ၵၢၼ်ၵႅတ်ႇၵင်ႈ သီးရီးယႃး မွၵ်ႇလၢတ်ႈဝႃႈၼၼ်ယဝ်ႉ။

လိူဝ်သေၼၼ်ႉဢမ်ၵႃး လၢတ်ႈပႃးဝႃႈ ႁိူဝ်းမိၼ် လႄႈ ဢဝ်ပႃး တရုၼ်း သေ တိုၵ်းတေႃး Idlib လႄႈ ဢလႅတ်ႇပူဝ်ႇ ပွတ်းတူၵ်းၼၼ်ႉသေ ၸုမ်းၵေႃႇၵၢၼ်ႁၢႆႉၼႆႉ တိုၵ်းတေႃး ဢလႅတ်ႇပူဝ်ႇ လႄႈ ၵူၼ်းမိူင်း ၸိူဝ်းယူႇႁိမ်းႁွမ်းၼၼ်ႉ ဝႃႈၼႆ။

ၵပ်းၵၢႆႇလွင်ႈၼႆႉသေ တပ်ႉသိုၵ်းဢိတ်ႇသရေးတႄႉ ဢမ်ႇႁၼ်တုမ်ႉတွပ်ႇလၢတ်ႈၶိုၼ်းသေတႃႉ ၽူႈမီးသုၼ်ႇလၢတ်ႈ ထၢၼ်ၽွင်းလူင် ၵၢၼ်ၵႅတ်ႇၵင်ႈ မိူင်းဢီႇရၢၼ်း လၢတ်ႈထတ်းၼိူဝ် လွင်ႈဢိတ်ႇသရေး တိုၵ်းတေႃး သီးရီးယႃးၼၼ်ႉယူႇ။ ယွၼ်ႉလူၺ်ႈ လွင်ႈတိုၵ်းတေႃးၼႆႉသေ ၵူၼ်းမိူင်း သီးရီးယႃး 33 ၵေႃႉ လႄႈ ႁႅတ်ႉၸ်ပူဝ်ႇလႃႇ 5 ၵေႃႉ လႆႈတၢႆၵႂႃႇၼႆ ဢၢင်ႈဢိင်ၼိူဝ် ငိူၼ်ႈငဝ်ႈၶၢဝ်ႇႁူမ်ႇလူမ်ႈသေ ၶွင်ႉၶၢဝ်ႇရၢႆႉတႃႇ လႆႈတႅမ်ႈဝႆႉၼင်ႇၼၼ်ယဝ်ႉ။

ငိူၼ်ႈငဝ်ႈတိုၼ်း

• VOA News. "ဆီးရီးယားမြောက်ပိုင်း အစ္စရေးက အရှိန်မြှင့် တိုက်ခိုက်" — VOA News, March 30, 2024
• Laila Bassam, Maya Gebeily and Hatem Maher Reuters. "Israel kills Hezbollah rocket commander in punishing strikes on Syria and Lebanon" — USA Today, March 29, 2024
• Emanuel Fabian. "Israel kills top Hezbollah rocket commander in Lebanon; 5 others slain in Syria" — The Times of Israel, March 29, 2024