ဢိတ်ႇသရေး ပၼ်ၽၢင်ႉၵူၼ်းမိူင်း ႁႂ်ႈဢွၵ်ႇပၢႆႈ ယွၼ်ႉၶဝ် ယိုဝ်းသႂ်ႇ လႄႇပႃႇၼွၼ်ႇပွတ်းၸၢၼ်း

ဝၼ်းၸၼ်၊ သႅပ်ႇ​ထႅမ်ႇပႃႇ 23၊ 2024 

ဢိတ်ႇသရေး ဢဝ်မၢၵ်ႇပွႆႇသႂ်ႇတီႈ လႄႇပႃႇၼွၼ်ႇပွတ်းၸၢၼ်း

မိူဝ်ႈဝၼ်းၸၼ်ၼၼ်ႉ သိုၵ်းဢိတ်ႇသရေး တုၵ်းယွၼ်း ၵူၼ်းမိူင်း လႄႇပႃႇၼွၼ်ႇ ပွတ်းၸၢၼ်း ႁႂ်ႈၶၢႆႉဢွၵ်ႇ ႁိူၼ်းယေး လႄႈ ႁူင်းႁေႃ တၢင်ႇၸိူဝ်း ဢၼ်ၶဝ် လၢတ်ႈဝႃႈ ၸုမ်းႁႅꩡ်ႉပူဝ်းလႃႇ သိမ်းဝႆႉ ၶိူင်ႈၵွင်ႈၵၢင်ႇၼၼ်ႉ ၵမ်းလဵဝ်သေ လၢတ်ႈဝႃႈ ၶဝ် ႁဵတ်းသၢင်ႈ လွင်ႈယိုဝ်း ၸုမ်းယိပ်းၵွင်ႈၵၢင်ႇ ၵႂၢင်ႈၶႂၢင်ယူႇ ၼႆယဝ်ႉ။

ဢၼ်ၼႆႉ ပဵၼ်ၶေႃႈပၼ်ၽၢင်ႉ ပွၵ်ႈဢွၼ်တၢင်းသုတ်း ၼႂ်းၶၢဝ်းတၢင်း ပၢင်တိုၵ်း ဢၼ်ယႂ်ႇမႃး ဢမ်ႇထၢတ်ႇဢမ်ႇဝၢႆး ၸမ်ပီ႞ၼၼ်ႉသေ ပဵၼ်ဝၢႆးသေ မိူဝ်ႈဝၼ်းဢႃးတိတ်ႉၼၼ်ႉ လႆႈပိုတ်းယိုဝ်းၵၼ် ႁၢဝ်ႈႁႅင်းမႃးၼၼ်ႉယဝ်ႉ။ ၸုမ်းႁႅꩡ်ႉပူဝ်းလႃႇၶဝ် ပွႆႇမၢၵ်ႇလူင် မၢၵ်ႇၼူၾႆး လႄႈ ႁိူဝ်းမိၼ် ဢမ်ႇပႃးၵူၼ်း 150 လုၵ်ႈပၢႆ ၶဝ်ႈၵႂႃႇၼႂ်း ဢိတ်ႇသရေး ပွတ်းႁွင်ႇ တႃႇတေတွပ်ႇတႅၼ်း လွင်ႈဢၼ် ၽူႈၵွၼ်းသိုၵ်း ၸၼ်ႉသုင် ၵေႃႉ႞ လႄႈ ၵူၼ်းသိုၵ်း ၼပ်ႉႁူဝ်သိပ်းၵေႃႉ လႆႈတၢႆၵႂႃႇၼၼ်ႉယဝ်ႉ။

ဝၢၼ်ႈၼွၵ်ႈၼႃးပၢင်ႇ တီႈလႄႇပႃႇၼွၼ်ႇ ပွတ်းႁွင်ႇ ၼၼ်ႉတႄႉ ဢမ်ႇပႆႇမီးငဝ်းလၢႆး တႃႇတေဢွၵ်ႇၵႂႃႇၵမ်းလဵဝ်။

လွင်ႈဢၼ် ဢိတ်ႇသရေးၶဝ် တိုၵ်ႉတိုၵ်းတေႃး ၸုမ်းႁမၢသ်ႉ ပႃးလႅတ်ႈသတၢႆး တီႈၵႃႇၸႃႇသေ ၶတ်းၸႂ် တႃႇတေ ဢဝ်ၶိုၼ်း ၵူၼ်းၸိူဝ်း လႆႈထုၵ်ႇ တိၺွပ်းဝႆႉ မိူဝ်ႈၸုမ်းႁမၢသ်ႉၶဝ် တိုၵ်းတေႃး မိူဝ်ႈဝၼ်းတီႈ 7 လိူၼ်ဢွၵ်ႇထူဝ်ႇပႃႇၼၼ်ႉယူႇ။ ၸုမ်းႁႅꩡ်ႉပူဝ်းလႃႇ ပၼ်ၵႂၢမ်းမၼ်ႈဝႃႈ တေၽွမ်ႉႁူမ်ႈၵၼ်တင်း ပႃးလႅတ်ႈသတၢႆး လႄႈ ၸုမ်းႁမၢသ်ႉ ဢၼ်ပဵၼ်ၸုမ်းယိပ်းၵွင်ႈၵၢင်ႇ ဢၼ်ဢီႇရၢၼ်း ၵမ်ႉထႅမ်ၼၼ်ႉသေ တေသိုပ်ႇလွင်ႈတိုၵ်းယိုဝ်း​ၵႂႃႇၼႆသေ ၽၢႆႇဢိတ်ႇသရေးတႄႉ လၢတ်ႈဝႃႈ တေၶိုၼ်းႁဵတ်းႁႂ်ႈ လႅၼ်လိၼ် ယဵၼ်ၵႂႃႇၼႆယဝ်ႉ။

ၽူႈသိုဝ်ႇၶၢဝ်ႇ Associated Press တီႈမိူင်းလႄႇပႃႇၼွၼ်ႇ ပွတ်းၸၢၼ်းၶဝ် ပိုၼ်ၽၢဝ်ႇဝႃႈ မိူဝ်ႈဝၼ်းၸၼ်ၼၼ်ႉ လႆႈယိုဝ်းသႂ်ႇ တီႈလၢႆလၢႆတီႈ ႁၢဝ်ႈႁႅင်းသေ ပႃးၸဵမ်တီႈဢၼ်ၵႆယၢၼ် လႅၼ်လိၼ်ၼၼ်ႉ ၼႆယဝ်ႉ။

သိုဝ်ႇၶၢဝ်ႇ ၸိူဝ်ႉၸၢတ်ႈ မိူင်းလႄႇပႃႇၼွၼ်ႇ လၢတ်ႈဝႃႈ ဝၢႆးသေ တႄႇလႅၵ်ႈလၢႆႈ လွင်ႈလႅၵ်ႈလၢႆႈ မိူဝ်ႈလိူၼ်ဢွၵ်ႇထူဝ်ႇပႃႇၼၼ်ႉယဝ်ႉ လွင်ႈယိုဝ်းၵၼ်ၼႆႉ ပဵၼ်ပွၵ်ႈဢွၼ်တၢင်းသုတ်း တီႈၸႄႈမိူင်း Byblos ဢၼ်မီးတီႈ ၽၢႆႇႁွင်ႇ လႅၼ်လိၼ် ဢိတ်ႇသရေး-လႄႇပႃႇၼွၼ်ႇ မွၵ်ႈ 130 ၵီႇလူဝ်ႇမီႇတႃႇၼၼ်ႉယဝ်ႉ။ တီႈၼၼ်ႈတႄႉ ဢမ်ႇမီးလွင်ႈမၢတ်ႇၸဵပ်းသင်။ ဢိတ်ႇသရေးၶဝ်ၵေႃႈ ဢဝ်မၢၵ်ႇလူင် ယိုဝ်းသႂ်ႇ တီႈဢၼ် ၵူၼ်းလဵင်ႉဝူဝ်း ၵေႃႉ႞ လႆႈတၢႆၵႂႃႇသေ ၵူၼ်းၼႂ်းၼႃႈႁိူၼ်းၶဝ် သွင်ၵေႃႉ လႆႈမၢတ်ႇၸဵပ်း ၼႆယဝ်ႉ။ ၼႂ်းၼၼ်ႉ လၢတ်ႈဝႃႈ ၵူၼ်းမၢတ်ႇၸဵပ်း တင်းမူတ်း မီး 17 ၵေႃႉ ၼႆယဝ်ႉ။

ၽူႈမီးပုၼ်ႈၽွၼ်း ၽၢႆႇသိုၵ်း ဢိတ်ႇသရေး ၵေႃႉ႞ လၢတ်ႈဝႃႈ ဢိတ်ႇသရေးၶဝ် ဝႆႉၼၵ်းၼိူဝ် ၵၢၼ်တူင်ႉၼိုင် ၼိူဝ်ၵၢင်ႁၢဝ်သေ ဢမ်ႇမီးၽႅၼ်ၵၢၼ် တႃႇတေ တူင်ႉၼိုင် ၼိူဝ်လိၼ် ၵမ်းလဵဝ်ၼႆယဝ်ႉ။ ၽူႈမီးပုၼ်ႈၽွၼ်း ဢၼ်ဢမ်ႇၶႂ်ႈဢွၵ်ႇၸိုဝ်ႈ ၸွမ်းၼင်ႇ ပၵ်းပိူင်မၢႆမီႈၼၼ်ႉသေ လၢတ်ႈဝႃႈ လွင်ႈတိုၵ်းတေႃး ၼႆႉ ပဵၼ်တႃႇ ၵုမ်းထိင်း လွင်ႈဢၼ် ၸုမ်းႁႅꩡ်ႉပူဝ်းလႃႇ တေယိုဝ်းသႂ်ႇ ဢိတ်ႇသရေး ၼၼ်ႉၼႆယဝ်ႉ။

သိုဝ်ႇၶၢဝ်ႇ မိူင်းလႄႇပႃႇၼွၼ်ႇၶဝ် ဢွၵ်ႇၶၢဝ်ႇဝႃႈ ၵူၼ်းမိူင်း လႆႈႁပ်ႉလိၵ်ႈ ဢၼ်တိုၵ်းသူၼ်းဝႃႈ ႁႂ်ႈၶၢႆႉတီႈယူႇ တီႈႁူင်းႁေႃ ဢၼ်ၸုမ်းႁႅꩡ်ႉပူဝ်းလႃႇ သိမ်းဝႆႉ ၶိူင်ႈၵွင်ႈၵၢင်ႇၼၼ်ႉ တေႃႇထိုင် ၶၢဝ်းယၢမ်း ဢၼ်တေဢွၵ်ႇမႃးထႅင်ႈၼၼ်ႉ ၼႆယဝ်ႉ။

ၼႂ်းလိၵ်ႈဢႃႇရၢပ်ႉၼၼ်ႉ တႅမ်ႈဝႆႉဝႃႈ “သင်ဝႃႈ ၸဝ်ႈၵဝ်ႇ မီးၼႂ်းႁူင်းႁေႃ ဢၼ်မီးၵွင်ႈၵၢင်ႇ တႃႇၸုမ်းႁႅꩡ်ႉပူဝ်းလႃႇၼႆၸိုင် ႁႂ်ႈၶၢႆႉဢွၵ်ႇဝၢၼ်ႈ တေႃႇထိုင် ၶၢဝ်းယၢမ်း ဢၼ်လႆႈပိုၼ်ၽၢဝ်ႇထႅင်ႈၼၼ်ႉ” ၼႆယဝ်ႉ။

ၽွင်းလူင် ၽၢႆႇပိုၼ်ၽၢဝ်ႇ မိူင်းလႄႇပႃႇၼွၼ်ႇ Ziad Makary လၢတ်ႈဝႃႈ လုမ်းမၼ်း တီႈဝဵင်း Beirut ၼၼ်ႉ လႆႈႁပ်ႉၶၢဝ်ႇ ဢၼ်မၢႆဝႆႉ ဢၼ်လၢတ်ႈဝႃႈ ႁႂ်ႈၵူၼ်းမိူင်း ဢွၵ်ႇႁူင်းႁေႃၼၼ်ႉၼႆယဝ်ႉ။

မႃႇၵႃႇရီႇ လၢတ်ႈဝႃႈ “လွင်ႈၼႆႉ မၼ်းမႃးၼႂ်းၶွပ်ႇပိူင် ပၢင်တိုၵ်းပၢႆးၸႂ် ဢၼ်ၽူႈၶဵၼ်ၶဝ် ႁဵတ်းသၢင်ႈမႃးၼၼ်ႉ” ၼႆသေ တိုၵ်းသူၼ်း ၵူၼ်းမိူင်းဝႃႈ “ယႃႇပေပၼ်လွင်ႈၼႆႉ ၼမ်လိူဝ် ဢၼ်ထုၵ်ႇလီလႆႈ” ၼႆယဝ်ႉ။

လွင်ႈဝႃႈ ၶေႃႈၸီႉသင်ႇ ဢိတ်ႇသရေးၶဝ် တေတုမ်ႉတိူဝ်ႉၼၼ်ႉ တေမီးၵူၼ်းလၢႆၵေႃႉၼႆတႄႉ ဢမ်ႇလႆႈႁူႉၸွမ်းၵမ်းလဵဝ်။ တူင်ႇဝူင်းၵူၼ်း သွင်ၽၢႆႇလႅၼ်လိၼ် ၵမ်ႈၼမ် လႆႈပၢႆႈဢွၵ်ႇၵႂႃႇ ယွၼ်ႉ ၾႆးမႆႈၵၼ် ၶႂ်ႈဝႃႈၵူႈဝၼ်းၼၼ်ႉယဝ်ႉ။

ဢိတ်ႇသရေး ၼႄးဝႃႈ ၸုမ်းႁႅꩡ်ႉပူဝ်းလႃႇ လႅၵ်ႈလၢႆႈ တူင်ႇဝူင်းၵူၼ်း တီႈပွတ်းၸၢၼ်း တင်းမူတ်း ႁႂ်ႈပဵၼ် တပ်ႉပၢင်သဝ်း ၸုမ်းယိပ်းၵွင်ႈၵၢင်ႇ ဢၼ်မီး ၶိူင်ႈပွႆႇမၢၵ်ႇလူင် ဢၼ်လပ်ႉဝႆႉ လႄႈ ၶိူင်ႈၵေႃႇသၢင်ႈ တၢင်ႇၸိူဝ်း ၼႆယဝ်ႉ။ လွင်ႈၼၼ်ႉ ၸၢင်ႈႁဵတ်းႁႂ်ႈ မၼ်းႁဵတ်း ၵၢၼ်ယိုဝ်းမၢၵ်ႇ ဢၼ်ႁၢဝ်ႈႁႅင်းလိူဝ်ပိူၼ်ႈ ပႅၵ်ႉသမ်ႉဝႃႈ ဢမ်ႇမီးတပ်ႉလိၼ် ၶၢႆႉၶဝ်ႈမႃးသေတႃႉ ဝႃႈၼႆယဝ်ႉ။

ၽၢႆႇသိုၵ်းၶဝ်တႄႉ လၢတ်ႈဝႃႈ မိူဝ်ႈၸဝ်ႉဝၼ်းၸၼ်ၼၼ်ႉ ၶဝ်ယိုဝ်းသႂ်ႇ ဢွင်ႈတီႈ ၸုမ်းယိပ်းၵွင်ႈၵၢင်ႇ 150 လိူဝ်လိူဝ်ၼႆယဝ်ႉ။ ၵူၼ်းမိူင်း ၼႂ်းဝၢၼ်ႈလၢႆလၢႆဝၢၼ်ႈ တီႈမိူင်းလႄႇပႃႇၼွၼ်ႇ ပွတ်းၸၢၼ်းၼၼ်ႉ ပိုၼ်ၽႄၶႅပ်းႁၢင်ႈ ၼိူဝ်ၼႅင်ႈသိုဝ်ႇတူင်ႇဝူင်းၵူၼ်း ဢၼ်ၼႄလွင်ႈ ႁိူဝ်းမိၼ်ယိုဝ်း လႄႈ ၵွၼ်းၽႆးလမ် ဢၼ်ယႂ်ႇလူင်ၼၼ်ႉယဝ်ႉ။ ႁွင်ႈၵၢၼ်ၶၢဝ်ႇၸိူဝ်ႉၸၢတ်ႈ ဢၼ်လူင်ပွင်ၸိုင်ႈ ၵုမ်းၵမ်ၼၼ်ႉၵေႃႈ ပိုၼ်ၽၢဝ်ႇဝႃႈ လႆႈဢဝ်ႁိူဝ်းမိၼ် ယိုဝ်းသႂ်ႇ တီႈလၢႆလၢႆတီႈ ၼႆယဝ်ႉ။

မိူဝ်ႈဝၼ်းသုၵ်းၼၼ်ႉ ဢိတ်ႇသရေးၶဝ် ယိုဝ်းသႂ်ႇ ၶႅပ်ႇဝဵင်း Beirut သေ ၽူႈၵွၼ်းသိုၵ်း ႁႅꩡ်ႉပူဝ်းလႃႇ ၵေႃႉ႞ လႄႈ ၵူၼ်းသိုၵ်း သိပ်းၵေႃႉလိူဝ် ဢိၵ်ႇပႃး ၵူၼ်းမိူင်း ဢိၵ်ႇပႃး ၼၢင်းယိင်း လႄႈ လုၵ်ႈဢွၼ်ႇ ၼပ်ႉႁူဝ်သိပ်းၵေႃႉ လႆႈတၢႆၵႂႃႇ ၼႆယဝ်ႉ။

မိူဝ်ႈဝူင်ႈပူၼ်ႉမႃးၼၼ်ႉ ၶိူင်ႈၵပ်းသိုပ်ႇ ဢၼ်လုၵ်ႈၸုမ်း ႁႅꩡ်ႉပူဝ်းလႃႇၶဝ် ၸႂ်ႉတိုဝ်း ပိူင်လူင်မၼ်းၼၼ်ႉ တႅၵ်ႇၵႂႃႇ တီႈမိူင်းလႄႇပႃႇၼွၼ်ႇ လၢႆလၢႆတီႈသေ ၵူၼ်းတၢႆ 39 ၵေႃႉ လႄႈ ၵူၼ်းမၢတ်ႇၸဵပ်း 3,000 ပၢႆ ၼႆယဝ်ႉ။ မိူင်းလႄႇပႃႇၼွၼ်ႇတႄႉ ၼႄးဝႃႈ ပဵၼ်ဢိတ်ႇသရေး ႁဵတ်းလွင်ႈႁၢႆႉၸႃႉၼႆသေတႃႉ ဢိတ်ႇသရေးတႄႉ ဢမ်ႇမၵ်းမၼ်ႈ ဢမ်ႇပႄႇပႅတ်ႈ ပုၼ်ႈၽွၼ်းၶဝ်။

ဝၢႆးသေ ၸုမ်းႁႅꩡ်ႉပူဝ်းလႃႇၶဝ် ယိုဝ်းသႂ်ႇ ဢိတ်ႇသရေး မိူဝ်ႈဝၼ်းတီႈ 7 လိူၼ်ဢွၵ်ႇထူဝ်ႇပႃႇၼၼ်ႉ ဝၼ်း႞ယဝ်ႉ ၸုမ်းႁႅꩡ်ႉပူဝ်းလႃႇၶဝ် တႄႇယိုဝ်းသႂ်ႇ ဢိတ်ႇသရေး ဢၼ်ၶဝ်ဝႃႈ ပဵၼ်လွင်ႈၶတ်းၸႂ် တႃႇတေ ၵမ်ႉထႅမ် ၸုမ်းသိုၵ်းပႃႈလႅတ်ႈသတၢႆး တီႈၵႃႇၸႃႇၼၼ်ႉယဝ်ႉ။ ဢိတ်ႇသရေးၵေႃႈ ဢဝ်ႁိူဝ်းမိၼ် ယိုဝ်းတွပ်ႇတႅၼ်းၶိုၼ်းသေ ၼႂ်းၶၢဝ်းတၢင်း ပီ႞ပူၼ်ႉမႃးၼႆႉ ပၢင်တိုၵ်း ႁၢဝ်ႈႁႅင်းမႃး ဢမ်ႇထၢတ်ႇဢမ်ႇဝၢႆး။

ပၢင်တိုၵ်းၼႆႉ ႁဵတ်းႁႂ်ႈၵူၼ်းမိူင်းလႄႇပႃႇၼွၼ်ႇ လႆႈတၢႆၵႂႃႇ ၼပ်ႉႁူဝ်ပၢၵ်ႇ တီႈမိူင်းဢိတ်ႇသရေး ၼပ်ႉႁူဝ်သိပ်းၵေႃႉ လႄႈ ၵူၼ်းသွင်ၽၢႆႇလႅၼ်လိၼ် လႆႈပၢႆႈၽေးသိုၵ်း ၼပ်ႉႁူဝ်ႁဵင် ၼႆယဝ်ႉ။ ယဝ်ႉၵေႃႈ ႁဵတ်းႁႂ်ႈ ၽႆးမႆႈပႃႇ ဢၼ်ယႃႉလူႉ ၵၢၼ်ၽုၵ်ႇသွမ်ႈ လႄႈ ႁဵတ်းႁႂ်ႈ ၼႃႈလိၼ် ပဵၼ်ႁွႆးၸဵပ်း ၼႆယဝ်ႉ။

ဢိတ်ႇသရေး ပၼ်ၵႂၢမ်းမၼ်ႈဝႃႈ တေတဵၵ်းႁႂ်ႈ ၸုမ်းႁႅꩡ်ႉပူဝ်းလႃႇ ဢွၵ်ႇလႅၼ်လိၼ် ၼင်ႇႁိုဝ် ၵူၼ်းမိူင်းၶဝ် တေလႆႈပွၵ်ႈမိူဝ်းႁိူၼ်းယေးၶဝ်ၼႆသေ လၢတ်ႈဝႃႈ ၶဝ်ၶႂ်ႈႁဵတ်းၸွမ်း လၢႆးၵၢၼ်မိူင်းသေတႃႉ လႆႈပဵၼ်မႃးတႃႇၸႂ်ႉဢဵၼ်ႁႅင်းၼႆယဝ်ႉ။ ၸုမ်းႁႅꩡ်ႉပူဝ်းလႃႇ လၢတ်ႈဝႃႈ တေသိုပ်ႇတိုၵ်းတေႃး တေႃႇထိုင် တီႈၵႃႇၸႃႇ ၵိုတ်းတိုၵ်းၼႆသေတႃႉ ယွၼ်ႉဝႃႈ ပၢင်တိုၵ်း ၸမ်တေၶွပ်ႈတဵမ် ပီမၼ်းလႄႈ လွင်ႈၼၼ်ႉ မိူၼ်ႁၢင်ႈ ဢမ်ႇၸၢင်ႈႁဵတ်းလႆႈ ၼႆယဝ်ႉ။

ၸုမ်းယိပ်းၵွင်ႈၵၢင်ႇ ဢၼ်ၸုမ်းႁမၢသ်ႉ ဢွၼ်ႁူဝ်ၼၼ်ႉ ၶဝ်ႈတိုၵ်း မိူင်းဢိတ်ႇသရေး ပွတ်းႁွင်ႇ မိူဝ်ႈဢွၵ်ႇထူဝ်ႇပႃႇ 7 ဝၼ်းသေ လႆႈတၢႆၵႂႃႇ 1,200 ၵေႃႉ ၵမ်ႈၼမ်ပဵၼ်ၵူၼ်းမိူင်း လႄႈ လႆႈတိၺွပ်းဢဝ်ၵႂႃႇ ၵူၼ်း 250 ပၢႆ ၼႆယဝ်ႉ။ မိူဝ်ႈၵိုတ်းတိုၵ်း ၶၢဝ်းတၢင်းၼိုင်ႈဝူင်ႈ ၼႂ်းလိူၼ်ၼူဝ်ႇဝႅမ်ႇပႃႇၼၼ်ႉ လႆႈလွတ်ႈဢွၵ်ႇမႃးၵမ်ႈၽွင်ႈ။

ႁွင်ႈၵၢၼ်ၽၢႆႇပၢႆးယူႇလီ ၵႃႇၸႃႇ ဢၼ်ဢမ်ႇၸႅၵ်ႇၽႄ ၵူၼ်းမိူင်းလႄႈ ၵူၼ်းသိုၵ်း ၼႂ်းၵၢၼ်ၼပ်ႉသွၼ်ႇၼၼ်ႉ လၢတ်ႈဝႃႈ လွင်ႈတိုၵ်းတေႃး ဢိတ်ႇသရေးၼႆႉ ႁဵတ်းႁႂ်ႈ ၵူၼ်းမိူင်းပႃးလႅတ်ႈသတၢႆး လႆႈတၢႆၵႂႃႇ 41,000 ၵေႃႉလိူဝ်ၼႆယဝ်ႉ။ ၼႂ်းၼၼ်ႉ လၢတ်ႈဝႃႈ ၼၢင်းယိင်းလႄႈ လုၵ်ႈဢွၼ်ႇ မီးၶိုင်ႈလိူဝ်ဢိတ်းၼိုင်ႈ။ ဢိတ်ႇသရေးတႄႉ လၢတ်ႈဝႃႈ ၶဝ်ၶႃႈႁႅမ်တၢႆ ၸုမ်းယိပ်းၵွင်ႈၵၢင်ႇ 17,000 ၵေႃႉလိူဝ်ယဝ်ႉၼႆသေတႃႉ ဢမ်ႇၼႄလၵ်းထၢၼ်သင်။

ငိူၼ်ႈငဝ်ႈၶၢဝ်ႇ

• MELANIE LIDMAN and BASSEM MROUE. "Israel warns civilians to evacuate as it strikes wide swathes of southern Lebanon" — AP News, September 23, 2024