ဝီႇၶီႇၶၢဝ်ႇ

ၵၢၼ်ႇ တေၶၢႆ ၶိူင်ႈၵွင်ႈၵၢင်ႇသိုၵ်း ပၼ် ထၢႆႇဝၢၼ်း တႃႇ 2 ပီႇလီႇယၼ်ႇ တေႃႇလႃႇ

ဝၼ်းၸၼ်၊ ဢွၵ်ႇထူဝ်ႇပႃႇ 28၊ 2024

လွၵ်းလၢႆးႁႄႉၵင်ႈၵၢင်ႁၢဝ် NASAMS

မိူဝ်ႈဝၼ်းသုၵ်းၼၼ်ႉ ၽၢႆႇပႅၼ်ႇတၵူၼ်ႇ ပိုၼ်ၽၢဝ်ႇဝႃႈ လူင်ပွင်ၸိုင်ႈ ဢမႄႇရိၵၢၼ်ႇ ပၼ်ၶႂၢင်ႉ တႃႇတေၶၢႆပၼ် ၶိူင်ႈၵွင်ႈၵၢင်ႇသိုၵ်း တေႃႇမိူင်းထၢႆႇဝၢၼ်း ဢၼ်ၵိုင်ႇငိုၼ်းတေႃႇလႃႇ 2 ပီႇလီႇယၼ်ႇလိူဝ်ၼၼ်ႉယူႇ။ ၼႂ်းၼၼ်ႉ ပႃးၸဵမ် လွင်ႈဢဝ် ၶိူင်ႈၵႅတ်ႇၵင်ႈၵၢင်ႁၢဝ် ဢၼ်ၶိုတ်းၵၢပ်ႈ ဢၼ်လႆႈၸၢမ်းတူၺ်း တီႈမိူင်းယူႇၶရဵၼ်းၼၼ်ႉ သူင်ႇပၼ်ၸူး မိူင်းထၢႆႇဝၢၼ်း ပွၵ်ႈဢွၼ်တၢင်းသုတ်းၼၼ်ႉယဝ်ႉ။

ဢမႄႇရိၵၢၼ်ႇ ဢမ်ႇႁပ်ႉႁွင်း ထၢႆႇဝၢၼ်း ပဵၼ်မိူင်းဢၼ်ထုၵ်ႇမႅၼ်ႈၸွမ်းပၵ်းပိူင် ၽၢႆႇၵၢၼ်မိူင်းသေတႃႉ၊ တႃႇတေၵႅတ်ႇၶႄႁႄႉၵင်ႈ မိူင်းထၢႆႇဝၢၼ်း ဢၼ်ၶႄႇဝႃႈ ပဵၼ်ၶွင်ၶဝ်ၼၼ်ႉ ဢမႄႇရိၵၢၼ်ႇၶဝ် တမ်းဝၢင်းမၢႆမီႈ ၵမ်ႈၽွင်ႈဝႆႉယူႇ။

ၶႄႇၵေႃႈ တိူဝ်းတဵၵ်းတဵင် မိူင်းထၢႆႇဝၢၼ်း ၼမ်မႃးသေ မိူဝ်ႈဝူင်ႈပူၼ်ႉမႃးၼႆႉၵွႆး ၶႄႇ လႆႈၽိုၵ်းၽွၼ်ႉ ၵၢၼ်သိုၵ်း ၸွမ်းၵုၼ်ထၢႆႇဝၢၼ်း ၼမ်မႃးထႅင်ႈ။ ဝၢႆးသေ လိူၼ်မေႇ ၸွမ်ၸိုင်ႈ လၢႆႇၸိင်ႇတေႇ ႁပ်ႉပုၼ်ႈၽွၼ်း ၸွမ်ပွင်ၸိုင်ႈ မိူင်းထၢႆႇဝၢၼ်းယဝ်ႉ မိူင်းၶႄႇ ၽိုၵ်းၵၢၼ်သိုၵ်း တီႈမိူင်းထၢႆႇဝၢၼ်းၼႆႉ ပွၵ်ႈၼႆႉ ပဵၼ်ပွၵ်ႈၵမ်းသွင်ယဝ်ႉ။

ၼႂ်းၵႃႈ ၶိူင်ႈသိုၵ်း ဢမႄႇရိၵၢၼ်ႇ ဢၼ်ၶၢႆပၼ် မိူင်းထၢႆႇဝၢၼ်း ၵမ်းလိုၼ်းသုတ်းၼၼ်ႉ ပႃးဝႆႉ ၶိူင်ႈၸၢၵ်ႈ မၢၵ်ႇၼူၾႆး ဢၼ်ၵိုင်ႇငိုၼ်း တေႃႇလႃႇ 1,160 လၢၼ်ႉ လႄႈ ၶိူင်ႈၸၢၵ်ႈ ရေႇတႃႇ ဢၼ်ၵိုင်ႇငိုၼ်း 828 လၢၼ်ႉတေႃႇလႃႇ ၼႆယဝ်ႉ။

ထၢၼ်ၽွင်းလူင် ၵၢၼ်ၵႅတ်ႇၵင်ႈ မိူင်းထၢႆႇဝၢၼ်းၵေႃႈ ႁပ်ႉတွၼ်ႈ လွင်ႈဢၼ် ဢမႄႇရိၵၢၼ်ႇ တေၶၢႆၶိူင်ႈၵွင်ႈၵၢင်ႇၸိူင်ႉၼႆၼၼ်ႉယူႇ။ ႁွင်ႈၵၢၼ်ၽၢႆႇၵႅတ်ႇၵင်ႈ မိူင်းထၢႆႇဝၢၼ်းၵေႃႈ လၢတ်ႈဝႃႈ လွင်ႈဢၼ် လႆႈၶႂၢင်ႉၶၢႆ ၶိူင်ႈၵႅတ်ႇၵင်ႈၵၢင်ႁၢဝ် NASAMS ဢၼ်လႆႈၸၢမ်းတူၺ်း တီႈမိူင်းယူႇၶရဵၼ်းၼၼ်ႉ တေၸွႆႈထႅမ် ၼမ်ႉၵတ်ႉၵႅတ်ႇၵင်ႈၵၢင်ႁၢဝ် မိူင်းထၢႆႇဝၢၼ်း ဢၼ်လႆႈႁူပ်ႉထူပ်း လွင်ႈလွၵ်ႇငိူတ်ႈ ၽၢႆႇသိုၵ်း မိူင်းၶႄႇၼၼ်ႉ တင်းၼမ်ၼႆယဝ်ႉ။

သိုၵ်းထၢႆႇဝၢၼ်း တိုၵ်ႉထႅမ်ႁႅင်း ၶိူင်ႈၵွင်ႈၵၢင်ႇ ႁႂ်ႈလီလိူဝ်ၵဝ်ႇ တႃႇတေ ၶၢမ်ႇလႆႈ လွင်ႈၶႄႇ တိုၵ်းယိုဝ်း ဢၼ်လႂ်သေဢမ်ႇဝႃႈ ဢိၵ်ႇပႃး လွင်ႈႁဵတ်းဢွၵ်ႇ ႁိူဝ်းလမ်ၼမ်ႉ ႁင်းၶေႃ တႃႇၵႅတ်ႇၶႄ သၢႆတၢင်း ဢၼ်လမ်ႇလွင်ႈ တႃႇၵမ်ႉၸွႆႈ ၵၢၼ်ၵႃႉၶၢႆ ၼိူဝ်ၼမ်ႉၼၼ်ႉယူႇ။

ၶႄႇ ဢမ်ႇႁၼ်လီၼိူဝ် လၢႆး ဢၼ်ဝႃႈ ပဵၼ်ၽူႈၽၢတ်ႇဢွၵ်ႇၼႆသေ ဢမ်ႇယွမ်းႁပ်ႉ လွင်ႈဢၼ်မၼ်း ၵႆႉၵႆႉ ႁွင်ႉဢုပ်ႇဢူဝ်းၵၼ်ၼၼ်ႉယဝ်ႉ။ လၢႆး ဢမ်ႇယွမ်းႁပ်ႉ လွင်ႈဢၼ် ပိူၺ်ႇၵျိင်း လၢတ်ႈဝႃႈ ၵူၼ်းမိူင်းထၢႆႇဝၢၼ်း ၵူၺ်း တေတႅပ်းတတ်းလႆႈ လွင်ႈမိူဝ်းၼႃႈၶဝ်ၼႆယဝ်ႉ။

မိူဝ်ႈဝၼ်းဢႃးတိတ်ႉၼၼ်ႉ လူင်ပွင်ၸိုင်ႈၶႄႇ သိုပ်ႇတိုၵ်းတေႃး လၢႆး သေ သၢၼ်ၶတ်း ၶေႃႈၵႂၢမ်း ဢၼ်မၼ်းလၢတ်ႈ မိူဝ်ႈဝၼ်းသုၵ်း တီႈၼႃႈလိၼ်ၵုၼ် ဢၼ်မီးလွင်ႈတိူဝ်ႉယွၼ်ႈငၢႆႈ ဢၼ်ဝႃႈ ဢမ်ႇမီး “ႁႅင်းတၢင်းၼွၵ်ႈ” ဢၼ်တေလႅၵ်ႈလၢႆႈ မိူဝ်းၼႃႈ မိူင်းထၢႆႇဝၢၼ်း လႆႈၸိူင်ႉႁိုဝ်ၼႆၼၼ်ႉယဝ်ႉ။

လုမ်းၵၢၼ်မိူင်း မိူင်းၶႄႇ ဢွၵ်ႇၶေႃႈပိုၼ်ၽၢဝ်ႇဝႃႈ တႃႇ "လွင်ႈလွတ်ႈလႅဝ်းသဝ်းၶေႃ မိူင်းထၢႆႇဝၢၼ်း" ၼၼ်ႉ ဢမ်ႇၸၢင်ႈမီး မိူဝ်းၼႃႈလႆႈ၊ မိူဝ်းၼႃႈ မိူင်းထၢႆႇဝၢၼ်း တေလႆႈၽွမ်ႉႁူမ်ႈ မႄႈမိူင်း တဵမ်တဵမ်ထူၼ်ႈထူၼ်ႈ” ၼႆယဝ်ႉ။


ငိူၼ်ႈငဝ်ႈၶၢဝ်ႇ

မႄးထတ်း
ဢဝ်ၶိုၼ်းမႃးတီႈ "https://shn.wikinews.org/w/index.php?title=ၵၢၼ်ႇ_တေၶၢႆ_ၶိူင်ႈၵွင်ႈၵၢင်ႇသိုၵ်း_ပၼ်_ထၢႆႇဝၢၼ်း_တႃႇ_2_ပီႇလီႇယၼ်ႇ_တေႃႇလႃႇ&oldid=9841"