ၵၢၼ်ႇ ဢမ်ႇယွမ်းႁပ်ႉ လွင်ႈဢိတ်ႇသရေး တေလေႃႇတိုၵ်း ဝဵင်းရႃႇၾႃႇ
ဝၼ်းၽတ်း၊ မေႇ 2၊ 2024
ၽွင်းလူင်ၵၢၼ်ၼွၵ်ႈမိူင်း ဢမႄႇရိၵၢၼ်ႇ ဢႅၼ်ႇထူဝ်ႇၼီႇ ပလိၼ်ႇၵႅၼ်ႇ ဢၼ်ႁွတ်ႈၽႅဝ်ဝႆႉတီႈ ဢိတ်ႇသရေးၼၼ်ႉ လၢတ်ႈမိူဝ်ႈ ဝၼ်းပုတ်ႉၼၼ်ႉဝႃႈ မိူင်းဢမႄႇရိၵၢၼ်ႇ တေဢမ်ႇယွမ်းႁပ်ႉၼိူဝ် လွင်ႈဢၼ် ဢိတ်ႇသရေး တေ ၶဝ်ႈတိုၵ်း ဝဵင်းရႃႇၾႃႇ တီႈ ၵႃႇၸႃႇပွတ်းၸၢၼ်း ဢၼ်ဢမ်ႇမီး လၢႆးၵၢၼ် တႃႇၵႅတ်ႇၵင်ႈပၼ်ၵူၼ်းမိူင်း ယႃႇႁႂ်ႈမီးလွင်ႈတိူဝ်ႉၶိူၵ်ႈ ၼၼ်ႉ ဝႃႈၼႆယဝ်ႉ။ မိူဝ်ႈဝၼ်းပုတ်ႉၼၼ်ႉ ဝၢႆးသေ ႁူပ်ႉထူပ်းၵၼ်တင်း ၸွမ်ၽွင်းလူင် ဢိတ်ႇသရေး ပႅၼ်ႇၸမိၼ်ႇ ၼေႇတၼ်ႇယႃႇႁုယဝ်ႉ ပလိၼ်ႇၵႅၼ်ႇ ပွတ်ႇလၢတ်ႈ တီႈပၢင်ၸႅင်ႈၶၢဝ်ႇ ဢၼ်ႁဵတ်းတီႈ Ashdod ၼၼ်ႉဝႃႈ “ဢမ်ႇလႆႈႁၼ် လၢႆးၵၢၼ် ဢၼ်ထိုင်တီႈ တႃႇၵႅတ်ႇၵင်ႈပၼ် ၵူၼ်းမိူင်း“ ဝႃႈၼႆယဝ်ႉ။
မၼ်းလၢတ်ႈဝႃႈ “ၸွမ်းလူၺ်ႈ လွင်ႈထတ်းသၢင်ႁဝ်းၶႃႈသေ ဢမ်ႇတၢပ်ႈလူဝ်ႇႁဵတ်း လွင်ႈႁၢင်ႈသိုၵ်းယႂ်ႇလူင် တီႈ ရႃႇၾႃႇသေ မီးလွၵ်းလၢႆးလီတၢင်ႇၸိူဝ်း ဢၼ်တႃႇၵႄႈလိတ်ႈ လွင်ႈၶဵင်ႇတႃႉ ႁႃးမၢတ်ႉသ်ၶဝ်ယူႇ“ ဝႃႈၼႆယဝ်ႉ။
ၽွင်းမိူဝ်ႈ ၸွမ်ၽွင်းလူင် ၵၢၼ်ၼွၵ်ႈမိူင်း ဢမႄႇရိၵၢၼ်ႇ ႁွတ်ႈၽႅဝ် ဢိတ်ႇသရေးယူႇၼၼ်ႉ တီႈဝဵင်းလူင်ၵၢႆႇရူဝ်ႇ မိူင်းဢီးၵျိပ်ႈၼၼ်ႉၵေႃႈ တိုၵ်ႉသိုပ်ႇႁဵတ်း လွင်ႈဢုပ်ႇဢူဝ်း ၵၢၼ်ငူပ်ႉငိ တႃႇၵိုတ်းတိုၵ်းလႆႈတီႈၵႃႇၸႃႇ ၼႂ်းၵႄႈ ႁႃးမၢတ်ႉသ် လႄႈ ဢိတ်ႇသရေး ၼၼ်ႉယူႇ။
ၽွင်းလူင် ပလိၼ်ၵႅၼ်ႇ လႆႈတိုၵ်းသူၼ်း တီႈပၢင်ၸႅင်ႈၶၢဝ်ႇ ၵႃႈတီႈ ဢိတ်ႇသရေးၼၼ်ႉဝႃႈ “ႁႃးမၢတ်ႉသ်ၶဝ် လူဝ်ႇလႆႈတႅပ်းတတ်းဝႃႈ တေဢဝ်ၶေႃႈၽွမ်ႉၸႂ်ၵၼ် လႄႈ လူဝ်ႇလႆႈဝူၼ်ႉသွၼ်ႇ တွၼ်ႈတႃႇ ၵူၼ်းမိူင်း တီႈ ၵႃႇၸႃႇၼၼ်ႉယဝ်ႉ။ မၼ်းဢမ်ႇမီးၶၢဝ်းယၢမ်း တွၼ်ႈတႃႇၸိူင်ႉယူႇ။ လူဝ်ႇလႆႈႁဵတ်း လွင်ႈပၼ်လွင်ႈဢဝ်သေ ၵေႃႈ လီဢဝ် ၶေႃႈၽွမ်ႉၸႂ်ၵႂႃႇ“ ဝႃႈၼႆယဝ်ႉ။
ၼေႇတၼ်ႇယႃႇႁုတႄႉ မၼ်းလၢတ်ႈမႃးယူႇတိၵ်းတိၵ်းဝႃႈ တွၼ်ႈတႃႇပၢၵ်ႈပႅတ်ႈလႆႈ လွင်ႈႁႃးမၢတ်ႉသ်ၶဝ် ၵုမ်းၵမ်တီႈၵႃႇၸႃႇဝႆႉၼၼ်ႉ လူဝ်ႇလႆႈႁၢင်ႈသိုၵ်းတေႃႇ ဝဵင်းရႃႇၾႃႇ ဝႃႈၼႆယဝ်ႉ။ ႁူမ်ႈဝႃႈ လႆႈၶေႃႈၽွမ်ႉၸႂ် လွင်ႈၵိုတ်းတိုၵ်းၵၼ်တင်း ႁႃးမၢတ်ႉသ် လႄႈ လွင်ႈလႅၵ်ႈလၢႆႈ ၵူၼ်းထုၵ်ႇတိၺွပ်းဝႆႉၼၼ်ႉသေတႃႉ မၼ်းလၢတ်ႈဝႃႈတႄႉ တေ သိုပ်ႇတိုၵ်း ရႃႇၾႃႇၵႂႃႇ ဝႃႈၼႆယဝ်ႉ။
ယွၼ်ႉ ဢိတ်ႇသရေး လေႃႇတိုၵ်း တူဝ်ႈၵႃႇၸႃႇလႄႈသင်၊ လွင်ႈၶေႃႈပူင် တႃႇၶၢႆႉတီႈယူႇလႄႈသင် ၵူၼ်းပႃးလဵတ်ႈသတၢႆး ဢိၵ်ႇတင်း ၵူၼ်းၸိူဝ်းလႆႈ ပႅတ်ႈႁိူၼ်းပႅတ်ႈယေးသေ မႃးသေႃႉယူႇတီႈဝဵင်းရႃႇၾႃႇၼႆႉ မီးယူႇ ၼိုင်ႈလၢၼ်ႉပၢႆယဝ်ႉ။ လွင်ႈဢၼ်တေ ႁၢင်ႈသိုၵ်းတေႃႇ ရႃႇၾႃႇၼၼ်ႉ မိူင်းဢမႄႇရိၵၢၼ်ႇ၊ ၸုမ်းၸၢတ်ႈၸိုင်ႈလုမ်ႈၾႃႉ လႄႈ ၽူႈဢွၼ်ႁူဝ် ၵူႈမိူင်းမိူင်းၶဝ် လႆႈမွၵ်ႇလၢတ်ႈသၢၼ်ၶတ်းဝႆႉယူႇ။
တီႈၼႂ်းၶၢဝ်းတၢင်း ဢိတ်ႇသရေးၼၼ်ႉ ၽွင်းလူင်ၵၢၼ်ၼွၵ်ႈမိူင်း ဢမႄႇရိၵၢၼ်ႇ ၼႆႉ လႆးထူပ်းၵၼ်တင်း ၸဝ်ႈၸွမ်ၸိုင်ႈဢိတ်ႇသရေး ဢၢႆးသႅၵ်ႉ ႁၢသ်ႉၸွၵ်ႉ ၼၼ်ႉယဝ်ႉ။ ၸဝ်ႈၸွမ်ၸိုင်ႈ ဢိတ်ႇသရေး ႁၢသ်ႉၸွၵ်ႉ တုၵ်းယွၼ်းမႃးဝႃႈ ဢၼ်ၵူႈမိူင်းမိူင်း လူဝ်ႇဝႆႉပဵၼ်လွင်ႈယႂ်ႇသေ ႁဵတ်းၼႆႉ ပဵၼ်တႃႇႁႂ်ႈ ၵူၼ်းဢိတ်ႇသရေး ၸိူဝ်းထုၵ်ႇႁႃးမၢတ်ႉသ်ၶဝ် တိၺွပ်းၵႂႃႇၼၼ်ႉ ႁႂ်ႈၶိုၼ်းလွတ်ႈမႃး ၼၼ်ႉယဝ်ႉ ဝႃႈၼႆ။
ၽွင်းလူင် ပလိၼ်ႇၵႅၼ်ႇၼႆႉ ဝၢႆးသေ ႁူပ်ႉထူပ်းၵၼ်တင်း ႁၢသ်ႉၸွၵ်ႉယဝ်ႉ မၼ်းလႆႈႁူပ်ႉထူပ်းၵၼ်တင်း ၵူၼ်းၼႄၵၢင်ၸႂ် ဢၼ်မီးယူႇၽၢႆႇၼွၵ်ႈ ဢၼ်တုၵ်းယွၼ်း တႃႇႁႂ်ႈ ၵူၼ်းၸိူဝ်းႁႃးမၢတ်ႉသ်ၶဝ် တိၺွပ်းၵႂႃႇၼၼ်ႉ ႁႂ်ႈၶိုၼ်းပွႆႇပၼ်ၼၼ်ႉသေ မၼ်းလၢတ်ႈမႃးဝႃႈ တႃႇႁႂ်ႈ ၵူၼ်းၸိူဝ်းထုၵ်ႇတိၺွပ်းၵႂႃႇၼၼ်ႉ ႁႂ်ႈပေႃး လွတ်ႈဢွၵ်ႇမႃးၼၼ်ႉ ပဵၼ်ပိူင်လူင် ဢၼ်တိုၵ်ႉႁဵတ်းယူႇ ဝႃးၼႆယဝ်ႉ။
ငိူၼ်ႈငဝ်ႈတိုၼ်း
မႄးထတ်း- Humeyra Pamuk. "Blinken says US cannot support Rafah assault without humanitarian plan" — Reuters, May 2, 2024
- Edward Wong. "Blinken meets with Netanyahu, hoping to stave off an Israeli assault on Rafah." — The New York Times, May 1, 2024
- BBC News. "Blinken says 'time is now' for Israel-Hamas deal in Gaza" — BBC News, May 1, 2024
- Nike Ching. "Blinken meets with Netanyahu in renewed push for Gaza cease-fire" — VOA News, May 1, 2024
