ၵႅမ်ၽွင်းလူင် ၵၢၼ်ၼွၵ်ႈမိူင်း ၵၢၼ်ႇ-ၶႄႇ ထူပ်းၵၼ်တီႈ ဝႃႇသျိၼ်ႇတၼ်ႇ
ဝၼ်းၽတ်း၊ မေႇ 30၊ 2024
ၵႅမ်ၽွင်းလူင် ၵၢၼ်ၼွၵ်ႈမိူင်း ဢမႄႇရိၵၢၼ်ႇ Kurt Campbell ၼႆႉ တေ ထူပ်းၵၼ်တင်း ၵႅမ်ၽွင်းလူင် ၵၢၼ်ၼွၵ်ႈမိူင်းၶႄႇ Ma Zhaoxu ၵႃႈတီး ဝႃႇသျိၼ်ႇတၼ်ႇ ဝႃႈၼႆယဝ်ႉ။ ဢၼ်ယိူင်းဢၢၼ်းဝႆႉတႄႉ လုၵ်ႉတီး ပၢင်ဢုပ်ႇဢူဝ်းၼႆႉသေ ပဵၼ်တွၼ်ႈတႃႇသိုပ်ႇဝႆႉ သဵၼ်ႈသၢႆတၢင်းၵပ်းသိုပ်ႇတိတ်းတေႃႇၵၼ် တွၼ်ႈတႃႇ ၵႅတ်ႇၵင်ႈလႆႈ လွင်ႈသုၵ်ႉယုင်ႈ ဢၼ်ဢမ်ႇလူဝ်ႇ လႄႈ လွင်ႈႁၼ်ၽိတ်း ၽၢႆႇၼိုင်ႈလႄႈ ၽၢႆႇၼိုင်ႈ ၽွင်းမိူဝ်ႈ တီႈၼႂ်းၵႄႈၵၢင် မိူင်းသွင်မိိူင်း မီးလွင်ႈၶဵင်ႈၶႅင်ယူႇၼၼ်ႉ ဝႃႈၼႆယဝ်ႉ။
ဝၢႆးသေ ဢုပ်ႇဢူဝ်းၵၼ် ႁိုင် သွင်ၸူဝ်ႈမူင်းယဝ်ႉ ၽူႈမီးပုၼ်ႈၽွၼ်း တင်းသွင်ပႃႈသွင်ၽၢႆႇ ၵိၼ်ၶဝ်ႈဝၼ်းတီႈ ထၢၼ်ၽွင်းလူင် ၵၢၼ်ၼွၵ်ႈမိူင်းသေ ဝၢႆးသေ ၼၼ်ႉ ထိုင်ၵၢင်ဝၼ်းမႃး John Finer ဢၼ်ပဵၼ် ၵႅမ်ၽူႈပၼ်တၢင်းၶႆးၸႂ် ပၢႆးႁူမ်ႇလူမ်ႈၸိုင်ႈမိူင်း ဢမႄႇရိၵၢၼ်ႇ တေသိုပ်ႇဢုပ်ႇၵုမ်ၵၼ်တင်း ၵႅမ်ၽွင်းလူင်ၵၢၼ်ၼွၵ်ႈမိူင်း ၶႄႇၵႂႃႇ ဝႃႈၼႆယဝ်ႉ။ မိူဝ်ႈလိူၼ်ဢေႇပရႄႇပူၼ်ႉမႃးၼၼ်ႉ ၽွင်းလူင်ၵၢၼ်ၼွၵ်ႈမိူင်း ဢမႄႇရိၵၢၼ်ႇ ဢၼ်ႇထူဝ်ႇၼီႇ ပလိၼ်ႇၵႅၼ်ႇ လႆႈၵႂႃႇႁွတ်ႈထိုင် သျင်ႇႁၢႆး လႄႈ ပႄႇၸိၼ်း မိူင်းၶႄႇမႃးသေ ယၢမ်းလဵဝ် ၸင်ႇလႆႈမီး ၶၢဝ်းတၢင်း ၵႅမ်ၽွင်းလူင် ၵၢၼ်ၼွၵ်ႈမိူင်း ၶႄႇ မႃးၼင်ႇၼႆယဝ်ႉ။
ၽူႈမီးသုၼ်ႇလၢတ်ႈ ထၢၼ်ၽွင်းလူင် ၵၢၼ်ၼွၵ်ႈမိူင်း မွၵ်ႇလၢတ်ႈ ဝီႇဢူဝ်ႇဢေႇဝႃႈ “ၽွင်းမိူဝ်ႈႁဝ်းၶႃႈ လႄႈ ၸုမ်းဢူၺ်းလီ မိူင်းဢူၺ်းလီ ႁဝ်းၶဝ် လႆႈႁဵတ်း တႃႇၵႅတ်ႇၵင်ႈ ၼမ်ႉတွၼ်းၽွၼ်းလီ ႁဝ်းၶႃႈ လႄႈ လၵ်းၸဵင်ႁဝ်းၶႃႈယူႇၼၼ်ႉ ႁဝ်းၶႃႈ ၼႆႉ လႆႈတေႃႇၼႃႈၵၼ်တင်း မိူင်းၶႄႇသေၵေႃႈ လႆႈႁဵတ်းလွင်ႈဢုပ်ႇဢူဝ်းသေ လႆႈမွၵ်ႇလၢတ်ႈ ၶေႃႈၸုၵ်းယၼ်ႁဝ်း ၶေႃးယိူင်းဢၢၼ်းႁဝ်း ၼႄၵႂႃႇၸႅင်ႈၸႅင်ႈလႅင်းလႅင်းသေ လိူင်ႈဢၼ်မီးၼႂ်း ၵႄႈၵၢင် မိူင်းသွင်မိူင်း ဢၼ်လမ်ႇလွင်ႈ တွၼ်ႈတႃႇ ဢမႄႇရိၵၢၼ်ႇ လႄႈ ၵူၼ်းမိူင်းၼႂ်းၵမ်ႇၽႃႇ၊ လွင်ႈဢၼ်ၵဵဝ်ႇၵပ်းလူၺ်ႈ ပိုၼ်ႉတီႈ လႄႈ ၸိူဝ်းၵဵဝ်ႇၵပ်းလူၺ်ႈ တင်းၵမ်ႇၽႃႇၸိူဝ်းၼၼ်ႉၵေႃႈ ၼင်ႇႁိုဝ်တေမီး လွင်ႈၶိုၼ်ႈယႂ်ႇၶိုပ်ႈၼႃႈၵႂႃႇၼၼ်ႉ ႁဝ်းၶႃႈ တေႁဵတ်းသၢင်ႈၵႂႃႇ“ ဝႃႈၼႆယဝ်ႉ။
ၽူႈမီးသုၼ်ႇလၢတ်ႈ ထၢၼ်ၽွင်းလူင် ၵၢၼ်ၼွၵ်ႈမိူင်း ၶႄႇ လႆႈမွၵ်ႇလၢတ်ႈဝႃႈ ၵႅမ်ၽွင်းလူင် ၵၢၼ်ၼွၵ်ႈမိူင်း ၶႄႇ ၼႆႉ တေမီးယူႇတီႈ မိူင်းဢမႄႇရိၵၢၼ်ႇ ႁၢၼ်ႉတေႃႇထိုင် ၸုၼ်ႇ 2 သေ ၼႂ်းၶၢဝ်းယၢမ်းၼၼ်ႉ တေ ႁူပ်ႉထူပ်းဢုပ်ႇဢူဝ်းၵၼ်တင်း တူဝ်တႅၼ်း တီႈ ၵူႈထၢၼ်ႈထၢၼ်ႈၵႂႃႇ ဝႃႈၼႆယဝ်ႉ။
ငိူၼ်ႈငဝ်ႈတိုၼ်း
မႄးထတ်း- Nike Ching. "US official, Chinese counterpart holds talks amid effort to avert unintended conflict" — VOA News, May 30, 2024
- Hayley Wong. "Chinese foreign vice-minister Ma Zhaoxu to visit US in latest exchange" — South China Morning Post, May 29, 2024
- us.china-embassy. "Foreign Ministry Spokesperson Mao Ning’s Regular Press Conference on May 30, 2024" — us.china-embassy, May 30, 2024
