ၸုမ်းလုၵ်ႉၽိုၼ်ႉသီးရီးယႃး ယႃႉပႅတ်ႈ ၸွမ်ပွင်ၸိုင်ႈဢႃႇသတ်ႉ

ဝၼ်းဢႃးတိတ်ႉ၊ တီႇသႅမ်ႇပႃႇ 8၊ 2024 

ၸွမ်ပွင်ၸိုင်ႈ ပႃႇသျႃးဢႃႇသတ်ႉ

ဝၢႆးသေ ၸုမ်းလုၵ်ႉၽိုၼ်ႉၶဝ် ၵိုင်ႉၵၢင်ႉ ၶဝ်ႈတိုၵ်းသေ ၵုမ်းၵမ်လႆႈ ဝဵင်းတမ်ႇမတ်ႉသၵတ်ႉ မိူဝ်ႈၼႆႉယဝ်ႉ လူင်ပွင်ၸိုင်ႈသီးရီးယႃး လႆႈလူႉလႅဝ်ၵႂႃႇယဝ်ႉ။ ၵူၼ်းမိူင်း ဢွၼ်ၵၼ် ဢွၵ်ႇၼိူဝ်သဵၼ်ႈတၢင်းသေ ႁဵတ်းပွႆး ဢွင်ႇမၢၼ် ဢၼ် မုင်ႉႁိူၼ်း ၸွမ်ပွင်ၸိုင်ႈ ပႃႇသျႃး ဢႃႇသတ်ႉ ဢုပ်ႉပိူင်ႇမႃး ၶၢဝ်းတၢင်း 50 ပီ ၼၼ်ႉ လႆႈယဝ်ႉတူဝ်ႈၵႂႃႇယဝ်ႉ။

ၸွမ်ၸိုင်ႈ လႆႈထုၵ်ႇပူတ်းပႅတ်ႈ တႃၶုၼ်မၼ်းသေ ၸုမ်းတႃႇၸုမ်းၼိုင်ႈၵေႃႈ ပိုၼ်ၽၢဝ်ႇ ၼိူဝ်သိုဝ်ႇၶၢဝ်ႇၸိုင်ႈမိူင်းဝႃႈ ၵူၼ်းၸိူဝ်းထုၵ်ႇတီႉၺွပ်းၼၼ်ႉ ပွႆႇပၼ်ၶိုၼ်းမူတ်းယဝ်ႉ၊ ၼႂ်းလိၵ်ႈပိုၼ်ၽၢဝ်ႇၼၼ်ႉ သိုပ်ႇလၢတ်ႈဝႃႈ ၸုမ်းၽၢႆႇလင် ဢၼ်လႆႈပၼ်ၸိုဝ်ႈဝႃႈ ၸုမ်းၽဵဝ်ႈမူၺ်ႉ တႃႇသိမ်းဢဝ် ဝဵင်းတမ်ႇမတ်ႉသၵတ်ႉၼၼ်ႉ တုၵ်းယွၼ်း ႁႂ်ႈၸုမ်းလုၵ်ႉၽိုၼ်ႉ လႄႈ ၵူၼ်းမိူင်း ထိင်းသိမ်း ၽိင်ႈပိူင် သီးရီးယႃး ဢၼ်လွတ်ႈလႅဝ်းၼၼ်ႉ ၼႆယဝ်ႉ။

ဝၢႆးသေ ၽူႈၵွၼ်း ၸုမ်းပႂ်ႉတူၺ်း သုၼ်ႇလႆႈၵူၼ်း သီးရီးယႃး လၢတ်ႈဝႃႈ မိူဝ်ႈၽွင်း ၸုမ်းလုၵ်ႉၽိုၼ်ႉၶဝ် တႄႇၶဝ်ႈမႃး ၼႂ်းဝဵင်းၼၼ်ႉ ၸွမ်ပွင်ၸိုင်ႈ ဢႃႇသတ်ႉ ဢွၵ်ႇမိူင်းၵႂႃႇ လၢႆၸူဝ်ႈမူင်းယဝ်ႉ ၸင်ႇပိုၼ်ၽၢဝ်ႇ လွင်ႈၼႆႉ ဢွၵ်ႇမႃး ယဝ်ႉ။

ၵူၼ်းမိူင်းဝဵင်းလူင် လႆႈတူၵ်းၸႂ်ဢၢမ်းဢေႃး ၵွပ်ႈပိူဝ်ႈ ၸုမ်းလုၵ်ႉၽိုၼ်ႉၶဝ် ၵိုင်ႉၵၢင်ႉ ၶဝ်ႈတိုၵ်း လႄႈ လၢတ်ႈဝႃႈ လႆႈဢွင်ႇပႄႉ ဢၼ်ပဵၼ် ၼႂ်းၶၢဝ်းတၢင်း ပၢင်တိုၵ်းၼႂ်းမိူင်း ဢၼ်ႁိုင် 14 ပီပၢႆ၊ ဢၼ်ၵူၼ်းတၢႆၼပ်ႉႁူဝ်မိုၼ်ႇ၊ ၼႂ်းၼၼ်ႉ ၵူၼ်းမိူင်း 23 လၢၼ်ႉ ၶိုင်ႈၼိုင်ႈ လႆႈပၢႆႈဢွၵ်ႇ ႁိူၼ်းယေးၶဝ် လႄႈ ဢၼ်ႁဵတ်းႁႂ်ႈ ၸွမ်ၸိုင်ႈ ပေႃးလႆႈပၢႆႈဢွၵ်ႇမိူင်း ၼၼ်ႉယဝ်ႉ။

ၽူႈတၢင်လၢတ်ႈ ၶွင်ႇသီႇႁူမ်ႇလူမ်ႈၸိူဝ်ႉၸၢတ်ႈ Sean Savett တႅမ်ႈဝႆႉ တီႈ X ဝႃႈ ၸွမ်ပွင်ၸိုင်ႈ ဢမႄႇရိၵၢၼ်ႇ Joe Biden ၼႆႉ “ပႂ်ႉတူၺ်း လွင်ႈၶိုၼ်ႈယႂ်ႇ ၼႂ်းမိူင်းသီးရီးယႃး ယူႇၸမ်ၸမ်” သေ “ၵပ်းသိုပ်ႇတိတ်းတေႃႇ ၽူႈႁူမ်ႈၼႃႈၵၢၼ် ၼႂ်းပိုၼ်ႉတီႈၶဝ် တႃႇသေႇ” ၼႆယဝ်ႉ။

ၸွမ်ၽွင်းလူင် သီးရီးယႃး မူဝ်ႇႁၢမ်ႇမတ်ႉ ၵႃႇၸီႇ ဢႄးလ်ၸႃႇလႃႇလီႇ လၢတ်ႈဝႃႈ လူင်ပွင်ၸိုင်ႈ ႁၢင်ႈႁႅၼ်းဝႆႉ “တႃႇတေႁူမ်ႈမိုဝ်းၸွမ်း ၽူႈဢွၼ်ႁူဝ် ဢၼ်ၵူၼ်းမိူင်း လိူၵ်ႈဢဝ်ၼၼ်ႉယူႇ” ၼႆယဝ်ႉ။

ငိူၼ်ႈငဝ်ႈၶၢဝ်ႇ

• Associated Press. "Syrians celebrate as rebels topple Assad" — VOA News, December 8, 2024
• Lucas Lilieholm, Eyad Kourdi, Raja Razek, Edward Szekeres, Simone McCarthy, Catherine Nicholls and Sophie Tanno. "Assad flees as Syria rebels capture Damascus" — CNN, December 8, 2024
• Yohannes Lowe (now); Kate Lamb, Coral Murphy Marcos, Tom Ambrose and Hamish Mackay (earlier). "Syrian rebels say Bashar al-Assad has fled Damascus and claim to have captured capital – as it happened" — The Guardian, December 8, 2024