ဝီႇၶီႇၶၢဝ်ႇ

ၸွမ်ပွင်ၸိုင်ႈသျီႇ လၢတ်ႈဝႃႈ လွင်ႈႁူမ်ႈမိုဝ်း ရတ်ႈသျႃး-ၶႄႇၼႆႉ တေႁဵတ်းႁႂ်ႈလုမ်ႈၾႃႉၼိမ်သဝ်း

ဝၼ်းပုတ်ႉ၊ ဢွၵ်ႇထူဝ်ႇပႃႇ 23၊ 2024

ၸွမ်ပွင်ၸိုင်ႈ သျီႇ လႄႈ ၸွမ်ပွင်ၸိုင်ႈ ပူႇထိၼ်ႇ (ၶႅပ်းႁၢင်ႈၵဝ်ႇ)

ၸွမ်ပွင်ၸိုင်ႈၶႄႇ သျီႇၸိၼ်ႇၽိင်း လၢတ်ႈတီႈ ၸွမ်ပွင်ၸိုင်ႈ ရတ်ႈသျႃးဝႃႈ ငဝ်းလၢႆး ၵူႈမိူင်းမိူင်း လႆႈသုၵ်ႉယုင်ႈဝႆႉသေတႃႉ လွင်ႈဢၼ် ဝဵင်းပိူၺ်ႇၵျိင်း ႁူမ်ႈမိုဝ်းၵၼ်တင်း မွသ်ႉၵူဝ်ႇၼၼ်ႉ ပဵၼ်ႁႅင်းတႃႇ လွင်ႈၼိမ်သဝ်း ၼႂ်းၵႄႈ လွင်ႈလႅၵ်ႈလၢႆႈ ဢၼ်ထၢင်ႇၸႅင်ႈ ဢၼ်လႆႈႁၼ် ၼႂ်းၶၢဝ်းတၢင်း ႁူဝ်ပၢၵ်ႇပီၼၼ်ႉၼႆယဝ်ႉ။

မိူဝ်ႈလိူၼ်မေႇၼၼ်ႉ Xi လႄႈ Putin ပၼ်ၵႂၢမ်းမၼ်ႈ လွင်ႈႁူမ်ႈမိုဝ်းၵၼ် "ပၢၼ်မႂ်ႇ" ၼႂ်းၵႄႈ ၽူႈၶႄႉၶဵင်ႇ ဢၼ်မီးဢဵၼ်ႁႅင်းလိူဝ်ပိူၼ်ႈ သွင်မိူင်း တီႈမိူင်ဢမႄႇရိၵၢၼ်ႇ ဢၼ်ၶဝ် မၵ်းမၼ်ႈဝႃႈ ပဵၼ် ၽူႈယႂ်ႇ သိုၵ်းယဵၼ် ဢၼ်ႁၢဝ်ႈႁႅင်း ဢၼ်ၽုၵ်ႇသွမ်ႈ လွင်ႈသုၵ်ႉယုင်ႈ ၼႂ်းလုမ်ႈၾႃႉၼၼ်ႉယဝ်ႉ။

မိူဝ်ႈပိုတ်ႇပၢင်ၵုမ်လူင် BRICS တီႈဝဵင်းၵႃႇၸၢၼ်ႇ မိူင်းရတ်ႈသျႃးၼၼ်ႉ သျီႇ လၢတ်ႈတီႈ ပူႇတိၼ်ႇဝႃႈ “ယၢမ်းလဵဝ် လုမ်ႈၾႃႉၼႆႉ လႆႈလတ်းၽၢၼ်ႇ လွင်ႈလႅၵ်ႈလၢႆႈ ဢၼ်ဢမ်ႇယၢမ်ႈႁၼ်မႃး ၼႂ်းၶၢဝ်းတၢင်း ပၢၵ်ႇပီ ငဝ်းလၢႆးၵူႈမိူင်းမိူင်း လႆႈၵွင်ႉၵၢႆႇၵၼ်တင်း လွင်ႈသုၵ်ႉယုင်ႈ” ၼႆယဝ်ႉ။

“ၵူၺ်းၵႃႈ ၶႃႈယုမ်ႇယမ်တႄႉတႄႉဝႃႈဝႃႈ လွင်ႈမိုတ်ႈၵိုဝ်းၸမ်ၸႂ် ၼႂ်းၵႄႈ ၶႄႇလႄႈ ရတ်ႈသျႃးၼႆႉ တေသိုပ်ႇမီးၵႂႃႇ ၸူဝ်ႈပၢၼ် လႄႈ ပုၼ်ႈၽွၼ်း ၸိုင်ႈမိူင်းလူင် တေႃႇၵူၼ်းမိူင်းၶဝ် တေဢမ်ႇလႅၵ်ႈလၢႆႈ” ၼႆယဝ်ႉ။

ရတ်ႈသျႃး ဢၼ်ႁဵတ်းသိုၵ်းတေႃႇ တပ်ႉသိုၵ်း ယူႇၶရဵၼ်း ဢၼ် NATO ၵမ်ႉၸွႆႈပၼ်ၼၼ်ႉလႄႈ ၶႄႇ ဢၼ်မီးတႂ်ႈ လွင်ႈတဵၵ်းတဵင် ဢၼ် U.S. ၶတ်းၸႂ် တႃႇတေ ၶႄႉၶဵင်ႇ ဢဵၼ်ႁႅင်းသိုၵ်း လႄႈ ပၢႆးမၢၵ်ႈမီး ဢၼ်ယႂ်ႇမႃးၼၼ်ႉ လႆႈႁၼ် လွင်ႈတၢင်း ၵၢၼ်မိူင်း ဢၼ်မိူၼ်ၵၼ်ၼၼ်ႉ ၼမ်မႃးတိၵ်းတိၵ်းယဝ်ႉ။

ရတ်ႈသျႃးလႄႈ ၶႄႇ ဢၼ်ၶိုၼ်းတဵၵ်းတဵင် လႆႈသၢၼ်ၶတ်းၶိုၼ်း လွင်ႈလႆႈတၢင်းဢၢႆ ဢၼ်ပဵၼ်မႃး မိူဝ်ႈ 1991 ဢၼ် သူဝ်ႇဝီႇယႅတ်ႉ လႆႈလူႉလႅဝ် လႄႈ လွင်ႈၶူဝ်ႇလူဝ်ႇၼီႇ ယူးရူပ်ႉ ၽွင်းငမ်း ၶႄႇ မႃးလၢႆပၢၵ်ႇပီၼၼ်ႉ လႆႈၶတ်းၸႂ် တႃႇတေၼႄ လွင်ႈႁၢင်ႈႁၢႆႉ မိူင်းဝၼ်းတူၵ်း လႄႈ လွင်ႈလူတ်ႈယွမ်းၶဝ်ၼၼ်ႉ ၼႆယဝ်ႉ။

ရတ်ႈသျႃး ႁၼ်ထိုင်ဝႃႈ ပၢင်ၵုမ် BRICS ၼႆႉ ပဵၼ်တိုဝ်ႉတၢင်း တႃႇတေ သၢၼ်ၶတ်း လွင်ႈၽွင်းငမ်း မိူင်းဝၼ်းတူၵ်း ၼႂ်းၵၢၼ်မိူင်းလုမ်ႈၾႃႉ။ မိူင်းပရႃႇၸီး၊ မိူင်းရတ်ႈသျႃး၊ မိူင်းဢိၼ်းတီးယႃး၊ မိူင်းၶႄႇ လႄႈ မိူင်းဢႃႇၾရိၵပွတ်းၸၢၼ်း ၸိူဝ်းပဵၼ် မိူင်းႁႃႈမိူင်း လႆႈတႄႇၶဝ်ႈပႃးဝႆႉသေ ၼႂ်းမိူင်းဢၼ်ယွၼ်းၶဝ်ႈၸုမ်း ၼႂ်းဢေးသျႃး ၼၼ်ႉ ၶဝ်ႈပႃး မလေးသျႃး​ေ မိူင်းထႆးၵေႃႈ ၶႂ်ႈယိုၼ်ႈယွၼ်းပႃး ၼႆယဝ်ႉ။ ပၢင်ၵုမ်ဢၼ်ၸတ်းႁဵတ်းတီႈဝဵင်းၵႃႇၸၢၼ်ႇ မိူင်းရတ်ႈသျႃးၼႆႉ ပဵၼ်ပၢင်ၵုမ်ၵၢၼ်မိူင်းၼွၵ်ႈမိူင်း ဢၼ်ယႂ်ႇသုတ်း တႃႇၸိုင်ႈမိူင်းၸိူဝ်းၶဝ်ႈႁူမ်ႈပၢင်ၵုမ် ၼႆ ယူႇရီႇဢူဝ်ႇသျႃႇၵူဝ်ႇ ၽူႈပၼ်တၢင်းႁၼ်ထိုင် ၵၢၼ်ၼွၵ်ႈမိူင်း လူင်ပွင်ၸိုင်ႈရတ်ႈသျႃး လၢတ်ႈၼႄၼင်ႇၼႆ။


ငိူၼ်ႈငဝ်ႈၶၢဝ်ႇ

မႄးထတ်း
ဢဝ်ၶိုၼ်းမႃးတီႈ "https://shn.wikinews.org/w/index.php?title=ၸွမ်ပွင်ၸိုင်ႈသျီႇ_လၢတ်ႈဝႃႈ_လွင်ႈႁူမ်ႈမိုဝ်း_ရတ်ႈသျႃး-ၶႄႇၼႆႉ_တေႁဵတ်းႁႂ်ႈလုမ်ႈၾႃႉၼိမ်သဝ်း&oldid=9754"