ၸွမ်ၽွင်းလူင်ၵဝ်ႇ မိူင်းပင်းၵလႃးတဵတ်ႈ ၶႃႇလီႇတႃႇၸီႇယႃႇ လွတ်ႈဢွၵ်ႇမႃး တီႈၵုမ်းၶင်တူဝ်

ဝၼ်းဢင်းၵၢၼ်း၊ ဢေႃးၵၢတ်ႉ 6၊ 2024 

ၸွမ်ၽွင်းလူင်ၵဝ်ႇ မိူင်းပင်းၵလႃးတဵတ်ႈ ၶႃႇလီႇတႃႇၸီႇယႃႇ (ၶႅပ်းႁၢင်ႈၵဝ်ႇ)

ၸွမ်ၶုၼ်ၽွင်းလူင်ၵဝ်ႇ မိူင်းပင်းၵလႃးတဵတ်ႈ Khaleda Zia ဢၼ်ထုၵ်ႇၵုမ်းၶင်ဝႆႉ ၼႂ်းႁိူၼ်းမၼ်း လၢႆပီၼၼ်ႉ လႆႈပွႆႇပၼ်ၶိုၼ်း မိူဝ်ႈၼႆႉ လိူၼ်ဢေႃးၵၢတ်ႉ 6 ဝၼ်း ၼႆယဝ်ႉ။ ဝၢႆးသေ ၸွမ်ၽွင်းလူင်ၵဝ်ႇ သျိၵ်ႉႁႃႇသီႇၼႃႇ လႆႈထွၼ်တူဝ်ဢွၵ်ႇ ၼႃႈတီႈသေ ပၢႆႈဢွၵ်ႇၼွၵ်ႈမိူင်းၵႂႃႇယဝ်ႉ ၸင်ႇလႆႈလွတ်ႈဢွၵ်ႇမႃး ၼႂ်းႁိူၼ်း ၽွင်းမိူဝ်ႈ ၵူၼ်းတင်းၼမ် ၼႄၵၢင်ၸႂ် တိုၵ်ႉပႆတၢင်း တႃႇတေယႃႉပႅတ်ႈ ႁိူၼ်းၸွမ်ၽွင်းလူင် တီႈဝဵင်းတႃႇၵႃႇ ၼၼ်ႉယဝ်ႉ။

ၵၢၼ်မိူင်း မိူင်းပင်းၵလႃးတဵတ်ႈ ဢၼ်ပဵၼ် ၵူၼ်းမူႇသလိမ်ႇ ၵမ်ႈၼမ်ၼၼ်ႉ လႆႈထုၵ်ႇ ၽူႈၶေႉၶဵင်ႇၵၢၼ်မိူင်း ၼၢင်းယိင်းသွင်ၵေႃႉၼႆႉ ၽွင်းငမ်းမႃး ၶၢဝ်းတၢင်းသိပ်းပီပၢႆယဝ်ႉ။ မိူဝ်ႈပီ 2018 ၼၼ်ႉ ၸွမ်ၽွင်းလူင်ၵဝ်ႇ ၸီႇယႃႇ ဢၼ်ပဵၼ်ႁူဝ်ၼႃႈ ပႃႇတီႇၸိူဝ်ႉၸၢတ်ႈ ပင်းၵလႃးတဵတ်ႈ ဢၼ်ပဵၼ်ပိူင်လူင်ၼၼ်ႉ လႆႈထုၵ်ႇတၢမ်ႇၶွၵ်ႈ 17 ပီ ၸွမ်းၼင်ႇ ပၵ်းပိူင် ၵၢၼ်ၵိၼ်ငိုၼ်း မိူဝ်ႈပၢၼ် ၸွမ်ၽွင်းလူင် ႁႃႇသီႇၼႃႇ ၼႆယဝ်ႉ။

ဝၢႆးသေ လုၵ်ႈႁဵၼ်းၶဝ် ဢွၼ်ႁူဝ်ၼႄၵၢင်ၸႂ် ပတ်းပိုၼ်ႉမိူင်း ၶၢဝ်းတၢင်းလၢႆဝူင်ႈယဝ်ႉၼၼ်ႉ ၸွမ်ၽွင်းလူင် ႁႃႇသီႇၼႃႇ လူင်းၼႃႈတီႈ မိူဝ်ႈဝၼ်းၸၼ်ၼၼ်ႉသေ ၸွမ်သိုၵ်းလူင် ပိုၼ်ၽၢဝ်ႇ တေၶွတ်ႇၽွတ်ႈ လူင်ပွင်ၸိုင်ႈၸူဝ်ႈၶၢဝ်း ၼႆယဝ်ႉ။ ယွၼ်ႉပိူဝ်ႈဝႃႈ လူင်ပွင်ၸိုင်ႈ ၸွမ်ၽွင်းလူင် ႁႃႇသီႇၼႃႇ ၽဵဝ်ႈမူၺ်ႉ ၵူၼ်းၸိူဝ်းၼႄၵၢင်ၸႂ်ၼၼ်ႉ ႁၢဝ်ႈႁၢဝ်ႈႁႅင်းႁႅင်းသေ ႁဵတ်းႁႂ်ႈ ၵူၼ်းမိူင်း လႆႈလူႉသုမ်းလိူတ်ႈလႆ လူႉတၢႆၵႂႃႇသေတႃႉ ၽူႈၵွၼ်းတပ်ႉသိုၵ်း ၵေႃႉဢၼ် ႁပ်ႉပုၼ်ႈၽွၼ်း ၽၢႆႇဢုပ်ႉပိူင်ႇၽွင်းငမ်းၸူဝ်ႈၶၢဝ်းၼၼ်ႉ ၵိုတ်းယိုတ်း လွင်ႈႁုၵ်းႁၢႆႉ ၼိူဝ်ၵူၼ်းၼႄၵၢင်ၸႂ်ၼၼ်ႉ ၵမ်းလဵဝ်သေ ပွႆႇပၼ် ၵူၼ်းၸိူဝ်းထုၵ်ႇတီႉၺွပ်းၼၼ်ႉ ၵမ်းလဵဝ်ယဝ်ႉ။

လုၵ်ႈႁဵၼ်းၸိူဝ်းၼႄၵၢင်ၸႂ်ၼၼ်ႉ တုၵ်းယွၼ်း ႁႂ်ႈၽူႈလႆႈသူးၼူဝ်ႇပႄႇလ် မူႇႁမ်ႇမတ်ႉယူႇၼတ်ႉ ဢွၼ်ႁူဝ်လူင်ပွင်ၸိုင်ႈၸူဝ်ႈၶၢဝ်း။ မိူဝ်ႈၼႆႉ မိူင်းႁူမ်ႈတုမ်ယူးရူပ်ႉ ဢွၵ်ႇၶေႃႈပိုၼ်ၽၢဝ်ႇဝႃႈ ပိူင်လူင်မၼ်း လႆႈမႆႈၸႂ်ၸွမ်း ၶၢဝ်ႇငၢဝ်း ဢၼ်မီးလွင်ႈ ယိုဝ်းၵူၼ်းၸၢဝ်းၶိူဝ်းဢွၼ်ႇ တီႈမိူင်းပင်းၵလႃးတဵတ်ႈ ဢၼ်ဢမ်ႇမီးလွင်ႈၼိမ်သဝ်းၼၼ်ႉ ၼႆယဝ်ႉ။

ငိူၼ်ႈငဝ်ႈၶၢဝ်ႇ

• Ruma Paul. "Khaleda Zia, bitterest foe of Sheikh Hasina, freed after Bangladesh PM flees" — Reuters, August 6, 2024
• Agence France-Presse. "Bangladesh ex-PM Zia freed after arch-rival toppled" — VOA News, August 6, 2024
• The Times of India. "Bangladesh ex-PM Khaleda Zia freed after arch-rival Sheikh Hasina toppled amid unrest" — The Times of India, August 6, 2024