ၼမ်ႉထူမ်ႈမိူင်းသပဵၼ်ႇ မီးၵူၼ်းတၢႆ 200 ၵေႃႉလိူဝ်

ဝၼ်းသဝ်၊ ၼူဝ်ႇဝႅမ်ႇပႃႇ 2၊ 2024 

လွင်ႈလုလႅဝ် ယွၼ်ႉၼမ်ႉထူမ်ႈ တီႈ သပဵၼ်ႇ

မိူဝ်ႈပူၼ်ႉမႃး သၢမ်ဝၼ်းၼၼ်ႉ ၼမ်ႉထူမ်ႈ ဢၼ်ဢမ်ႇယၢမ်ႈပဵၼ်မႃး တီႈဝဵင်းဝႃႇလႅၼ်ႇသီႇယႃႇ ပွတ်းၸၢၼ်း တီႈ ၼႃႈလိၼ်ပွတ်းဢွၵ်ႇ မိူင်းသပဵၼ်ႇ ၼၼ်ႉ လႄႈ ၵူၼ်းတၢႆ ဢမ်ႇယွမ်း 205 ၵေႃႉသေ ၵူၼ်းႁၢႆလၢႆၵႂႃႇ တင်းၼမ်ယဝ်ႉ။

တီႈဝဵင်းဝႄႇလႅၼ်ႇသျီႇယႃႇၼၼ်ႉၵွႆး ၵူၼ်းတၢႆ မီးၵႂႃႇ 202 ၵေႃႉသေ ၽူႈမီးပုၼ်ႈၽွၼ်း ၽၢႆႇၶိုၵ်ႉၶၵ်ႉ မိူင်းသပဵၼ်ႇၶဝ် ပၼ်ၾၢင်ႉဝႆႉဝႃႈ ၼႂ်းဝၼ်းၼႃႈၼႆႉ ၾူၼ်တေတူၵ်းထႅင်ႈ ၼႆယဝ်ႉ။ လွင်ႈလူႉသုမ်း ယွၼ်ႉလူမ်းလႅင်ႉ မိူဝ်ႈဝၼ်းဢႃးတိတ်ႉ လႄႈ ဝၼ်းပုတ်ႉၼၼ်ႉ ပဵၼ်ၽေးသၽႃႇဝ ဢၼ်ၵူၼ်းတၢႆၼမ်သေပိူၼ်ႈ တီႈမိူင်းသပဵၼ်ႇ ၼႆယဝ်ႉ။

သဵၼ်ႈတၢင်းတင်းၼမ် လူတ်ႉၵႃးတိုၵ်ႉတဵမ်ဝႆႉ၊ လွင်ႈလူႉသုမ်းတႄႉ တိုၵ်ႉႁၼ်ၵွင်ဝႆႉယူႇသေ မၢင်တီႈၵေႃႈ ၵူၼ်းမိူင်း ဢမ်ႇၸၢင်ႈဢွၵ်ႇၼွၵ်ႈႁိူၼ်းယေး ဝႃႈၼႆ။

ၾႆးၾႃႉ ဢမ်ႇမီး ၼမ်ႉၵိၼ် ၼမ်ႉၸႂ်ႉၵေႃႈဢမ်ႇလႆႈသေဢမ်ႇၵႃး လွင်ႈၵပ်းသိုပ်ၾူၼ်းၵေႃႈ လႆႈၶၢတ်ႇဝႆႉ ဝႃႈၼႆ။

ၵူၼ်းမိူင်းလၢတ်ႈဝႃႈ လူဝ်ႇတၢင်းၸွႆႈထႅမ်တင်းၼမ် မိူၼ်ၼင်ႇ ၶိူင်ႈၸၢၵ်ႈ တႃႇဢဝ်ယုၵ်းယၢၵ်း၊ ပႃးၸဵမ်ၶိူင်ႈၸၢၵ်ႈ ၶရဵင်း ၸိူဝ်းၼႆႉၼႆယဝ်ႉ။ မိူဝ်ႈဝၼ်းဢႃးတိတ်ႉၼၼ်ႉ ဝဵင်းဝႃႇလႅၼ်ႇသျီႇယႃႇ ၽူၼ်လႆႈတူၵ်း တႃႇ ၶၢဝ်းတၢင်း 8 ၸူဝ်ႈမူင်းလႄႈ ၼမ်ႉလႆႈထူမ်ႈတင်းဝဵင်းသေ သဵၼ်ႈတႃႈသၢႆတၢင်း၊ ႁိူၼ်းယေးၸိူဝ်းၼႆႉ လႆႈလုလႅဝ်၊ ၵုမ်ႇလိၼ်၊ ဢုင်ၸိူဝ်းၼႆႉ လႆႈထူမ်ႈဝႆႉ ဝႃႈၼႆယဝ်ႉ။

ၵူၼ်းၸွႆႈထႅမ် မႃးတင်းၼမ်သေတႃႉ ၾၢႆႇၸွႆႈထႅမ်ၶိုၵ်ႉၶၵ်ႉၶဝ် တုၵ်းယွၼ်းဝႃႈ ယႃႇပေမႃး ယွၼ်ႉဝႃႈ သဵၼ်ႈတၢင်းလူတ်ႉၵႃး ဢၼ်ၵႂႃႇၸွႆႈထႅမ်ၶိုၵ်ႉၶၵ်ႉၼၼ်ႉ ဢိုတ်းဝႆႉ ဝႃႈၼႆ။ ၸုမ်းၶႂၢႆႇၶႃပေလႅင် လႄႈ ၽူႈၶဝ်ႈၸုမ်း ၶွင်ႇသီႇဝဵင်း ၸႅၵ်ႇ တၢင်းၵိၼ်တၢင်းယႅမ်ႉ လႄႈ ယႃႈယႃ ပၼ်ၵူၼ်းမိူင်း ၼႆယဝ်ႉ။

ငိူၼ်ႈငဝ်ႈၶၢဝ်ႇ

• Beatriz Ríos, Anthony Faiola and Ian Livingston. "Spain’s floods have killed more than 200. Why have they been so deadly?" — The Washington Post, November 1, 2024
• Teresa Medrano. "What to know about the unprecedented floods that killed more than 200 in Spain" — AP News, November 2, 2024
• Al Jazeera. "Death toll from Spain floods passes 200 as rescue teams search for missing" — Al Jazeera, November 1, 2024