ဝီႇၶီႇၶၢဝ်ႇ

ၼမ်ႉထူမ်ႈ တီႈ ၵဵင်းမႆႇ လႄႈ ၸၢင်ႉ 2 တူဝ် ၸူမ်ၼမ်ႉတၢႆ

ဝၼ်းဢႃးတိတ်ႉ၊ ဢွၵ်ႇထူဝ်ႇပႃႇ 6၊ 2024

ၸၢင်ႉသွင်တူဝ် လဵၼ်ႈၼမ်ႉ တီႈသူၼ်မွၵ်ႇသၽႃႇဝ ၸၢင်ႉ၊ ၵဵင်းမႆႇ၊ မိူင်းထႆး

ၸၢင်ႉ 2 တူဝ် ၸူမ်ၼမ်ႉတၢႆ တီႈပႃႇထိူၼ်ႇၾိင်ႈတိုၼ်းပဵၼ်ၸၢင်ႉ Elephant Nature Park ၸႄႈတွၼ်ႈမႄႈတႅင် ဝဵင်းလူင်ၵဵင်းမႆႇ ဝႃႈၼႆ။ တႃႇတေႁႃႁၼ် တူဝ်သတ်း ဢၼ်ၶမ်ဝႆႉ ၼႂ်းၼမ်ႉဢၼ်ၶိုၼ်ႈမႃး လႄႈ ၼမ်ႉထူမ်ႈ ဢၼ်လႆဝႆးဝႆးၼၼ်ႉ တိုၵ်ႉၶတ်းၸႂ် တင်းမူတ်းယူႇ။

ၼႂ်းသူၼ်မွၵ်ႇၼၼ်ႉ မီးၸၢင်ႉ 126 တူဝ်သေ ၼႂ်းၼၼ်ႉ ၸၢင်ႉသွင်တူဝ် လႆႈထုၵ်ႇၼမ်ႉထူမ်ႈသေ လႆႈႁူႉဝႃႈ လႆႈတၢႆၵႂႃႇၼႆယဝ်ႉ။ မိူဝ်ႈပွတ်းၼႂ် မိူဝ်ႈဝၼ်းသဝ်ၼၼ်ႉ ထူပ်းႁၼ် တူဝ်တၢႆ ၸၢင်ႉတူဝ်မႄႈ ပၢင်ႇၾႃႉသၢႆး တီႈႁိမ်းႁူင်းလိုဝ်ႈသဝ်း သိပ်ႉသၢၼ်း ၸႄႈတွၼ်ႈမႄႈတႅင် ဝႃႈၼႆ။ ထႅင်ႈတူဝ်ၼိုင်ႈတႄႉ ပဵၼ် မႄႈၽလွၺ်းတႅင်ႊ၊ တႃႇမွတ်ႇဝႆႉၼၼ်ႉ ၼႆယဝ်ႉ။

ၽူႈၵႅတ်ႇၶႄ သၽႃႇဝ ၸၢင်ႉ Saengduean Chailert ၵေႃႉၵေႃႇတင်ႈ ပႃႇထိူၼ်ႇ သၽႃႇဝ ၸၢင်ႉၼၼ်ႉ တႅမ်ႈဝႆႉ တီႈၼႃႈလိၵ်ႈ ၾဵတ်ႉပုၵ်ႉမၼ်းဝႃႈ ဝၼ်းသုၵ်းၼႆႉ ပဵၼ်ဝၼ်းလပ်းသိင်ႇ လႄႈ ဝၼ်းဢၼ် ပႃႇထိူၼ်ႇ ဢိုမ်တိုမ်း ၼႆယဝ်ႉ။

မိူဝ်ႈၶဝ်လႆႈၶေႃႈပၼ်ၾၢင်ႉ ၼမ်ႉထူမ်ႈ မိူဝ်ႈဝၼ်းၽတ်းၼၼ်ႉ ၵူၼ်းႁဵတ်းၵၢၼ်ၶဝ် တႄႇဢဝ် ၸၢင်ႉၸိူဝ်းၼၼ်ႉ ၶၢႆႉၵႂႃႇတီႈသုင်သေ သိုပ်ႇၶတ်းၸႂ် တေႃႇထိုင် ၶမ်ႈဝၼ်းသုၵ်းၼၼ်ႉယဝ်ႉ။ ၵူၺ်းၵႃႈ ၼမ်ႉၶိုၼ်ႈမႃးတိၵ်းတိၵ်းလႄႈ တီႈဢၼ်သုင်လိူဝ်ၼၼ်ႉၵေႃႈ ဢမ်ႇလွတ်ႈ။ ဝၢၼ်ႈတီႈယူႇၸၢင်ႉတင်းမူတ်း ယၢမ်းလဵဝ် ၼမ်ႉထူမ်ႈႁၢဝ်ႈႁႅင်း။

ၼၢင်းသႅင်တိူၼ်ႈ တႅမ်ႈဝႃႈ “တူဝ်သတ်းႁဝ်းၶႃႈ လႆႈလွင်ႈလႆၵႂႃႇၸွမ်း ၼႂ်းၼမ်ႉထူမ်ႈ ၸၢင်ႉႁဝ်းၶႃႈ ဢမ်ႇလႆႈထုၵ်ႇသၢႆၶဵၼ်းသေတႃႉ တိုၵ်ႉမီးဝႆႉ ၼႂ်ၶွၵ်ႈ ဢၼ်ႁဵတ်းႁူဝ်ႉဝႆႉၼၼ်ႉ” ၼႆယဝ်ႉ။ "ၼမ်ႉထူမ်ႈၼႆႉ ၶိုၼ်ႈထိုင် သၢမ်မီႇတႃႇလိူဝ်လိူဝ်သေ ပူၼ်ႉလိူဝ် ႁူဝ်ႉဢၼ်ၵင်ႈဝႆႉ တီႈႁူင်းယူႇ တူဝ်သတ်းၶဝ်သေ ၸမ်တေထိုင် လင်ၶႃးႁိူၼ်းယဝ်ႉ။"

"ၸၢင်ႉတႃမွတ်ႇႁဝ်း မႄႈပလွၺ်းတႅင်ႊ၊ ပလၢင်ႇမႄႈမီႇပူၼ်ႇ လႄႈ တၢင်ႇၸိူဝ်းလၢႆလၢႆတူဝ် လႆႈထုၵ်ႇၼမ်ႉထူမ်ႈဢဝ်ၶဝ် လွင်ႈလႆ ၵႂႃႇ ၽၢႆႇၼႃႈတႃႁဝ်း" ၼႆယဝ်ႉ။ ဝူဝ်းၵႂၢႆး တီႈသူၼ်မွၵ်ႇၼၼ်ႉၵေႃႈ ႁၢႆလၢႆၵႂႃႇ ၽွင်းၼမ်ႉထူမ်ႈၼၼ်ႉ တင်းၼမ်။ မႅဝ်း လႄႈ မႃ ဢၼ်လုၵ်ႉတီႈ ဝၢင်းၼၼ်ႉ တင်းမူတ်း လွတ်ႈၽေးယူႇ ၼႆသေတႃႉ တီႈၼၼ်ႈၼႆႉ ဢမ်ႇမီး ၶွၵ်ႈ တႃႇတူဝ်သတ်း ၼႆယဝ်ႉ။

ႁွင်ႈၵၢၼ် ပႃႇထိူၼ်ႇ၊ တူဝ်သတ်း လႄႈ တူၼ်ႈမႆႉ ဢိၵ်ႇပႃး ႁွင်ႈၵၢၼ် ပႃႇမႆႉ ၸဝ်ႈႁေႃၶမ်း၊ ၸုမ်းမေႃယႃ သတ်း၊ ၽူႈမီးပုၼ်ႈၽွၼ်း တီႈႁူင်းၵၢၼ်ၸၢင်ႉ ၸိူဝ်ႉၸၢတ်ႈ ဢိၵ်ႇတင်း ၽူႈၸွႆႈထႅမ် ၶဝ် လႆႈၽူတ်ႇၸွႆႈ ၸၢင်ႉ ၸိူဝ်းၶမ်ဝႆႉ တီႈပႃႇထိူၼ်ႇၼၼ်ႉ ၼႆယဝ်ႉ။

ၼႂ်းၵႃႈ ၸၢင်ႉ 126 တူဝ်ၼၼ်ႉ လႆႈၶၢႆႉၵႂႃႇယူႇတီႈလွတ်ႈၽေး 114 တူဝ်သေ ၸၢင်ႉ တူဝ်ပေႃႈ 9 တူဝ် တိုၵ်ႉၶမ်ဝႆႉ ၸၢင်ႉ 2 တူဝ် လႆႈတၢႆၵႂႃႇ သေ တႃႇတူဝ်ၼိုင်ႈ တိုၵ်ႉႁၢႆလၢႆဝႆႉ ၼႆယဝ်ႉ။ တူဝ်သတ်းတၢင်ႇၸိူဝ်း မိူၼ်ၼင်ႇ ၵႂၢႆး၊ ပႄႉ၊မႃ၊ မႅဝ်း ၸိူဝ်းၼႆႉၵေႃႈ လႆႈၶၢႆႉၵႂႃႇယူႇတီႈလွတ်ႈၽေး ၼႆ ႁွင်ႈၵၢၼ်လူင် ၽၢႆႇၶူဝ်းၶွင်သၽႃႇဝ လႄႈ သိင်ႇဝႅတ်ႉလွမ်ႉ ပိုၼ်ၽၢဝ်ႇဝႆႉၼင်ႇၼႆ။


ငိူၼ်ႈငဝ်ႈၶၢဝ်ႇ

မႄးထတ်း
ဢဝ်ၶိုၼ်းမႃးတီႈ "https://shn.wikinews.org/w/index.php?title=ၼမ်ႉထူမ်ႈ_တီႈ_ၵဵင်းမႆႇ_လႄႈ_ၸၢင်ႉ_2_တူဝ်_ၸူမ်ၼမ်ႉတၢႆ&oldid=9544"