ဝီႇၶီႇၶၢဝ်ႇ

ၽူႈႁွင်ႉၵႂၢမ်းၵဝ်ႇ ၸုမ်း One Direction လီယမ်ၽဵၼ်း လႆႈလူႉတၢႆၵႂႃႇ ယွၼ်ႉတူၵ်း ၸၢၼ်း

ဝၼ်းၽတ်း၊ ဢွၵ်ႇထူဝ်ႇပႃႇ 17၊ 2024

ၽူႈႁွင်ႉၵႂၢမ်း ၸုမ်း One Direction လီယမ်ၽဵၼ်း မိူဝ်ႈ ပီ 2023 (ၶႅပ်းႁၢင်ႈၵဝ်ႇ)

လီယမ်ၽဵၼ်း ဢၼ်ပဵၼ် ၽူႈႁွင်ႉၵႂၢမ်းၵဝ်ႇ ၸုမ်း One Direction ၼၼ်ႉ လႆႈလူႉတၢႆၵႂႃႇ မိူဝ်ႈဢႃႇယု 31 ပီ တီႈမိူင်းဢႃႇၵျႅၼ်ႇတီးၼႃး ယွၼ်ႉသဵၼ်တူၵ်း ၸၢၼ်း တီႈႁူင်းႁႅမ်း ၸၼ်ႉသၢမ် တီႈဝဵင်း Buenos Aires ၼႆယဝ်ႉ။

ၼႂ်းၶေႃႈပိုၼ်ၽၢဝ်ႇၼၼ်ႉ ပလိၵ်ႈၶဝ် လၢတ်ႈဝႃႈ ဝၢႆးသေ ၸုမ်းၸွႆႈထႅမ် ၶိုၵ်ႉၶၵ်ႉၶဝ် တွပ်ႇ ၶေႃႈၾူၼ်း ၶိုၵ်ႉၶၵ်ႉ တီႈပွၵ်ႉၸၼ်ႉသုင် ဝဵင်းပႃႇလႃႇမူဝ်ႇၼၼ်ႉယဝ်ႉ ၶဝ်လႆႈႁၼ် တူဝ်တၢႆ ၽဵၼ်း ၼႆယဝ်ႉ။

ၽဵၼ်း လႆႈၸိုဝ်ႈသဵင်လိုဝ်းလင်မႃး ၸွတ်ႇတူဝ်ႈလုမ်ႈၾႃႉ ဢၼ်ပဵၼ်ပွတ်းတွၼ်ႈဢၼ်ၼိူင်ႈၼ်ႂးၸုမ်းၽဵင်းၵႂၢမ်းၸၢႆးဢၼ်လႆႈထုၵ်ႇႁၵ်ႉတႄႉတႄႉ ဢၼ်လႆႈႁဵတ်းဢွၵ်ႇမႃး တီႈပၢင်လဝ်ႇမူၼ်ႈငဝ်းတူင်ႉ X Factor မိူဝ်ႈပီ 2010 ၼၼ်ႉသေ ဢိၵ်ႇပႃး Harry Styles ၊ Louis Tomlinson ၊ Niall Horan လႄႈ Zayn Malik ၸိူဝ်းၼႆႉယဝ်ႉ။

မိူဝ်ႈႁူဝ်လိူၼ်ၼႆႉ ၽဵၼ်း လႆႈၵႂႃႇၶဝ်ႈႁူမ်ႈ ပၢင်မူၼ်ႈသိူဝ်း ဢႃႇၵျႅၼ်ႇတီးၼႃး ဢၼ်ၽူႈႁူမ်ႈႁွမ်း ၸုမ်း One Direction ၵဝ်ႇမၼ်း ၼၢႆးႁေႃးရၢၼ်ႇ ႁွင်ႉၼၼ်ႉယဝ်ႉ။

ၸွမ်းၼင်ႇ ပလိၵ်ႈ တီႈဝဵင်း Buenos Aires ၶဝ် လၢတ်ႈၼၼ်ႉ ၽူႈမီးပုၼ်ႈၽွၼ်း တီႈဢွင်ႈတီႈ ဢၼ်ပဵၼ်လွင်ႈတၢင်းၼၼ်ႉ မိူဝ်ႈတႄႇမၼ်း လႆႈတုမ်ႉတွပ်ႇ ၶေႃႈမုၼ်း "ၵူၼ်းၵေႃႉတုမ်ႉတွပ်ႇႁၢဝ်ႈႁႅင်း ဢၼ်ၸၢင်ႈပဵၼ် ၽၢႆႇတႂ်ႈ ၽွၼ်းယွၼ်ႈ ယႃႈမဝ်းၵမ် လႄႈ လဝ်ႈ" ၼႆယဝ်ႉ။

ၽိူဝ်ႇထိုင်တီႈႁူင်းႁႅမ်းၼၼ်ႉ လႆႈငိၼ်းဝႃႈ လႆႈငိၼ်းသဵင်ႁႅင်း တီႈၼႂ်းဝၢင်းႁူင်းႁႅမ်း ၼႆယဝ်ႉ။ ဢမ်ႇႁိုင်သင် ၶဝ်လႆႈႁၼ်တူဝ်တၢႆမၼ်း တီႈၼၼ်ႈ။ လႆႈပိုတ်ႇလိူင်ႈပလိၵ်ႈဝႆႉယဝ်ႉ ဝႃႈၼႆ။

ၽူႈၵွၼ်း ၽၢႆႇပၢႆးယူႇလီ ၶိုၵ်ႉၶၵ်ႉ ဢႄးလ်ပႃႇတူဝ်ႇ ၶရႅတ်ႉသႅၼ်ႇတီႇ လၢတ်ႈတီႈ သိုဝ်ႇၶၢဝ်ႇ ၼႂ်းပိုၼ်ႉတီႈဝႃႈ ၽဵၼ်း လႆႈမၢတ်ႇၸဵပ်းႁၢဝ်ႈႁႅင်းလႄႈ တေႁဵတ်း ၵၢၼ်ၵူတ်ႇထတ်း တူဝ်တၢႆမၼ်း ၼႆယဝ်ႉ။

Mr Crescenti ဢမ်ႇၶႂ်ႈတွပ်ႇၶေႃႈထၢမ် ဢၼ်ၵဵဝ်ႇလူၺ်ႈ ငဝ်းလၢႆး ဢၼ် Payne တူၵ်းလူင်း တီႈၼိူဝ်ၸၢၼ်းၼၼ်ႉ။

လုမ်းၼွၵ်ႈမိူင်း မိူင်းယူႇၶေႇ မၵ်းမၼ်ႈဝႃႈ လႆႈၵပ်းသိုပ်ႇ ၽူႈမီးပုၼ်ႈၽွၼ်း တီႈမိူင်းဢႃႇၵျႅၼ်ႇတီးၼႃး “ၵဵဝ်ႇလူၺ်ႈ ၽူႈသိုဝ်ႇၶၢဝ်ႇ ဢၼ်ၵူၼ်းၸၢႆး ဢိင်းၵလဵတ်ႈ ၵေႃႉ႞ လႆႈတၢႆၵႂႃႇ” ၼႆယဝ်ႉ။ ဢမ်ႇပႆႇလႆႈလၢတ်ႈၼႄ လွင်ႈတၢင်းႁူဝ်ယွႆႈမၼ်းထႅင်ႈ။

Payne လႆႈပိုၼ်ၽႄၼိူဝ် Snapchat မိူဝ်ႈပႆႇပဵၼ်လွင်ႈတၢင်းၼၼ်ႉ ၸူဝ်ႈမူင်းမၼ်းဝႃႈ "ဝၼ်းၼႆႉ ပဵၼ်ဝၼ်းဢၼ်လီႁၵ်ႉ တီႈမိူင်းဢႃႇၵျႅၼ်ႇတီးၼႃးၼၼ်ႉယဝ်ႉ။"

မိူဝ်ႈၶၢဝ်ႇလွင်ႈမၼ်းတၢႆ ဢွၵ်ႇမႃးၼၼ်ႉ ၽူႈပၼ်ႁႅင်းၶဝ် တႄႇမႃးၸုတုမ်ၵၼ် တီႈၼွၵ်ႈႁူင်းႁႅမ်း ဝဵင်းပူဝ်ႇၼူဝ်ႇ ဢၼ်မၼ်းတၢႆၼၼ်ႉသေ ႁဵတ်းႁႂ်ႈပလိၵ်ႈၶဝ် လွမ်ႉႁွပ်ႈဝႆႉ ၽၵ်းတူၶဝ်ႈႁူင်းႁႅမ်းၼၼ်ႉယဝ်ႉ။ ၵမ်ႈၽွင်ႈ တႆႈတဵၼ်း တႃႇပဵၼ်တီႈမၢႆတွင်းမၼ်း။

ၽူႈပၼ်ႁႅင်း ၼုမ်ႇႁၢႆးၸၢႆးယိင်း ဢၼ်ၸိုဝ်ႈဝႃႈ ဝၢႆႇဢူဝ်ႇလီႇတႃႇ ဢႅၼ်ႇတီႇယႃႇ လၢတ်ႈတီႈ သိုဝ်ႇၶၢဝ်ႇ ရူဝ်ႇတႄႇဝႃႈ “ၶႃႈယူႇၼႂ်းႁွင်ႈႁပ်ႉၶႅၵ်ႇသေ ၼွင်ႉယိင်းၶႃႈ လၢတ်ႈဝႃႈ လီယမ် လႆႈတၢႆၵႂႃႇယဝ်ႉ” ၼႆယဝ်ႉ။ "ႁဝ်းၶႃႈ ဢမ်ႇယုမ်ႇလႆႈ။ ႁဝ်းၶႃႈ မႃးတီႈၼႆႈ ၵမ်းသိုဝ်ႈ တႃႇတေမၵ်းမၼ်ႈဝႃႈ မၼ်းပဵၼ်လွင်ႈတႄႉၼႆယဝ်ႉ။"

ၼၢင်းဢႅၼ်ႇတီႇယႃႇ လၢတ်ႈဝႃႈ မၼ်းၼၢင်းလႆႈႁၼ် ၽဵၼ်း တီႈပၢင်မူၼ်ႈသိူဝ်း ၼၢႆးႁေႃးရၢၼ်ႇ မိူဝ်ႈပူၼ်ႉမႃး သွင်ဝူင်ႈၼၼ်ႉၵွႆး။

ၼၢင်းယိင်းထႅင်ႈၵေႃႉၼိုင်ႈၵေႃႈ မိူဝ်ႈမၼ်းၼၢင်း သပ်းလႅင်းၼႄလွင်ႈတၢင်းဢၼ်မၼ်းၼၢင်းမႃးတီႈႁူင်းသဝ်းၼၼ်ႉႁႆႈသေ လၢတ်ႈတီႈ Reuters ၽၢႆႇၽႃႇသႃႇသပဵၼ်ႇဝႃႈ "ၼႆႉပဵၼ်လၢႆးတၢင်းဢၼ်လဵဝ်ဢၼ်ၶႃႈတေလႆႈလၢတ်ႈၵႂၢမ်းမွင်ၸ်ႂသူင်ႇသင်ႇတီႈမၼ်းၼၼ်ႉယဝ်ႉ" ၼႆယဝ်ႉ။

ၽဵၼ်း မီးလုၵ်ႈၸၢႆး ဢႃႇယု 7 ၶူပ်ႇ ဢၼ်ပဵၼ် ပႄးၵရႄးၽဵၼ်း ဢၼ်မီးတီႈၵေႃႉႁၵ်ႉၵဝ်ႇမၼ်း ဢၼ်ပဵၼ် ၽူႈႁွင်ႉၵႂၢမ်း ၶျႄႇရီႇ ဢၼ်လႆႈႁူႉၸၵ်းဝႃႈ ၶျႄႇရီႇၶူဝ်ႇ မိူဝ်ႈမၼ်းၼၢင်း ႁွင်ႉၵႂၢမ်းၸွမ်း ၸုမ်း Girls Aloud ၼၼ်ႉယဝ်ႉ။ မၼ်းၼၢင်းပဵၼ်ၽူႈတႅပ်းတတ်းတြႃး “X Factor” မိူဝ်ႈၽွင်းၶၢဝ်းတၢင်း One Direction ၼၼ်ႉသေတႃႉ လွင်ႈၵပ်းသိုပ်ႇၶဝ်တႄႇတၢင်ႈမႃး​ ဝၢႆးလင်ပီၸိူဝ်းၼၼ်ႉယဝ်ႉ။ မိူဝ်ႈဢွၼ်တၢင်း ၽဵၼ်း လႆႈၵူပ်ႉၵူႈၵၼ်တင်း မႃႇယႃႇႁႅၼ်ႇၼီႇ တႄႇဢဝ် လိူၼ်ဢေႃးၵၢတ်ႉ 2020 တေႃႇထိုင် ႁူဝ်ပီ 2022 ၼၼ်ႉသေ ႁႅၼ်ႇရီႇ လႆႈပိုၼ်ၽႄဢွၵ်ႇ ပပ်ႉၸိူင်း မိူဝ်ႈၸဝ်ႉပီၼႆႉ ဢၼ်မၼ်းၼၢင်းလၢတ်ႈဝႃႈ ဢိင်ၼိူဝ် လွင်ႈၵွင်ႉၵၢႆႇၶဝ်ၼၼ်ႉၼႆယဝ်ႉ။

လိူဝ်သေ လုၵ်ႈၸၢႆးမၼ်းယဝ်ႉ ၸိူဝ်းဢၼ်ၵိုတ်းဝႆႉ တႄႉ ပေႃႈမႄႈမၼ်း ၵျီႇဢူဝ်ႇ လႄႈ ၵႃႇရႅၼ်ႇၽဵၼ်း ဢိၵ်ႇတင်း ပီႈၼၢင်းလူင်မၼ်း သွင်ၵေႃႉ ဢၼ်ပဵၼ် ရူတ်ႉ လႄႈ ၼိၵူဝ်ႇလႃႇ ၼၼ်ႉယဝ်ႉ။


ငိူၼ်ႈငဝ်ႈၶၢဝ်ႇ

မႄးထတ်း
ဢဝ်ၶိုၼ်းမႃးတီႈ "https://shn.wikinews.org/w/index.php?title=ၽူႈႁွင်ႉၵႂၢမ်းၵဝ်ႇ_ၸုမ်း_One_Direction_လီယမ်ၽဵၼ်း_လႆႈလူႉတၢႆၵႂႃႇ_ယွၼ်ႉတူၵ်း_ၸၢၼ်း&oldid=9696"