ဝီႇၶီႇၶၢဝ်ႇ

ၽွင်းလူင်ၽၢႆႇၵႅတ်ႇၵင်ႈ ၵၢဝ်းလီၸၢၼ်း ထုၵ်ႇၺွပ်း ယွၼ်ႉပိုၼ်ၽၢဝ်ႇ မၢႆမီႈသိုၵ်းဢုပ်ႉပိူင်ႇ

ဝၼ်းၸၼ်၊ တီႇသႅမ်ႇပႃႇ 9၊ 2024

ၽွင်းလူင်ၽၢႆႇၵႅတ်ႇၵင်ႈၵဝ်ႇ Kim Yong-hyun

ၽူႈမီးပုၼ်ႈၽွၼ်း ၽၢႆႇတတ်းသိၼ် ၵၢဝ်းလီၸၢၼ်းၶဝ် တီႉၵမ်လႆႈ ၽွင်းလူင်ၽၢႆႇၵႅ​တ်ႇၵင်ႈၵဝ်ႇ ၵေႃႉဢၼ် လႆႈႁူႉဝႃႈ မၼ်းပၼ်တၢင်းႁၼ်ထိုင် ၸွမ်ပွင်ၸိုင်ႈ ယုၼ်ႇသူၵ်ႉယဵဝ်ႇ ႁႂ်ႈပိုၼ်ၽၢဝ်ႇ မၢႆမီႈသိုၵ်း တီႈမိူင်းၵၢဝ်းလီၸၢၼ်း မိူဝ်ႈဝူင်ႈပူၼ်ႉမႃးၼၼ်ႉ ၼႆယဝ်ႉ။

ၽွင်းလူင်ၽၢႆႇၵႅတ်ႇၵင်ႈၵဝ်ႇ ၶိမ်ႇယွင်ႇႁိၼ်ႇ လႆႈၵႂႃႇတီႈလုမ်းတၢင် ၸွမ်ၸိုင်ႈ ၵၢဝ်းလီၸၢၼ်း တီႈဝဵင်းသျူဝ်းလ် ၸွမ်းၼင်ႇ ၵၢင်ၸႂ်မၼ်း မိူဝ်ႈဝၼ်းဢႃးတိတ်ႉၼၼ်ႉသေ လႆႈထုၵ်ႇယိုတ်းဢဝ် ၾူၼ်းမၼ်းသေ မၼ်းၵေႃႈ လႆႈထုၵ်ႇတီႉၵမ် ၼႆ သိုဝ်ႇၶၢဝ်ႇ ၼႂ်းပိုၼ်ႉတီႈ ၵၢဝ်းလီႁွင်ႇ ဢွၵ်ႇၶၢဝ်ႇဝႆႉၼင်ႇၼႆ။

ဝၢႆးသေ ၵူတ်ႇထတ်းယဝ်ႉ ၽွင်းလူင်ၽၢႆႇၵႅတ်ႇၵင်ႈၵဝ်ႇ ၶိမ်ႇၼၼ်ႉ လႆႈထုၵ်ႇသူင်ႇၵႂႃႇ တီႈၶွၵ်ႈ ဝဵင်းသျူဝ်းလ် ၼႆ ၽူႈမီးပုၼ်ႈၽွၼ်း ၽၢႆႇတႅပ်းတတ်းတြႃးၶဝ် လၢတ်ႈၼႄၼင်ႇၼႆ။ လိူဝ်ၼၼ်ႉ မိူဝ်ႈၼႆႉၵေႃႈ ပလိၵ်ႈၵၢဝ်းလီၸၢၼ်းၶဝ် ၶဝ်ႈၵူတ်ႇထတ်း လုမ်းလႄႈ ႁိူၼ်းမၼ်းၸၢႆး ၼႆယဝ်ႉ။

ၽၢႆႇႁွင်ႈၶၢဝ်ႇၶဝ် ၵမ်းၵမ်း ႁွင်ႉၾူၼ်း ၸူးတီႈလုမ်းတၢင် လႄႈ ႁွင်ႈၵၢၼ်ပလိၵ်ႈ ဝဵင်းသျူဝ်းလ် သေတႃႉ ဢမ်ႇလႆႈၶေႃႈတွပ်ႇသင်။

ပႃႇတီႇသၢၼ်ၶတ်း ၵူဝ်းရီးယႃးႁွင်ႇၶဝ် ဢမ်ႇဢဝ်လိူင်ႈလႆႈ ၸွမ်ပွင်ၸိုင်ႈ ယုၼ်ႇသူၵ်ႉယဵဝ်ႇ လႄႈ ဝၢႆးဝၼ်းၼၼ်ႉ လႆႈၵုမ်းၶင် ၶုၼ်ၽွင်းလူင် ၽၢႆႇၵႅတ်ႇၵင်ႈၵဝ်ႇ ၶိမ်ႇ ၼႆယဝ်ႉ။

တီႈမိူင်းၵၢဝ်းၸၢၼ်းၼၼ်ႉ မိူဝ်ႈပႃႇတီႇသၢၼ်ၶတ်း တႅပ်းတတ်း တႃႇၵိုတ်းယိုတ်းဢႃႇၼႃႇ ၸွမ်ၸိုင်ႈသေ ပၼ်တၢမ်ႇမၼ်းၼၼ်ႉ မိူဝ်ႈၽွင်း ၸႅၵ်ႇၶႅပ်းၵၢင်ၸႂ် ၼႂ်းသၽႃးၼၼ်ႉ ၽူႈတႅၼ်းၽွင်း ဢၼ်လုၵ်ႉတီႈ ပႃႇတီႇဢုပ်ႉပိူင်ႇ ၵမ်ႈၼမ် လႆႈသၢၼ်ၶတ်း သေ ဢမ်ႇပၼ်သဵင် လႄႈ ၸင်ႇဢမ်ႇလႆႈ ၶႅပ်းၵၢင်ၸႂ် ဢၼ်လူဝ်ႇ 3 ပုၼ်ႈ 2 ပုၼ်ႈ ဢၼ်တႃႇဢဝ်လိူင်ႈ ၸွမ်ပွင်ႈၸိုင်ႈၼၼ်ႉယဝ်ႉ။


ငိူၼ်ႈငဝ်ႈၶၢဝ်ႇ

မႄးထတ်း
ဢဝ်ၶိုၼ်းမႃးတီႈ "https://shn.wikinews.org/w/index.php?title=ၽွင်းလူင်ၽၢႆႇၵႅတ်ႇၵင်ႈ_ၵၢဝ်းလီၸၢၼ်း_ထုၵ်ႇၺွပ်း_ယွၼ်ႉပိုၼ်ၽၢဝ်ႇ_မၢႆမီႈသိုၵ်းဢုပ်ႉပိူင်ႇ&oldid=10229"