ၽွင်းလူင်ၽၢႆႇၼွၵ်ႈမိူင်း ဢမႄႇရိၵၢၼ်ႇ တႄႇဢွၵ်ႇၶၢဝ်းတၢင်း ဢေးသျႃး
ဝၼ်းသုၵ်း၊ ၸူႇလၢႆႇ 26၊ 2024
ၶၢဝ်းတၢင်း ၽွင်းလူင်ၽၢႆႇၼွၵ်ႈမိူင်း ဢမေႇရိၵၢၼ်ႇ ဢႅၼ်ႇတူဝ်ႇၼီႇ ပလိၼ်ႇၵႅၼ်ႇ ၵႂႃႇဢေးသျႃးၼႆႉ တႄႇၵႂႃႇမိူဝ်ႈ လိူၼ်ၵျူႇလၢႆႇ 25 ဝၼ်းသေ ၽူႈမီးပုၼ်ႈၽွၼ်း ႁွင်ႈၵၢၼ်ၽၢႆႇၼွၵ်ႈမိူင်း ဢမေႇရိၵၢၼ်ႇၶဝ် လၢတ်ႈဝႃႈ တေၶိုၼ်းမၵ်းမၼ်ႈ လွင်ႈၵပ်းသိုပ်ႇ ဢၼ်ႁႅင်းယႂ်ႇ တင်း ဢူၺ်းလီ ၼႂ်းပိုၼ်ႉတီႈၼၼ်ႉယူႇ ၼႆယဝ်ႉ။ မိူဝ်ႈတႄႇမၼ်း တေလႆႈဢွၵ်ႇၶၢဝ်းတၢင်း မိူဝ်ႈၶမ်ႈ ဝၼ်းထိ 24 ၼၼ်ႉသေတႃႉ ၼင်ႇႁိုဝ် မၼ်းတေလႆႈၵႂႃႇၶဝ်ႈႁူမ်ႈ ပၢင်ၵုမ် ၸွမ်ပွင်ၸိုင်ႈ ပၢႆႇတႅၼ်ႇ လႄႈ ၸွမ်ၶုၼ်ၽွင်းလူင် ဢိတ်ႉၸရေး ပႅၼ်ႇၸမိၼ်ႇ ၼႄႇတၢၼ်ႇယႃႇႁူႉ တီႈဝဵင်းဝႃႇသျိၼ်ႇတၢၼ်ႇ တီႇသီႇၼၼ်ႉ လႆႈၶၢႆႉၶၢဝ်းတၢင်းမၼ်း ၵႂႃႇထႅင်ႈဝၼ်း႞ ၼႆယဝ်ႉ။
ၽူႈမီးၸၼ်ႉ ထၢၼ်ၽွင်းလူင်ၽၢႆႇၼွၵ်ႈမိူင်း ဢမႄႇရိၵၢၼ်ႇ လၢတ်ႈဝႃႈ ပွၵ်ႈၼႆႉ ပဵၼ်ၶၢဝ်းတၢင်း ၽွင်းလူင် ပလိၼ်ႇၵႅၼ်ႇ ၵႂႃႇဢေးသျႃး ပွၵ်ႈၵမ်း 18 ၼႆယဝ်ႉ။ ၼွၵ်ႈသေမိူင်းလၢဝ်း၊ ၽွင်းလူင် တေႁွတ်ႈထိုင်ပႃး မိူင်းဝႅတ်ႉၼမ်း၊ မိူင်းသိင်ႇၵႃႇပူဝ်ႇ၊ ၵျႃႇပၢၼ်ႇ၊ ၾီလိပ်ႈပိၼ်း လႄႈ မူင်ႇၵူဝ်းလီးယႃး ဝႃႈၼႆယဝ်ႉ။
တီႈပၢင်ၵုမ်ၶုၼ်ၽွင်းၼွၵ်ႈမိူင်း ဢသီးယႅၼ်ႇ ဢၼ်တေၸတ်းႁဵတ်းတီႈ ဝဵင်းၸၼ် (Vientiane) မိူင်းလၢဝ်းၼၼ်ႉ တေဢုပ်ႇဢူဝ်းၵၼ် လွင်ႈသိုၵ်းၼႂ်းမိူင်း မိူင်းမၢၼ်ႈယၢမ်းလဵဝ်၊ လွင်ႈပၢင်ႇလၢႆႇၶႄႇၸၢၼ်းၼႆႉ ႁႂ်ႈပဵၼ်လွင်ႈယႂ်ႇသေ ဢုပ်ႇၵၼ်။ ဢိၵ်ႇပႃး ၽွင်းလူင် ပလိၼ်ႇၵႅၼ်ႇ သေ ၶုၼ်ၽွင်းၼွၵ်ႈမိူင်း မိူင်းၶႄႇ ဝၢင်းယီႇ တေၶဝ်ႈႁူမ်ႈၸွမ်းသေ ၶုၼ်ၽွင်းၼွၵ်ႈမိူင်း မိူင်းရသျႃး Sergey Lavrov ၵေႃႈ ႁွတ်ႈၽႅဝ်မႃး တီႈဝဵင်းၸၼ် တႃႇတေၶဝ်ႈႁူမ်ႈ ပၢင်ၵုမ်ၼၼ်ႉယဝ်ႉ။
ပၢင်ၵုမ်ၶုၼ်ၽွင်းၼွၵ်ႈမိူင်း ဢသီးယႅၼ်ႇ ၼႆႉ ပဵၼ်ၶၢဝ်းယၢမ်းဢၼ် ဢမႄႇရိၵၢၼ်ႇလႄႈ ၶႄႇ ၶႄႉၶဵင်ႇၵၼ် တႃႇဢႃႇၼႃႇၼိူဝ် ၸိုင်ႈမိူင်းၼႂ်းပိုၼ်ႉတီႈ။ ၼႂ်းၶၢဝ်းတၢင်း မိူင်းၵျႃႇပၢၼ်ႇ လႄႈ မိူင်းၾိလိပ်ႉပိၼ်းၼၼ်ႉ ၽွင်းလူင် ပလိၼ်ႇၵႅၼ်ႇ တေၵႂႃႇၶဝ်ႈႁူမ်ႈ ပၢင်ၵုမ် 2+2 တင်း ၽွင်းလူင်ၽၢႆႇၵႅတ်ႇၶႄ ဢမႄႇရိၵၢၼ်ႇ လွႆႉဢေႃးသတိၼ်ႇသေ ၽွင်းလူင်ၽၢႆႇၼွၵ်ႈမိူင်း လႄႈ ၽၢႆႇၵႅတ်ႇၶႄ တေၶဝ်ႈႁူမ်ႈၸွမ်း။
ငိူၼ်ႈငဝ်ႈၶၢဝ်ႇ
မႄးထတ်း- KEN MORIYASU, Nikkei Asia diplomatic correspondent. "Blinken's 6-country Asia tour to show U.S. is 'all in' on region" — Nikkei, July 25, 2024
- AFP - Agence France Presse. "Blinken's 6-country Asia tour to show U.S. is 'all in' on region" — Barron's, July 25, 2024
- Sebastian Strangio. "Blinken Set to Visit 4 Southeast Asian Nations on Regional Tour" — The Diplomat, July 23, 2024
