ၽၢႆႇသၢၼ်ၶတ်းၶဝ် တုၵ်းယွၼ်း ႁႂ်ႈၸွမ်ပွင်ၸိုင်ႈ ၵၢဝ်းလီၸၢၼ်း ထွၼ်တူဝ်ဢွၵ်ႇ
ဝၼ်းပုတ်ႉ၊ တီႇသႅမ်ႇပႃႇ 4၊ 2024
ၽူႈတႅၼ်းၽွင်း ၽၢႆႇၶတ်းၶၢၼ်ႉၶဝ် တၢင်ႇလၢတ်ႈ ႁႂ်ႈဢဝ်လိူင်ႈ ၸွမ်ပွင်ၸိုင်ႈ ၵၢဝ်းလီၸၢၼ်း ယုၼ်ႇသူၵ်ႉယဵဝ်ႇ ၵေႃႉဢၼ် ၸီႉသင်ႇ ႁႂ်ႈသိုၵ်းၶဝ် လုၵ်ႉၽိုၼ်ႉၼၼ်ႉ ၼႆယဝ်ႉ။ ဢဝ်လွင်ႈတၢင်းဢၼ်ဝႃႈ ၸုမ်းႁႅင်းသၢၼ်ၶတ်း ဢၼ်လႆႈၸႂ် ၵၢဝ်းလီႁွင်ႇ လႆႈၵုမ်းၵမ်ဝႆႉ သၽႃးသေ မီးလွင်ႈၶဝ်ႈၵဝ်းၼႂ်း ၸိုင်ႈမိူင်းၼႆလႄႈ ၸွမ်ပွင်ၸိုင်ႈ ယုၼ်ႇသူၵ်ႉယဵဝ်ႇ လႆႈပိုၼ်ၽၢဝ်ႇ မၢႆမီႈသိုၵ်းၶိုၵ်ႉၶၵ်ႉ မိူဝ်ႈဝၼ်းဢႃးတိတ်ႉ လိူၼ်တီႇသႅမ်ႇပႃႇ 3 ဝၼ်းၼၼ်ႉယဝ်ႉ ယူႇထႅင်ႈ လၢႆၸူဝ်ႈမူငး ၸိူဝ်းပဵၼ် ၽူႈတႅၼ်းၽွင်း ပႃႇတီႇ တီႇမူဝ်ႇၶရေႇၸီႇၶဝ် လႆႈတၢင်ႇယွၼ်း ႁႂ်ႈပၢၵ်ႈပႅတ် ၸွမ်ပွင်ၸိုင်ႈ ၵႃႈတီႈၼႃႈတီႈမၼ်း ၼႆယဝ်ႉ။ ။
ပႃႇတီႇ တီႇမူဝ်ႇၶရေႇၸီႇ ဢၼ်ပဵၼ်ၽၢႆႇသၢၼ်ၶတ်းၼၼ်ႉၵေႃႈ ပိုၼ်ၽၢဝ်ႇဝႃႈ လွင်ႈဢၼ် ၸွမ်ပွင်ၸိုင်ႈ ႁဵတ်းၸိူင်ႉၼႆၼႆႉ ပဵၼ်လွင်ႈပူၼ်ႉပႅၼ် ပိူင်ငဝ်ႈပိုင်းမိူင်း ဢၼ်ယႂ်ႇသုတ်း ၼႆယဝ်ႉ။ လိူဝ်ၼၼ်ႉ မၼ်းလၢတ်ႈဝႃႈ လွင်ႈဢၼ် ဢဝ်ပၵ်းပိူင်သိုၵ်း တမ်းဝၢင်းဝႆႉၼၼ်ႉ ပဵၼ်လွင်ႈၶိုၼ်းလုၵ်ႉၽိုၼ်ႉ ဢၼ်ႁၢဝ်ႈႁႅင်းလႄႈ ပဵၼ်လၵ်းထၢၼ်ဢၼ်လီသုတ်း တႃႇတေထွၼ်ဢွၵ်ႇ ၼႃႈတီႈမၼ်း ၼႆယဝ်ႉ။ လိူဝ်ၼၼ်ႉ ပႃႇတီႇတီႇမူဝ်ႇၶရေႇၸီႇၵေႃႈ တုၵ်းယွၼ်းႁႂ်ႈၸွမ်ၸိုင်ႈ ထွၼ်တူဝ်ဢွၵ်ႇသေ သင်ဝႃႈ မၼ်းပႆႇထွၼ်တူဝ်ဢွၵ်ႇၼႆၸိုင် ႁႂ်ႈဢဝ်လိူင်ႈမၼ်းၵမ်းလဵဝ် ၸွမ်းၼင်ႇ ၵၢင်ၸႂ်ၵူၼ်းမိူင်း ၼႆယဝ်ႉ။ မိူဝ်ႈၼႆႉ ၵူၼ်းမိူင်းဢၢၼ်ႇႁူဝ်ႁဵင်မၼ်း ဢွၼ်ၵၼ် ၼႄၵၢင်ၸႂ် တီႈၼႃႈလုမ်းတႅၼ်းၽွင်း တီႈဝဵင်းသူဝ်းလ်သေ တုၵ်းယွၼ်းႁႂ်ႈ ၸွမ်ၸိုင်ႈ ယုၼ်ႇသုၵ်ႉယဵဝ်ႇ လူင်းတႃၶုၼ် ၼႆယဝ်ႉ။
ၶုၼ်ၽွင်းလူင် ၽၢႆႇၵႅတ်ႇၵင်ႈ ၵၢဝ်းလီၸၢၼ်း ၶိမ်ႇယွင်ႇႁျူင်းၵေႃႈ ယိုၼ်ႈလိၵ်ႈ ယွၼ်းထွၼ်တူဝ်ဢွၵ်ႇ တီႈၸွမ်ပွင်ၸိုင်ႈ မိူဝ်ႈတီႇသႅမ်ႇပႃႇ 4 ဝၼ်းၼၼ်ႉယဝ်ႉ။ ၽွင်းလူင် ၶိမ်ႇယွင်ႇႁျူင်း လၢတ်ႈဝႃႈ လွင်ႈဢၼ် ဢဝ်ပၵ်းပိူင်သိုၵ်း ႁဵတ်းႁႂ်ႈၵူၼ်းမိူင်း မႆႈၸႂ်ၼၼ်ႉ မၼ်းၼႅင်ၸႂ်တႄႉတႄႉသေ တေဢဝ်ပုၼ်ႈၽွၼ်း လွင်ႈၼႆႉ တဵမ်ထူၼ်ႈယူႇ ၼႆယဝ်ႉ။
ၸဵမ်မိူဝ်ႈ ၵၢဝ်းလီၸၢၼ်း ၵေႃႇတင်ႈပဵၼ် မိူင်းႁူမ်ႈတုမ် မိူဝ်ႈပီ 1948 ၼၼ်ႉ လႆႈပိုၼ်ၽၢဝ်ႇ မၢႆမီႈသိုၵ်းမႃး သိပ်းပွၵ်ႈလိူဝ်လိူဝ်သေ မိူဝ်ႈပီ 1980 ၼၼ်ႉ ၽူႈမီးၸၼ်ႉသိုၵ်း ၸုမ်း႞ တဵၵ်းႁႂ်ႈ ၸွမ်ၸိုင်ႈ မိူဝ်ႈၼၼ်ႉ ၶျူဝ်ႇၵျူဝ်ႇႁႃႇ ပိုၼ်ၽၢဝ်ႇ မၢႆမီႈသိုၵ်း တႃႇတေ ယႃႉပႅတ်ႈ လွင်ႈဢၼ်တုၵ်းယွၼ်း ႁႂ်ႈၶိုၼ်းမႄး လူင်ပွင်ၸိုင်ႈ တီႇမူဝ်ႇၶရေႇၸီႇၼၼ်ႉယဝ်ႉ။
ငိူၼ်ႈငဝ်ႈၶၢဝ်ႇ
မႄးထတ်း- Christian Edwards, Rob Picheta, Catherine Nicholls, Jessie Yeung, Elise Hammond, Aditi Sangal, Alex Stambaugh and Antoinette Radford. "Calls grow for South Korea’s president to resign after martial law chaos" — CNN, December 4, 2024
- William Gallo and Lee Juhyun. "Backlash grows against South Korea’s Yoon after martial law decree" — VOA News, December 4, 2024
- Reuters. "Calls grow for South Korean president to quit" — Bangkok Post, December 4, 2024
